2017-06-28 15:02:12 clouds 27o High | Kigali Rwanda

Dukurikire:
 
 

Abanyenganda b’i Huye baracyafite imbogamizi mu kwimukira muri zone yagenewe inganda

Yanditswe na IMVAHO NSHYA

Kuya 2017-03-20 11:01:56

 
Share on:
 
Yasuwe:139
 
Yavuzweho:200
 
10
 
10

Mu gace kagenewe inganda mu kagari ka Sovu mu murenge wa Huye mu karere ka Huye, usanga hataritabirwa cyane ngo hakorerwe ibyo hagenewe, kuba nta bikorwaremezo birahagezwa n’ibibanza bihenze bikaba zimwe mu mpamvu zitera iri dindira.

Ugeze muri aka gace kahariwe inganda mu kagari ka Sovu uko bigaragara ntiharitabirwa kuko hagaragara inganda 3 gusa, mu gihe aka gace gafite ubuso bwa hegitari 50 kagenewe kuzubakwamo inganda zigera kuri 25.

Umwe mu bashoramari afite uruganda rutunganya umuceri mu karere ka Huye, avuga ko kuba ataritabira kwimura uruganda rwe ngo ajye mu gace kahariwe inganda, biterwa n’ibibazo bishingiye ku mikoro, dore ko ngo n’ibiciro by’ibibanza bikiri hejuru.

Yagize ati “Kugira ngo tubashe kwimukira hariya muri kiriya gice ni ubushobozi kandi buhambaye cyane, kuko usanga hakiri ikibazo cyo kuba ibibanza byaho bihenda cyane, ku buryo usanga bizasaba amafaranga menshi, no kwimura ibikoresho byose ugasanga ntibyoroshye tugahitamo gukomeza kuba dukorera aho dusanzwe kugira ngo tubone inyungu.”

JPEG - 125.7 kb
Meya Muzuka asobanurira abasenateri aho gahunda yo kwimurira inganda aho zagenewe igeze

Kayiranga Muzuka Eugene, umuyobozi w’akarere ka Huye, avuga ko kuba inganda nyinshi zikiri mu bice bitandukanye ari ikibazo, gusa akemeza ko bagiye gukora ubukangurambaga ba nyirazo bakazijyana ahabugenewe ndetse n’ikibazo cy’uko hahenze kikaba cyiri kwigwaho.

Yagize ati “Dufite inganda nyinshi muri aka karere, ziracyanyanyagiye hirya no hino mu karere, ariko icyo twavuga ni uko turi gukangurira ba nyirazo kuzijyana muri zone y’inganda, ikibazo cy’uko bavuga ibiciro biri hejuru twakigejeje ku nzego zibishinzwe kandi bari kubisuzuma ngo bizanozwe neza bigaragarizwe abanyarwanda.

Ikindi kandi ngira ngo ikibazo si ubutaka ikibazo ni ikije gukorerwa kuri ubwo butaka, kandi iyo abantu baganiriye ibisubizo biraboneka.”

Ubwo bari muri gahunda yo gusuzuma aho ibikorwa by’ahagenewe inganda bigeze mu karere ka Huye, Senateri Muhongayire Jacqueline uhagarariye komisiyo y’iterambere, ubukungu n’imari ya Sena, yavuze ko akarere ka Huye kagomba kuganira n’abafatanyabikorwa kugira ngo hirindwe inzitizi zadindiza uyu mushinga.

Yagize ati “Igishushanyombonera kirahari kandi kiri mu nzira nziza, ariko izi nzitizi zigaragazwa ni uko zaganirwaho kugira ngo zitazadindiza uyu mushinga, ubuyobozi bakaganira n’abafatanyabikorwa bose bakamenya amakuru yose, kuko ni umushinga usaba amafaranga menshi.

Akarere ka Huye ni kamwe mu turere 8 tw’igihugu twakorewe ibishushanyombonera by’inganda, hagamijwe gutunganya ubutaka buzakenerwa n’abashoramari mu guteza imbere ubukungu.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE