2017-07-28 06:05:39 clouds 27o High | Kigali Rwanda

Dukurikire:
 
 

Abanyarwanda basaga miliyoni 3 babarizwa mu makoperative

Yanditswe na IMVAHO NSHYA

Kuya 2017-05-12 06:51:13

 
Share on:
 
Yasuwe:98
 
Yavuzweho:200
 
10
 
10

Minisiteri y’Ubucuruzi, Inganda n’ibikorwa by’Umuryango wa Afurika y’Uburasirazuba iratangaza ko umubare w’Abanyarwanda bari mu makoperative ugera kuri miliyoni 3 n’ibihumbi 200, gusa ikibazo gihari kikaba imikorere y’ayo makoperative.

Kuva itegeko rishyiraho amakoperative ryajyaho mu 2007 kugeza ubu, habarurwa amakoperative afite ubuzima gatozi 8000, abarizwamo abanyamuryango barenga miliyoni 3.

Mu nama yigaga uburyo amakoperative yafatanya kugira ngo anoze imikorere yayo yabaye ejo hashize tariki 11 Gicurasi 2017, Minisitiri Kanimba François, yavuze ko umubare w’Abanyarwanda bari mu makoperative ari munini.

JPEG - 278.2 kb
Minisitiri w’Ubucuruzi n’inganda n’ibikorwa by’umuryango w’Afurika y’Uburasirazuba Kanimba Francois( iburyo) (James R)

Ibyo abishingira ku kuba uyu mubare ungana na 80% by’Abanyarwanda barengeje imyaka 18 bagombye kuba bakora.

Muri iyo nama yahuje inzego zitandukanye, haragaragajwe bimwe mu bibazo biboneka mu makoperative ndetse n’umuti kugira ngo ibyo bibazo bikemuke.
Minisitiri Kanimba yavuze ko mu makoperative yo mu Rwanda habonekamo ibibazo byinshi birimo kuba Abanyarwanda bamwe batayibonamo, ibibazo by’imicungire mibi y’amakoperative n’amakoperative afite igenamigambi ritarangwamo udushya tubafasha kugera ku mpinduka zigaragara.

Ati “Ibi bibazo nta bwo tuzabiharira urwego uru n’uru, hakwiye ubufatanye bw’abaturage mu nzego zinyuranye kugira ngo dufashe amakoperative kwiyubaka.”

Mu gushaka umuti w’ibyo bibazo, abitabiriye iyi nama bafashe umwanzuro wo gushyiraho ihuriro guhera mu karere kugeza ku rwego rw’igihugu, rizajya rigaragaramo ibyiciro byose, aho bazajya bafatanya gukemura ibyo bibazo.

Kanimba yavuze ko iri huriro ryitezweho byinshi, dore ko ritazaba rigizwe n’inzego za Leta gusa, ahubwo rizajya riba ririmo n’inzego zitegamiye kuri Leta n’abandi bantu bavuga rikijyana.

Abo bantu bagize ihuriro bakaba bazajya bahura, bakiga ku iterambere ry’amakoperative n’ibindi bibazo birimo, buri muntu wese agatanga umusanzu we w’uburyo byakemuka.

Minisitiri Kanimba ati “Gukurikirana imikorere y’amakoperative tubishyize mu maboko y’Abanyarwanda hirya no hino, kuko ayo makoperative ni ayabo, bikazarushaho gutanga umusaruro kuruta uko bategereza umukozi w’amakoperative ngo aze ajye kubikurikirana.”

Havugimana Vincent uhagarariye urugaga rw’abahinzi mu Rwanda, yavuze ko mu makoperative yabo harimo ibibazo by’imiyoborere n’ibibazo by’imicungire y’amatungo ariko yishimiye iri huriro ryashyizweho.

Ati “Iri huriro rigiye gushyirwaho rizadufasha twe abagenerwabikorwa ndetse riduhuze n’abafatanyabikorwa, rikaba kandi ryitezweho kuzanadufasha mu gukemura ibibazo twajyaga duhura na byo”.

Mu Rwanda habarurwa amakoperative agera ku 8000, ihuriro ry’amakoperative 137, ingaga 17, imirenge Sacco 484.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE