2017-10-18 07:01:40 clouds 27o High | Kigali Rwanda

Dukurikire:
 
 

Bujuje inyubako y’ubucuruzi ya miliyari ku mupaka wa Rusizi I

Yanditswe na IMVAHO NSHYA

Kuya 2017-05-08 10:05:55

 
Share on:
 
Yasuwe:126
 
Yavuzweho:200
 
10
 
10

Abashoramari b’i Rusizi bujuje inyubako y’amagorofa 3 ku mupaka wa Rusizi ya I, itwaye akayabo ka miliyari imwe y’amafaranga y’u Rwanda.

Iyi nyubako yitezweho gufasha mu bucuruzi bwambukiranya imipaka, aho igiye guca akajagari kakorwaga na bamwe mu baturage bo mu gihugu cya Repubulika iharanira Demokarasi ya Kongo bavaga iwabo bakajya kugurira abaturage imyaka mu mirima.

Umwe mu bashoramari bubatse iyo nyubako Habyarimana Gilbert, avuga ko iyi nyubako igiye kuzura itwaye akayabo ka miliyari imwe y’amafaranga y’u Rwanda, ikaba yarubatswe n’abashoramari 15.

Izakorerwamo ubucuruzi bw’ibiribwa, cyane cyane imboga n’imbuto z’ingeri zose, inyama n’ibindi biribwa bikenerwa ku ruhande rwa Kongo.

JPEG - 157.4 kb
Iyi nyubako yuzuye yitezweho kuba igisubizo ku iterambere ry’abaturage (Foto Bahuwiyongera S)

Iyo nyubako kandi izaba irimo ibyumba byabugenewe bikonjesha, bikanabika neza ibiribwa bimwe na bimwe nk’inyama, imboga n’imbuto.

Habyarimana Gilbert yagize ati “Iyi nyubako ije ari igisubizo gikomeye cyane mu bucuruzi bwambukiranya imipaka.

Uretse gutuma n’ibiribwa bicururizwa ahantu hatunganye, igiye guca n’ingeso y’abakongomani yo gukwirakwira mu baturage bajya gushaka ibiribwa, bimwe bakabyikurira mu mirima bahenda abaturage.”

Biteganyijwe ko mu gihe cy’ukwezi kumwe izaba yatangiye gukora. Abaturage b’imirenge ya Mururu, Nyakarenzo, Kamembe, Gihundwe n’indi iyegereye bajyaga babura aho bagurisha ibiribwa mu buryo bubaha amafaranga menshi, bamwe bakarinda kwijyanira nk’imboga n’imbuto muri Kongo bagahenderwa mu mirima bavuga ko bagiye kujya bayigurisha kuri iyi nyubako kandi ntibahendwe.

Umwe mu batuye Umurenge wa Nyakarenzo yagize ati “Iyi nyubako ibaye igisubizo cy’iterambere kuri twe, ntabwo tuzongera guhendwa ku byo twejeje.

Imboga, imbuto n’ibindi biribwa tuzajya tubihazana baduhe amafaranga afatika azajya adufasha kwiteza imbere, Abanyekongo na bo bajyaga baza kuduhendera mu mirima ntibazongera.’’

Abanyekongo bakora ubucuruzi bwambukiranya imipaka baganiriye n’Imvaho Nshya, na bo bishimiye iyi nyubako, bavuga ko batazongera kuruha bajya mu biturage gushaka ibiribwa bimwe na bimwe, kandi kuko izaba ifite ibyangombwa byose by’isuku, bazajya barangura ibisukuye.

Umuyobozi w’Akarere ka Rusizi Harelimana Frédéric, ashima cyane aba bashoramari batekereje iki gikorwa kigiye guhindura imibereho y’abaturage benshi b’uyu mujyi ndetse n’abanyabukavu benshi bazagana iyi nyubako.

Agasaba n’abandi bafite ubushobozi gukora ibikorwa nk’ibi biteza imbere akarere kabo n’igihugu muri rusange.

Ati “Abashoramari bashore imari mu bikorwa by’ingirakamaro bifasha benshi nk’ibi, akarere kazamuke binateze imbere igihugu muri rusange kandi natwe ntituzahwema kubashyigikira.’’

Minisitiri w’Ubucuruzi, Inganda n’Ibikorwa by’Umuryango w’Afurika y’Uburasirazuba, Kanimba François ubwo yasuraga iyi nyubako, yishimiye aho imirimo igeze asaba ko yihutishwa igatangira kubyazwa umusaruro yitezweho, anashishikariza n’abandi bashoramari gushora imari mu bikorwa bifatika nk’ibi.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE