2017-08-19 07:41:08 clouds 27o High | Kigali Rwanda

Dukurikire:
 
 

EBM zatumye umusoro wa ‘TVA’ winjizwa wiyongeraho 99.3% mu myaka itatu

Yanditswe na IMVAHO NSHYA

Kuya 2017-06-13 14:49:27

 
Share on:
 
Yasuwe:234
 
Yavuzweho:200
 
10
 
10

Ikigo cy’Igihugu cy’Imisoro n’Amahoro (RRA) gitangaza ko imashini zitanga inyemezabuguzi mu buryo bw’ikoranabuhanga (EBM) zafashije mu kwinjiza umusoro ku nyongeragaciro (TVA), ku buryo kuva muri 2013 kugeza 2016 wiyongereyeho 99.3%.

Mu mpera z’umwaka wa 2013, umusoro ku nyongeragaciro wishyurwa ku mamenyekanisha wanganaga n’amafaranga 110 505 783 324, ariko umwaka wa 2016 warangiye habonetse amafaranga 220 290 401 167.

Umuhuzabikorwa wa gahunda ya EBM muri RRA, Mbera Emmy, yabwiye Imvaho Nshya ko uwo musoro ku nyongeragaciro wagaragaye hatarakorwa ubugenzuzi.

Ati “Uwo musoro wabonetse ku mamenyekanisha hatarakorwa igenzura, kuko tudashaka gushyira imbaraga cyane mu bugenzuzi ahubwo turashaka ko umuntu yajya amenyekanisha ibikwiriye akaba ari byo yishyura, gusa no kugenzura bibaho bitewe n’impamvu iyi n’iyi.”

JPEG - 241.6 kb
Mbera Emmy, Umuhuzabikorwa wa gahunda ya EBM mu Kigo cy’Igihugu cy’Imisoro n’Amahoro (Foto James R.)

Kwishyura hifashishijwe ikoranabuhanga rya EBM bigamije gufasha abantu gukora imenyekanisha, bikagabanya akazi k’ubugenzuzi n’iperereza.

Umuntu usabwa gukoresha imashini ya EBM, ni umuntu wanditse ku musoro ku nyongeragaciro, ufite igicuruzo rusange kirenze amafaranga miliyoni 20 ku mwaka.

EBM zatangiye gukoreshwa mu mwaka wa 2013, izakoreshwaga icyo gihe zageraga kuri 500, uwo mwaka urangira zigeze ku 1007. Uyu munsi iziri mu gihugu zose hamwe zigera ku 16 560 mu gihe abazikoresha bagera 14300.

Ati “Impamvu umubare wazo n’uw’abazikoresha udahura ni uko umucuruzi ashobora gukorera ubucuruzi bwe ahantu hatandukanye, agatunga imashini 3 zitanga inyemezabuguzi ariko zanditse ku mubare umuranga w’ubucuruzi (Tin Number) RRA ikamufata nk’usora umwe.”

EBM yatangiye gukoreshwa muri Werurwe 2013, isimbuye impapuro zakundaga kwangirika, zikoroshya ubujura, ku buryo icyo gihe byari byoroshye gukora inyandiko mpimbano.

Mbera avuga ko EBM yaje gukemura ibyo bibazo, kuko yo igaragaza umucyo, amakuru akabikwa neza mu gihe cy’imyaka 10, kandi kuyahindura ntibishoboke mu gihe usora yamaze gusohora inyemezabuguzi kuko amakuru ahita agera ku RRA.

Abacuruzi basobanukiwe akamaro ko gukoresha EBM n’ubwo hakiri imbogamizi nke.

Mwenzangu Laura ukuriye abacuruzi mu karere ka Nyarugenge mu rugaga rw’abikorera akaba n’umwe mu bakoresha EBM, avuga ko zabafashije byinshi byaba mu gukora ibaruramari ndetse no kumenyekanisha umusoro ku nyongeragaciro.

Ati “EBM itandukanya amafaranga agomba kwinjira mu isanduku ya Leta (umusoro ku nyongeragaciro) n’amafaranga y’umucuruzi.”

Abacuruzi biyandikishije ku musoro ku nyongera gaciro kuri ubu bagera ku 20 400.

UWIMANA DONATA

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE