Advertisement
 
 
 
 
 
 
 
 

Ubukungu

Abanyarwanda bamaze kugezwaho amashanyarazi bayafiteho ubuhamya   

  Yanditswe na RUBIBI OLIVIER
 2 weeks ago

 
 

Abanyarwanda bamaze kugerwaho n’amashanyarazi mu Rwanda bagaragaza uburyo yabafashije guhindura imibereho n’imyumvire ku guharanira iterambere ryihuse. Leta y’u Rwanda itangaza ko nubwo abanyarwanda bamaze kugerwaho n’amashanyarazi bageze ku kigero cya 27%, imirenge imaze kuyakizwamo ku kigero gisaga 95% kandi igikorwa kirakomeje.

Leta y’u Rwanda ifite intego y’uko mu mwaka 2020 Abanyarwanda bose bazaba baramaze kugerwaho n’umuriro w’amashanyarazi naho mu mwaka 2018 nta munyarwanda uzaba agikoresha agatadowa.

Mu myaka umunani gusa ingufu z’amashanyarazi zimaze kwikuba inshuro zigera kuri enye aho zavuye kuri Megawati 50 mu mwaka 2008 ubu zikaba zigeze kuri Megawati 200.

Mu mpera z’ukwezi kwa Gicurasi uyu mwaka, Minisitiri w’Ibikorwa Remezo James Musoni, yavuze ko amashanyarazi agomba kugera ku Banyarwanda bose bitarenze umwaka wa 2020, kandi akabageraho mu buryo bwizewe ndetse no ku giciro gihendutse.

Ubwo yari mu kiganiro Kubaza bitera kumenya, Musoni James yagize ati “Nta munyarwanda uzaba akimurikisha agatadowa bitarenze umwaka wa 2018.”

Abaturage b’imwe mu mirenge bumvaga kugerwaho n’amashanyarazi ari nk’inzozi ubu barimo kwiteza imbere kubera kugezwaho umuriro.

JPEG - 345.6 kb
Niyonteze Jean Claude wahise atangira umwuga w’ububaji muri Musenyi bamaze kwegerezwa umuriro

Bugesera: Umurenge umwe rukumbi wari utarageramo umuriro w’amashanyarazi wamaze kugeramo

Umurenge wa Musenyi wari usigaye utarageramo umuriro w’amashanyarazi mu mirenge 15 igize akarere ka Bugesera waramaze kugeramo. Abaturage b’Umurenge wa Musenyi barabyinira ku rukoma nyuma yo gukira umugogoro w’urugendo rw’ibirometero bikabakaba 10 bakoraga bajya gushaka umuriro mu mujyi wa Nyamata.

Muri Gicurasi 2016, ni bwo umuriro wagejejwe mu murenge wa Musenyi wari usigaye wonyine utarageramo umuriro w’amashanyarazi. Abaturage batuye muri uyu murenge bamaze gutangira ibikorwa by’iterambere

Niyonteze Jean Claude utuye mu mudugudu wa Kavumu, Akagari ka Gicaca Umurenge wa Musenyi avuga ko guhabwa umuriro byababereye urufunguzo rw’iterambere.

Niyonteze yagize ati “ Nakoraga urugendo runini cyane njya gukorera mu Gakiriro ka Maranyundo. Natakazaga amafanga menshi mu muhanda ntega, umuntu yansabaga kumukorera nk’intebe bikantwara igihe kinini cyane ariko ubu imbogamizi zose zavuyeho ndabyuka nkaza hano nkacana imashini ngakora Nizeyimana Félix mubaruramari wa Koperative yo kubitsa no kugurizanya y’Umurenge Sacco “Imbarutso Musenyi –Sacco”avuga ko imikorere ya mbere batarabona umuriro yari mibi cyane, kuko ibintu byose bashakaga gukora, bajya mu mujyi wa Nyamata.

Nizeyimana na we yagize ati “Imikorere y’ubu dufite umuriro na mbere tutarawubona iratandukanye cyane kuko nta kintu na kimwe twabaga twakora twifashishije mudasobwa . Twashakaga gukora idosiye tukajya Nyamata. Cyabaga ari ikibazo gikomeye cyane kuko Sacco ntabwo itandukanye na banki ariko wasangaga ibintu byose dukora dupfundikanya. Ubu ibintu byose dukora bibitse neza hifashishijwe ikoranabuhanga, dufite interineti muri rusange ibintu byaroroshye.”

Umunyamabanga Nshingwabikorwa w’Umurenge wa Musenyi Ruzagiriza Vital avuga ko iterambere ryatangiye kwihuta nyuma y’aho umuriro ugereye mu Murenge wa Musenyi.

JPEG - 334.1 kb
Mu murenge wa Musenyi mu karere ka Bugesera bamaze kubona umuriro

Ruzagiriza yagize ati “ Hashize amezi agera kuri atandatu umuriro ugeze mu murenge wa Musenyi ni igikorwa cyadushimishije cyane kuko abaturage bakoraga ingendo ndende cyane bajya gushaka umuriro mu mujyi wa Nyamata. Tekereza kuba umuturage ashaka umuriro wa Telefone agakora ibirometero 10 ! Ni ibintu bitari bikijyanye n’igihe u Rwanda rugezemo. Byari bigayitse kuba twari tugikoresha amaraporo yose n’intoki.”

Ruzagiriza avuga ko Umurenge wa Musenyi ariwo wonyine wari utarageramo umuriro mu Mirenge 15 igize Akarere ka Bugesera ndetse ngo byari biteganyijwe ko umuriro uzahagera mu mwaka wa 2018 ariko Minisitiri w’Ibikorwa remezo yarabasuye barabimusaba umuriro uhita ugezwa mu Murenge wa Musenyi.

Umunyamabanga Nshingwabikorwa w’Umurenge wa Musenyi avuga ko kuva umuriro wagera muri uyu Murenge abaturage batangiye kwiteza imbere.

Nyagatare: Muri Musheri baravuga imyato ubuyobozi bwiza bwabahaye umuriro w’amashanyarazi

Abaturage batuye mu Murenge wa Musheri barashimira ubuyobozi bwiza burangajwe imbere na Perezida Paul Kagame bwabagejejeho umuriro ubu bakaba bakomeje ibikorwa bibateza imbere.

Musonera Robert utuye mu Kagari ka Musheri, Umurenge wa Musheri akarere ka Nyagatare avuga ko kuva umuriro wahagera amasaha yo gukora bayongereye kandi bikaba bikomeje kubateza imbere.

Musonera yagize ati “Imyaka igiye kuzura itatu tugejejweho umuriro w’amashanyarazi, n’igikorwa cyadufashije cyane ku buryo n’inzira y’iterambere twatangiye tubifashijwemo n’ubuyobozi bwiza turimo kugenda tuyigeraho. Amasaha twakoraga ubu yariyongereye. Turakora kugeza mu ma saa tanu z’ijoro. Tutarabona umuriro byageraga saa kumi n’ebyiri twatangiye kwinjira mu buriri. Musonera akomeza avuga ko ibyo bamaze kugeraho byose babikesha ubuyobozi bwiza buhora bushaka icyateza imbere umuturage."

JPEG - 306.1 kb
Musheri mu karere ka Nyagatare na ho umuriro wamaze kuhagera

Yakomeje agira ati “ Ubu iterambere rigenda ritugeraho umuriro w’amashanyarazi, imihanda n’ibindi byose tubikesha ubuyobozi bwiza.”

Turimumahoro Prince akora ibikorwa by’Ubukorikori mu isantire(Centre) ya Musheri avuga ko umuriro ukimara kuhagera imirimo yiyongereye ndetse iterambere muri uyu Murenge iragaragara.

Turimumahoro yagize ati “ Kuva umuriro wagera hano ibikorwa bituma umuntu abona amafaranga byariyongereye cyane bitandukanye na mbere aho twabaga ducungira ku buhinzi gusa. Turizera ko mu minsi mike n’inganda nto zidufasha kongerera agaciro umusaruro wacu zizaba zamaze kugera hano.”

Ndagijimana Alphonse tuye mu kagari ka Musheri, Umurenge wa Musheri avuga ko kwegerezwa umuriro byatumye barushaho gutekereza ikintu cyabafasha kwihuta mu iterambere.

Yagize ati “N’umuhinzi ava guhinga yagera mu rugo agashaka uburyo yakomeza kwinjiza amafaranga. Hari aba baraguze imashinizi zifotora impapuro bagakorera amafara”.



Huye: muri Mukura ibikorwa byabo byagize agaciro nyuma yo kubona umuriro w’amashanyaraza

Nyuma y’aho muriro ugereye mu Murenge wa Mukura mu karere ka Huye ibikorwa by’abatuye muri uyu Murenge byagize agaciro.

Mujawiyera Liberée utuye mu murenge wa Mukura Akagari ka Rango A avuga ko umuriro utaragera muri uyu Murenge ikibanza cyaguraga amafaranga 20,000 ariko ubu ikibanza kirakabakaba miliyoni n’igice y’amafaranga y’u Rwanda.

Mujawiyera yagize ati “Aka gace katarageramo umuriro wasangaga abantu bafite ubutaka babuhendahendera abafite amafaranga wamuha 20 akaba ari ayo ariko ubu udafite amafaranga agera kuri miliyoni n’Igice ntacyo wabona. Muri aka gace kandi ntabwo wabaga wahabona imodoka ariko ubu muri Mukura hasigaye hagera tagisi.”

Nk’uko Liberée akomeje abivuga ngo imibereho y’abatuye muri aka gace bwari ubuhinzi gusa ariko ubu basigaye bafite imirimo myinshi ibinjiriza amafaranga. Uwayezu Jeannette ni umucuruzi u murenge wa Mukura mu karere ka Huye avuga ko kubegereza umuriro byabakijije ubukene kuko barushijeho gukora amasaha menshi.

Yagize ati “Kuva umuriro wagera hano turakora kugera saa yine z’ijoro andi hari nabarenza izi saha bakageza mu ma saa sita z’ijoro.”

Uwayezu avuga ko umuriro babonye wabakijije umugogoro wo guhora birukankana telephone bajya gushakisha umuriro mu mujyi wa Huye.

Kwegerezwa umuriro w’amashanyarazi byatumye babasha kwihangira imirimo

Ngirababyeyi Providence atuye mu murenge wa Mukura avuga ko guhabwa umuriro byatumye babasha kwihangira imirimo.

Yagize ati “Guhabwa umuriro byatumye tubasha kwihangira imirimo abantu bamwe bafite amabarizo abandi bafite Salon zo kogosha n’ibindi bikorwa bibaganisha ku iterambere.”

Mbere y’umwaka 1994 umuriro w’amashanyarazi wayasangaga mu mujyi ikomeye nayo Atari yose naho mu bice by’icyaro kugerwaho n’umuriro babyumvaga nk’umugani.

JPEG - 177.8 kb
Ibikorwa byo kongera umuriro w’amashanyarazi byakomeje kwiyongera
 

Comments

pre-moderation

This forum is moderated before publication: your contribution will only appear after being validated by an administrator.

Who are you?
Your post
  • To create paragraphs, just leave blank lines.

 
 
Rubavu:Abavunjayi barataka igihombo baterwa n’abamamyi
Rubavu:Abavunjayi barataka igihombo baterwa n’abamamyi

Amashyirahamwe y’abakora akazi ko kuvunja amafaranga y’amanyarwanda n’amanyamahanga mu karere ka Rubavu, barataka ko baterwa igihombo n’abakora uyu murimo mu buryo butemewe n’amategeko, bita (...)

U Rwanda mu nzira zo kuvumburwamo amabuye ya Nickel n’Amabengeza
U Rwanda mu nzira zo kuvumburwamo amabuye ya Nickel n’Amabengeza

Ihuriro nyarwanda ry’Abacukuzi b’Amabuye y’Agaciro ryatangaje ko mu Rwanda hagaragaye ibimenyetso by’amabuye y’agaciro yitwa Nickel n’amabengeza. Mu muhango wo kwizihiza umunsi mpuzamahanga (...)

Abacukuzi  b’amabuye y’agaciro bafite imbogamizi zo kubona inguzanyo
Abacukuzi b’amabuye y’agaciro bafite imbogamizi zo kubona inguzanyo

Abacukuzi b’amabuye y’agaciro mu Rwanda bavuga ko bafite imbogamizi zo kubona inguzanyo z’amabanki muri uwo murimo ngo babashe kuwukora neza. Ibi babitangarije mu muhango wo kwizihiza umunsi (...)

Hafashwe toni 7 za caguwa zinjizwaga mu Rwanda ari magendu
Hafashwe toni 7 za caguwa zinjizwaga mu Rwanda ari magendu

Ishami rya Polisi y’u Rwanda rishinzwe kurwanya magendu n’inyerezwa ry’imisoro (RPU), rifatanyije n’ikigo cy’igihugu cy’imisoro n’amahooro (RRA), bataye muri yombi abantu 3 bakekwaho kwinjiza ibiro (...)

Abavuzi gakondo bagiye gushinga uruganda rw’imiti na banki
Abavuzi gakondo bagiye gushinga uruganda rw’imiti na banki

Abavuzi bo mu Rwanda no mu bindi bihugu bya Afurika y’Uburasirazuba, bibumbiye mu Muryango Mugari w’Abavuzi Gakondo, UMUAGA, batangiye kwiga ku mishinga ikomeye y’igihe kirekire irimo ibitaro (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.