2017-05-26 15:17:06 clouds 27o High | Kigali Rwanda

Dukurikire:
 
 

Amashyuza, yabuzemo amashanyarazi, agiye kubyazwa ubukerarugendo

Yanditswe na IMVAHO NSHYA

Kuya 2016-03-26 07:59:46

 
Share on:
 
Yasuwe:18
 
Yavuzweho:200
 
10
 
10

Nyuma y’uko igerageza ku mushinga wo kubyaza amazi y’amashyuza umuriro w’amashanyarazi ridatanze umusaruro ryari ryitezweho, Minisiteri y’Umutungo Kamere ivuga ko aho ari hose hirya no hino mu gihugu hagiye guhindurwa ahantu h’ubukerarugendo.

Amashyuza ni amazi ava mu butaka ashyushye ku kigero kiri hejuru, akenshi aho aya mazi aba aturuka mu butaka atogota nk’inkono iri ku ziko, akaba ashobora gutwika uyakozemo uko yiboneye.

U Rwanda rufite amazi y’amashyuza ahantu hatatu : ku gice cy’ikirunga Kalisimbi, i Nyamyumba ku Kivu mu karere ka Nyabihu no muri Nyakabuye mu karere ka Rusizi. Aho hose hakunze gusurwa n’abantu bavuye imihanda yose barimo n’abanyamahanga baje kuyiyuhagira ngo abagorore ingingo, abakize amavunane.

JPEG - 197.7 kb
Kabarisa Vincent asobanura ko gahunda yo kubyaza umusaruro amashyuza biri muri gahunda yo kubungabunga amazi yose ari mu Rwanda

Leta y’u Rwanda yigeze gutangiza ubushakashatsi ahari ayo mazi cyane ku kirunga cya Kalisimbi harebwa niba yabyara amashanyarazi ariko kugeza ubu iryo gerageza ntacyo ryagezeho ndetse amafaranga asaga miliyari 22 yagendeye muri ubwo bushakashatsi.

Amashyuza yo ku kirunga cya Kalisimbi yari yitezweho gutanga ingufu z’umuriro wa megawati 300.

Ushinzwe imicungire y’amazi mu kigo gishinzwe umutungo kamere (RNRA) Kabarisa Vincent de Paul asobanura ko kuba amashyuza mu Rwanda atarabyaye umusaruro byatewe n’ikigero cyayo.

Ati “Mu rwego rw’ingufu iyo amashyuza azamutse aba afite ‘vapeur’ (umwotsi), noneho bakayikoresha kugira ngo ikarage imashini ariko bisaba amazi menshi afite ingufu nyinshi kugira ngo azamure umwuka mwinshi noneho uwo mwuka ukaba watuma imashini zikaraga.”
Kabarisa avuga ko ubushakashatsi bwakorewe kuri Kalisimbi butagize icyo butanga nk’uko mu bindi bihugu nka Kenya na Novelle Zelande byatanze umusaruro kubera ko amashyuza yaho afite umwuka mwinshi cyane ari nayo mpamvu yatanze amashanyarazi.

Amashyuza yo muri Rusizi afite ikigero cy’ubushyuhe bubarirwa dogere 60 mu gihe ayo ku kiyaga cya Kivu ari kuri dogere 80.

Nyuma yo guhagarara k’ubushakashatsi ku ngufu z’umuriro ku mashyuza, ikigo gishinzwe umutungo kamere, RNRA, kivuga ko kigiye gufatanya na ba rwiyemezamirimo batandukanye aho aya mazi agiye aherereye kugira ngo akorerwaho ibindi bikorwa byinjiza nk’ ubukerarugendo no kuyogamo mu buryo bwo kwivura.

Nta bushakashatsi bwemewe burakorwa ngo bwerekane ko amashyuza afite icyo avura mu mubiri w’umuntu, ariko abenshi mu bayakoresha bavuga ko yabagiriye umumaro akabakiza indwara zirimo na rubagimpande.

Koperative COOPEREKI imwe mu zikorera umwuga wo kuroba mu kiyaga cya kivu ivuga ko yamaze kugirana ibiganiro n’inzego z’ibanze bakaba bagiye gutangira kubyaza umusaruro amashyuza yo ku Kivu.

Umuyobozi w’iyo koperative avuga ko abahakorera massage batarahabwa uburenganzira bwo kwishyuza ariko ngo bizakorwa mu buryo buzwi neza, ati “Turi guteganya kubaka ahantu abantu bazajya bakarabira barangiza bakajya mu biwiherero byaba na ngombwa tukazahashyira akantu bazajya bafatiramo agafanta bibaye ngombwa batagombye kuza bazitwaje cyangwa ngo bajye ahandi.”

Amazi y’amashyuza yuzuyemo imyunyu ngugu myinshi umubiri w’umuntu ukenera nka Phosphore, Calcium, Iron, n’indi, umumaro w’iyo myunyu ukaba ugarukwaho kenshi n’abayogamo bavuga ko nyuma yo kuyogamo indwara zakize.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE