2017-08-20 07:43:19 clouds 27o High | Kigali Rwanda

Dukurikire:
 
 

Akarere ka Musanze kazakoresha miliyoni 18 ku muyoboro w’amazi wa Rukore

Yanditswe na IMVAHO NSHYA

Kuya 2017-03-23 11:16:05

 
Share on:
 
Yasuwe:135
 
Yavuzweho:200
 
10
 
10

Ubuyobozi bw’Akarere ka Musanze buravuga ko bwateganyije amafaranga miliyoni 18, azifashishwa mu mushinga wo gusana umuyoboro w’amazi wa Rukore uri mu murenge wa Muko na Nkotsi, umaze imyaka 2 warangiritse.

Abaturage bo muri iyi mirenge yombi bakunze kugaragaza ko baremerewe cyane n’ikibazo cyo kutagira amazi meza, ndetse mu nkuru zitandukanye zasohotse muri iki kinyamakuru basabaga ubuyobozi kubagoboka, uyu muyoboro w’amazi ugasanwa bakareka kuvoma ibirohwa.

Umuyobozi w’Akarere ka Musanze, Habyarimana Jean Damascene, avuga ko nyuma yo kumenya iki kibazo bagiye kugikemura vuba, ariko kandi agasaba abaturage kubungabunga ibikorwa remezo nk’iki kuko ari bo bifitiye akamaro.
Yagize ati “Ni inshingano zacu ko umuturage agezwaho ibikorwa remezo, ikibazo cy’umuyoboro wa Rukore aho abaturage banywaga amazi y’ibirohwa cyari kituraje ishinga, urumva kugira ngo umuturage amare imyaka 2 yose anywa amazi y’ibirohwa n’iki gihe tugezemo, urumva ko ari ikibazo ku karere n’igihugu cyacu muri rusange.

Uwo muyoboro uzatwara amafaranga agera kuri miliyoni 18, ndasaba ko abaturage bakomeza kuwurinda cyane ko na bo babizi neza ko ariya matiyo yangijwe andi akibwa, aha rero ijisho ry’umuturanyi ni ngombwa cyane, nibabungabunge ibikorwa remezo ubuyobozi bugenda bubagezaho”.

Uwitwa Ndayambaje Jean Marie Vianney yagize ati “Nyuma y’aho Imvaho Nshya igereye hano tukayibwira akababaro kacu twabonye ubuyobozi bw’Akarere buje kudusura, busanga tubayeho nabi koko, twavomaga muri Mukungwa ibirohwa kandi na we warabibonye, twinyweraga tukanakoresha byose amazi atemba.

Ariko kuri ubu imirimo yo gusana uyu muyoboro wa Rukore yatangiriye muri Muko, ubu ndizera ko nibura nko mu gihe cy’ukwezi tuzaba tunywa amazi meza. ndashimira rero Imvaho Nshya itarahwemye kudukorera ubuvugizi kandi byatanze igisubizo, twebwe ijwi ryacu ryari ryanze kugera kure, ariko ibinyamakuru byo bigera kure kuko bisomwa na benshi”.

Abaturage bo muri Nkotsi na Muko bavuga ko bakuye isomo rikomeye muri iyi myaka ibiri ishize batagira amazi meza, bakavuga ko bafashe ingamba zikarishye mu kubungabunga ibikorwa remezo bagezwaho n’ubuyobozi bwiza.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE