2017-07-21 15:15:02 clouds 27o High | Kigali Rwanda

Dukurikire:
 
 

Banki y’Isi yahaye u Rwanda miliyari 100 zizateza imbere ireme ry’uburezi

Yanditswe na IMVAHO NSHYA

Kuya 2017-07-18 04:55:25

 
Share on:
 
Yasuwe:74
 
Yavuzweho:200
 
10
 
10

Banki y’Isi yahaye Guverinoma y’u Rwanda inguzanyo ya miliyoni 120 z’amadolari y’Amerika, ni ukuvuga agera kuri miliyari 100 z’amafaranga y’u Rwanda azifashishwa mu kunoza ireme ry’uburezi rikenewe ku isoko ry’umurimo.

Amasezerano y’iyi nguzanyo yashyizweho umukono ejo hashize ku wa 17 Nyakanga 2017, ku ruhande rw’u Rwanda na Amb. Claver Gatete, Minisitiri w’Imari n’Igenamigambi, naho ku ruhande rwa Banki y’Isi ashyirwaho umukono na Yasser El Gammal uyihagarariye mu Rwanda.

Minisitiri w’Imari n’Igenamigambi, Amb. Claver Gatete, yavuze ko ayo mafaranga azifashishwa mu myaka itatu y’ingengo y’imari, ni ukuvuga 2017/2018, 2018/2019 n’umwaka w’ingengo y’imari 2019/2020.

JPEG - 245 kb
Aha, impande zombi zari zimaze gusinya amasezerano y’inkunga (Foto James R.)

Inzego z’ubukungu iyi nguzanyo izibandaho zikubiye mu mushinga w’imyaka itatu wo kuzamura ireme ry’uburezi “PSG” aho abiga ibijyanye n’ingufu, ubwikorezi n’ubugenzuzi mu by’ubwikorez n’ inganda zifite aho zihuriye na gahunda y’ibikorerwa mu gihugu “Made in Rwanda”.

Amb. Gatete yakomeje avuga ko ayo mafaranga agiye kwita ku bumenyi bwaburaga kugira ngo haboneke imirimo ikenewe haba mu nzego za Leta n’iz’abikorera, PSF.

Ati “Bizaba ari amahirwe ku banyeshuri 4 000 bagiye kurangiza muri kaminuza y’u Rwanda, abagera ku 1 500 bazava mu mashuri makuru y’ubumenyingiro ya IPRC na RP, turitegura kandi abarenga 3 000 bazaturuka muri za kaminuza bafite impamyabushobozi zitandukanye n’abandi bagera ku bihumbi 18 bazaba bafite amahugurwa atandukanye.”

Minisitiri w’Uburezi, Dr. Papias Musafiri Malimba, yavuze ko iyo gahunda igiye kugeza igihugu ku kintu kinini byaba mu bumenyi bukenewe no muri gahunda yo kwihangira imirimo nk’uburyo bukomeje mu nkunga zindi zijya ziboneka mu rwego rw’uburezi.

Minisitiri w’Umurimo n’abakozi ba Leta, Uwizeye Judith, we yavuze ko nyuma y’imyaka itatu bazabasha kugera ku rwego rw’imirimo ishimishije uko igihugu cyifuza muri gahunda yo guhanga imirimo.

Iyo nguzanyo izanyura ku ngengo y’imari muri iyo myaka yose, izishyurwa mu myaka 38 uhereye nyuma y’imyaka 10, ku nyungu nto ya 0,75%.

Gahunda ya PSG izashyirwa mu bikorwa n’Ikigo gishinzwe kubaka ubushobozi bw’abakozi (CESB), gifatanyije na Minisiteri y’Uburezi ku nkunga y’ubufasha bwa Banki Itsura Amajyambere (BRD), Inama Nkuru y’Uburezi (HEC), Ikigo gishinzwe amashuri makuru y’ubumenyingiro (RP), Kaminuza y’u Rwanda n’Ikigo gishinzwe guteza imbere ubumenyingiro (WDA).

MUTUNGIREHE SAMUEL

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE