2017-06-28 15:02:12 clouds 27o High | Kigali Rwanda

Dukurikire:
 
 

Abikorera bishimira ko bayoboye ubukungu bw’igihugu

Yanditswe na IMVAHO NSHYA

Kuya 2017-06-07 13:48:15

 
Share on:
 
Yasuwe:245
 
Yavuzweho:200
 
10
 
10

Abikorera bishimira bagira uruhare mu kuzamura ubukungu bw’u Rwanda mu gihe kera bitabagaho.

Mazimpaka Olivier, umuyobozi w’inyubako y’ubucuruzi yo mu mujyi wa Kigali, Chic, akaba n’umwarimu wigisha imiyoborere n’icungamutungo muri Kaminuza y’u Rwanda, avuga ko ubukungu n’iterambere by’igihugu biyobowe n’abikorera.

Ahamya ko uko kwihuta mu iterambere bishingira no ku buyobozi bwiza Perezida Paul Kagame abereye ku isonga.

Ati “Perezida Kagame ni Umuyobozi ufite imbaraga zo gutekereza buri kimwe kigerwaho uko cyateguwe, ntacika intege kabone n’iyo haba hari amananiza akomeza intego y’icyo yiyemeje. Ibi binajyana na disipulini imushoboza gukomeza kuyobora abantu igihe kirekire kandi bamwubaha, ibi bituma igihugu gitera imbere, nk’abikorera tubyubakiraho mu iterambere.”

JPEG - 95.6 kb
Inyubako ya CHIC, imwe mu zikomeye z’ubucuruzi muri Kigali ni ikimenyetso cy’ubushobozi bw’abikorera

Mazimpaka yibuka ko mbere wasangaga Leta ari yo ifite ubukungu mu biganza.

Ati ”Iyo urebye kera amasoko n’ubundi bucuruzi byari mu maboko ya Leta, ibi ntibyihutishaga iterambere mu rwego rw’Abikorera nk’uko bikorwa ubu, nka Chic nta bwo ari inyubako umuntu umwe yakwiyubakira byoroshye, ariko binyuze mu kwishyira hamwe kw’Abashoramari yarubatswe kandi ni nabo nk’Abikorera bayifite mu biganza, ibi bivuze ko n’imikorere yayo izabyazwa inyungu bityo ishoramari muri uru rwego rikomeze gutera imbere.”

Uyu muyobozi wa Chic kandi asanga icyizere ari cyose mu iterambere ry’inganda.

Ati ”Birashimishije kubona muri ‘Special Economic Zone’ uhagera ukahasanga uruganda mu gihe gito ruba rwatangiye guteranya imodoka, ibi binavuze igabanuka ry’ubushomeri kuko bizahanga akazi gashya, si aha gusa kuko no mu rwego rw’ikoranabuhanga hari uruganda rukora za Mudasobwa nziza mu gihe mbere uwashakaga wese kugura Laptop cyangwa imodoka yaguraga izitumizwa hanze.”

Ashimangira ko abantu uko bagenda batinyuka bagira amakuru ku bucuruzi kimwe n’umuco wo kwihuza kw’abacuruzi mu mishinga y’ishoramari birushaho gutuma umubare w’abacuruzi ukomeza kwiyongera.

Ati ”Mbere amakuru ku bucuruzi yari make, imishinga minini y’ubucuruzi yari mike cyane ntibyari byoroshye kuba wabona umushinga munini w’ishoramari rihuriweho n’abacuruzi benshi, kubera kutagira amakuru uwashakaga kuba yagura imodoka yabwirwaga n’umuntu umwe amakuru, ariko ubu abacuruzi benshi bajya mu masoko yo mu Bushinwa, Dubai n’ahandi bigatuma Abanyarwanda bagura ibyo bashaka bahisemo kandi batanahenzwe.”

Uyu mushoramari yishimira uruhare rw’Abikorera mu nzego nk’urw’ingufu, ubuzima kimwe n’urw’uburezi.

Ati ”Iyo urebye abikorera bakomeje kugira uruhare muri izo nzego kimwe n’izindi, uretse ingufu z’umuriro w’amashanyarazi atangwa na Leta hari n’amashanyarazi akomoka ku mirasire y’izuba atangwa binyuze mu bikorera, mu buzima naho abikorera barimo kubaka ibitaro bikomeye naguha nk’urugero rw’Ibitaro bikomeye bigiye kubakwa na Kaminuza yigenga ya Kigali, ibi bikomeza guha amahirwe Abanyarwanda yo kugera ku burezi kimwe na serivisi z’ubuzima.”

Asaba urwego rw’Abikorera mu Rwanda guhuza iterambere ry’inganda n’urwego rw’uburezi.

Ati ”Nize icyiciro cya 3 cya Kaminuza muri Suwede mu bijyanye n’imiyoborere igamije iterambere rirambye, ariko usanga abarimu baza kwigisha harimo abayobozi b’inganda zikomeye nka Volvo, Sony Elickson n’izindi, ibi bifasha abanyeshuri b’abahanga barangije guhita babona akazi muri izo nganda kuko baba bafite ubumenyi bukenewe ku isoko.”

