Advertisement
 
 
 
 
 
 
 
 

Ubukungu

Akeneye urugendoshuri mbere yo kugurutsa indege ya mbere yakorewe mu Rwanda   

  Yanditswe na NGABOYABAHIZI PROTAIS
 May 2016

 
 

Nyuma y’igihe kirekire yubaka indege yo mu bwoko bwa kajugujugu, Umusaza witwa Kaziyake Jean Damascene, utuye mu murenge wa Busogo mu karere ka Musanze, arasaba gufashwa kubona aho yakorera urugendo shuri, kugira ngo arusheho gukarishya ubwenge, mbere yo kuyigurutsa.

Uyu musaza avuga ko iyi ndege amaze gutakazaho amafaranga ibihumbi 800, yayikoze mu rwego rwo gushyira mu bikorwa indoto ze, zo kugurutsa bwa mbere indege yakorewe mu Rwanda.

Iyi kajugujugu ya mbere ari gukora ayifata nk’iy’igerageza, akaba ari umushinga amaze igihe ashyira mu bikorwa, afatanyije n’abahungu be babiri.

JPEG - 91.9 kb
Kajugujugu Kaziyake yakoze iraburaho imirimo mike igatangira kuguruka nk’izindi zose (Foto Ngaboyabahizi P).

Avuga ko aziruhutsa ari uko iyi ndege ifashe ikirere, agatera ishema igihugu cyamubyaye, ubwo kizaba kibaye icya mbere muri Afurika y’Uburasirazuba gikorewemo indege kandi ikozwe n’umwenegihugu.

Yagize ati:“Ni yo nakwitaba Imana uyu munsi, nifuza ko mu Rwanda naho hazahagurukira indege yahakorewe. Ubu abarundi numvise ko batangiye kuyikora nabo, nifuza rero ko u Rwanda rwaba urwa mbere muri Afurika y’ibiyaga bigari rutunze indege yahakorewe”.

Indege Kaziyake arimo kugerageza igizwe na moteri yari yaraguze ngo ayifashije mu kubaza, n’ibindi byuma by’amabati we avuga ko agenda abitoragura hirya no hino.

Kuri ubu iyi ndege igenda ku butaka ariko ntirabasha kuguruka, ibi ngo biterwa no kuba hari bimwe mu bikoresho atarabona, ndetse ngo akaba akeneye n’urugendo shuri, akagera aho indege zikorerwa akihera ijisho mbere yo kuyizamura mu kirere.

Yagize ati:“Ndasaba ubufasha kugira ngo mbashe gukora urugendo shuri, n’iyo namarayo icyumweru kimwe nkabireba gusa, nabasha kuyihagurutsa ikajya mu kirere”.

Uyu musaza ufite imyaka isaga 60, asobanura ko yize ibijyanye no gukanika amazi, (plomberie), gusa ngo igitekerezo cyo gukora indege cyo yakigize mu rwego rwo guhanga udushya twakorewe mu Rwanda.

Mutarubaza Ezechiel, umwe mu rubyiruko rwo muri uyu murenge, yavuze ko uriya musaza mu gihe yatangiraga gukora iriya ndege batabyiyumvishaga, ndetse bamwe bakamunnyega, ariko ubu ngo bamaze kubona ko isaha n’isaha yayigurutsa.

Yagize ati:“Ibi biduhaye amasomo nk’urubyiruko, mu gihe bamwe muri twe birirwa banywa ibiyobyabwenge ,bishora mu ngeso mbi, ariko umusaza wo m myaka za 60, we akaba arota akora indege.Ni byiza ko urubyiruko rw’u Rwanda ruhora rukora ubushakashatsi mu ikoranabuhanga”.

Mutarubaza nawe asaba inzego zibishinzwe nka Minisiteri ifite ikoranabuhanga mu nshingano kumuba hafi, akabasha gukabya inzozi ze zo kugurutsa ‘rutemikirere’.

 

Comments

 
 
Musanze:Ibigori bari bitezeho umusaruro ushimishije byibasiwe na Nkongwa
Musanze:Ibigori bari bitezeho umusaruro ushimishije byibasiwe na Nkongwa

Abaturage bakora umwuga w’ubuhinzi bo mu mirenge imwe n’imwe yo mu karere ka Musanze, baravuga ko bahangayikishijwe n’uko batazabona umusaruro uhagije w’ibigori muri iki gihembwe cy’ihinga A 2017, (...)

Mukahigiro yubatse inzu ebyiri z’ubucuruzi abikesheje kudoda inkweto
Mukahigiro yubatse inzu ebyiri z’ubucuruzi abikesheje kudoda inkweto

Mukahigiro Pascasie utuye mu kagari ka Gasovu, mu murenge wa Karambi mu karere ka Nyamasheke, avuga ko amaze kugera kuri byinshi abikesheje ubudozi bw’inkweto. Uyu mugore w’imyaka 45 avuga ko (...)

 Akarere ka Musanze  kazakoresha miliyoni 18 ku muyoboro w’amazi wa Rukore
Akarere ka Musanze kazakoresha miliyoni 18 ku muyoboro w’amazi wa Rukore

Ubuyobozi bw’Akarere ka Musanze buravuga ko bwateganyije amafaranga miliyoni 18, azifashishwa mu mushinga wo gusana umuyoboro w’amazi wa Rukore uri mu murenge wa Muko na Nkotsi, umaze imyaka 2 (...)

Abanyenganda b’i Huye baracyafite imbogamizi mu kwimukira muri zone yagenewe inganda
Abanyenganda b’i Huye baracyafite imbogamizi mu kwimukira muri zone yagenewe inganda

Mu gace kagenewe inganda mu kagari ka Sovu mu murenge wa Huye mu karere ka Huye, usanga hataritabirwa cyane ngo hakorerwe ibyo hagenewe, kuba nta bikorwaremezo birahagezwa n’ibibanza bihenze (...)

Kirehe: Umukobwa agiye gushinga uruganda ruzohereza inyama z’ingurube mu mahanga
Kirehe: Umukobwa agiye gushinga uruganda ruzohereza inyama z’ingurube mu mahanga

Umukobwa witwa Umubyeyi Aimée Laetitia, utuye mu karere ka Kirehe, umurenge wa Kigina, avuga ko ateganya gukora uruganda rutunganya inyama z’ingurube, ahereye ku bworozi bw’ingurube akora, (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.