Nubwo bikorwa gutyo usanga amasomo ashingiye ku mateka y’abanyamahanga bakomeye mu bucuruzi.

Mazimpaka ati ”Ibi natwe twabihuza n’amateka yacu nk’Abanyarwanda hakabaho abacuruzi b’Abanyarwanda bakomeye bafite amateka batanga amakuru y’ubucuruzi akandikwa mu bitabo byakwigishirizwamo muri za Kaminuza za hano mu Rwanda, ibi byanatera ishyaka benshi kurangiza bihangira imirimo kuko baba bafite ingero za hafi bakuraho umurava n’imbaraga kuruta kuzikura ku banyamahanga, kuko hari abakwibwira ko ubunararibonye bushingiye ku mateka y’ubucuruzi ari iby’abanyamahanga gusa.”

Bitwayiki André ni umwe mu bashoramari akaba anayoboye urugaga rw’abikorera ku rwego rw’Umujyi wa Kigali, nawe ashimishwa n’uko abikorera bahawe rugari.

Ati ”Biradushimisha kubona ubukungu bwacu bukomeje kuyoborwa natwe abikorera ibi byihutisha iterambere, mu misoro dutanga Leta ikuramo ibyubaka imihanda, amashuri n’amavuriro, turayishimira ku bw’uruhare n’inama byayo idahwema kutugira kugira ngo dukomeze iterambere twiyemeje.”

Ku bijyanye n’uko iterambere ry’inganda ryajyana n’iterambere ry’imyigishirize mu mashuri y’imyuga na za Kaminuza.

Ati ”Ni byo koko kugeza ubu inzobere usanga zihenda, kuko ntibyoroshye kugira ngo uruganda rubone umukozi wo ku rwego rwo hejuru rutamukuye hanze, uyu usanga iyo aje ahembwa umushahara uri hejuru cyane wahemba abakozi benshi b’Abanyarwanda bakora neza, kugira ngo ibi bihinduke birasaba ko mu mashuri yacu y’imyuga na za Kaminuza hatumizwa inzobere imwe cyangwa nke zikaza kwigisha abana hirya no hino mu mashuri y’imyuga na za Kaminuza bityo bagasohoka bahuye n’isoko ry’umurimo, ibi uretse no kuba bihendutse byakuraho icyuho cy’abakozi b’Inzobere igihugu gikeneye mu muvuduko w’iterambere turimo.”

Seka Fred ni Umuyobozi w’ihuriro ry’abunganira abacuruzi muri gasutamo, akaba n’umuyobozi wungirije w’iryo huriro mu muryango w’Afurika y’Iburasirazuba, avuga ko nk’abikorera bishimira intambwe barimo igamije gutuma baba ku isonga ry’ubukungu bw’igihugu.

Ati ”Ibi byose tumaze kugeraho tubikesha ubuyobozi bwiza Perezida Kagame abereye ku isonga. Nta bwo byari byoroshye kwiyumvisha isura n’ishusho by’Umunyarwanda n’u Rwanda nyuma ya Jenoside yakorewe Abatutsi mu 1994, Kagame yaduhaye icyizere twongera kubaho tuba abantu, nyuma aduha kwigira no gutinyuka ibyo ubusanzwe abantu bumvaga ko bishobowe n’abandi, iyi ni yo ntandaro y’imishinga minini y’ubucuruzi n’ibikorwa remezo.”

Avuga ko nk’abikorera bashima uburyo igihe bamaraga mu nzira n’imizigo itumizwa ku byambu byo hanze cyagabanutse. Ati “Mbere umuzigo washoboraga kumara iminsi 21 na 30 ngo uve Mombasa ugere i Kigali, ariko ubu uhagera bitarenze iminsi itatu. Ibi byose ni we watumye biba.”

Seka yemeza ko gukomezanya urugendo muri manda ya 3 na Kagame bivuze gukomeza kurushaho gutera imbere.

Umwe mu bacuruzi bakorera mu Murenge wa Gatenga, Akagali ka Karambo, Umudugudu wa Sangwa, Munyaneza Jean Berchmas ati ”Iyo tubona ziriya nyubako z’ubucuruzi zirimo kubakwa biduha ishusho y’iterambere ry’igihugu, ntituragira ubushobozi bwo gukoreramo ariko igihe buzabonekera na twe twajyayo.”

Umuyobozi w’Umujyi wa Kigali wungirije ushinzwe ubukungu, Busabizwa Parfait, avuga ko uruhare rwa Leta ari ugufasha abikorera gukomeza gutera imbere.

Ati ”Twe duhora iteka twiteguye kandi tubafasha mu kuborohereza bahabwa ubutaka ku giciro cyihariye ndetse hari n’aho twabubahera n’ubuntu bitewe n’imiterere y’umushinga.”

Asaba abikorera kurushaho gukora ishoramari bahuriyeho, ati ”Ishoramari rihuriweho ryihutisha iterambere ry’ubukungu, ndabasaba gukomeza iyi nzira natwe twiteguye kubashyigikira.”

GATETE JEAN BOSCO

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE