2017-08-20 07:43:19 clouds 27o High | Kigali Rwanda

Dukurikire:
 
 

Abahinzi b’icyayi mu Rwanda bamaze igihe baryoherwa n’umusaruro wacyo

Yanditswe na IMVAHO NSHYA

Kuya 2017-06-23 06:24:44

 
Share on:
 
Yasuwe:101
 
Yavuzweho:200
 
10
 
10

Impuzamahuriro y’amakoperative y’abahinzi b’icyayi mu Rwanda (FERWACOTHE) irashimira Guverinoma y’u Rwanda yashyizeho imikorere ifasha abahinzi n’inganda z’icyayi kuryoherwa n’umusaruro uva ku isoko mpuzamahanga.

FERWACOTHE ifite amahuriro atanu mu gihugu kandi buri huriro riba rifite koperative enye, keretse iry’Amajyaruguru rifite koperative eshatu, ku buryo mu gihugu hose habarurwa koperative 19 zirimo abahinzi b’icyayi barenga ibihumbi 44.

Amahuriro akusanya raporo mu makoperative y’abahinzi b’icyayi akazishyikiriza ubuyobozi bwa FERWACOTHE ari na yo muhuza mukuru w’Abahinzi b’icyayi, inganda n’inzego za Leta n’iz’abikorera mu Rwanda.

Perezida wa FERWACOTHE Karamaga François, avuga ko bagira uruhare rukomeye mu guhuza ibikorwa by’abahinzi n’ibya koperative, zigakorana neza n’izindi nzego nk’ Urwego rushinzwe amakoperative mu Rwanda (RCA), NAEB n’izindi.

Yagize ati “Koperative zose zifite ubuzima gatozi, nta koperative za baringa tugira; ariko ikindi nta muhinzi w’icyayi udafite koperative abarizwamo ari na ho hanyuzwa umusaruro we n’amafaranga yishyurwa icyayi cye kimaze kugurishwa.”

Yakomeje ashimangira ko kuri ubu amafaranga ava mu cyayi akagera ku makoperative yiyongereye cyane ko bavuye ku kuba abahinzi gusa bahinduka n’abanyamigabane b’inganda Leta yeguriye abikorera. Ahenshi usanga bafite imigabane 10% ndetse hari n’aho bageze ku migabane 45%.

Abahinzi b’icyayi bahamya ko mbere bahendwaga cyane kuko icyayi cyose cyaguraga igiciro kimwe. Icyayi cy’amababi cyaguraga amafaranga y’u Rwanda 37 kirazamuka kigera ku ijana mu gihe abahinzi bari batarashyirirwaho uburyo bajya babona ku nyungu.

Leta y’u Rwanda yaje kumva ikibazo cy’abahinzi ibereka ko kimwe n’inganda bagemurira bafite uruhare rukomeye mu kohereza icyayi cyiza ku isoko mpuzamahanga, bityo bakwiye kujya basaranganya ntawuryamiye undi.

Karamaga ati “Abahinzi bacu barishimiye, igiciro kimeze neza. Mu nganda dufite 15, inganda enye ni zo zitageza ku mafaranga y’u Rwanda 200 ku kilo cy’amababi ariko ni zo zigira icyayi cyinshi ku buryo zungukira mu bwinshi bwacyo. Uyu munsi turakorana neza n’abanyenganda nta kibazo.”

Mu nyungu ibonetse muri buri gihembwe, harebwa impuzandengo yabonetse maze 40% igatwarwa n’abahinzi na ho inganda zigatwara 60% byayo.

Icyayi cyazamuye ubukungu bw’aho gihingwa

Ubuyobozi bwa FERWACOTHE bwishimira kuba kwibumbira mu makoperative byafashije abahinzi b’icyayi n’abagituriye kuzamura ubukungu no kwiyubakira ibikorwa birambye bibafasha mu buzima bwabo bwa buri munsi.

Kuri ubu nta muhinzi w’icyayi n’umwe uhemberwa mu ntoki, bose bahemberwa mu bigo by’imari birimo SACCO umunani zubatswe na koperative z’aba bahinzi.

Karamaga ati “Umuhinzi wese igihe afite ikibazo ashobora kujya muri SACCO akagurizwa amafaranga, yaba ari ayo kurihira umwana ishuri, yaba ari ayo kwiyubakira inzu, kwishakira itungo no kwimara ubundi bukene bwose.

Na none kandi koperative zose mu gihugu zagiye ziyubakira ibiro bigezweho zikoreramo ndetse n’ibikoresho bigezweho birimo za mudasobwa,mu guca gukorera munsi y’ibiti, ndetse zigura imodoka zitwara umusaruro wazo ku nganda.

Abahinzi b’icyayi bishyiriyeho ikigega cy’ifumbire ku buryo batagitegereza inzego za Leta ngo zibatumirize iyo bakoresha mu mirima yabo y’icyayi. Muri iki kigega buri muhinzi ashyiramo umusanzu we buri kwezi, akagezwaho ifumbire akeneye ku gihe hatabayeho gutegereza imyanzuro ya Minisiteri runaka.

Karamaga yakomeje agira ati “Kera twasabaga Minisiteri y’Ubuhinzi n’Ubworozi (MINAGRI) kutugurira ifumbire, ariko ubu byabaye amateka ntabwo tukibikora; ubu koperative ziragerageza kwigira zishakamo ibisubizo.”

Ikindi cy’ingenzi cyishimirwa mu guteza imbere ubukungu bw’abahinzi b’icyayi ni uko koperative zibasha gushora imari no mu yindi mishinga nko mu masoko yubakwa mu gihugu, kugura imigabane mu mabanki no mu bigo by’imari nto n’iciriritse, kwagura serivisi zidashamikiye ku cyayi n’ibindi.

Abahinzi n’abaturiye icyayi babayeho neza

Uretse kubaka ibigo by’imari n’ibiro, hari koperative ziyubakiye amashuri yigamo abana b’abahinzi n’abaturiye icyayi, kimwe n’amavuriro atuma bakora bafite ubuzima bwiza.

Abahinzi b’icyayi aho bari hose baba intangarugero mu gutanga ubwisungane mu buvuzi kuko batangira kwizigama mu kwezi kwa mbere k’umwaka w’ubukungu bakazagera mu ntangiroz’undi mwaka buri wese yarizigamye amafaranga ahwanye n’abo agomba kwishyurira mituweli.

Abatagira isambu nini n’inka, borozwa inka mu kunganira gahunda ya Girinka Munyarwanda; FERWACOTHE yihaye intego ko bitarenze uyu mwaka wa 2017, nta muhinzi w’icyayi uzaba atoroye itungo ryaba irigufi cyangwa irirerire kuko atanga ifumbire y’imborera.

Koperative z’abahinzi b’icyayi zinafasha abarokotse Jenoside yakorewe Abatutsi, kubasanira cyangwa kububakira inzu hibandwa ku bahinga icyayi batishoboye n’abaturiye imirima gihinzeho.

JPEG - 76.1 kb
FERWACOTHE yagiye ihabwa ibihembo by’ubudashyikirwa n’inzego zitandukanye

Nubwo hari koperative ziyubakiye amashuri, izitarayubaka zitera inkunga ibigo by’amashuri bizegereye kugira ngo abana b’abanyamuryango n’abaturanyi babone uburezi bufite ireme, kimwe n’izitarubaka amavuriro zikabigenza uko.

Ubuyobozi bwa FERWACOTHE, burashima Leta idahwema kureba ibikwiriye abaturage nko kubafasha guhuza imbaraga no kubagira inama, kuko ari byo byatumye abahinzi b’icyayi babona inyungu zacyo bakaba batagihatirwa kugihinga.

Bityo abahinzi bahamya ko batindiwe n’itariki y’amatora ngo bashyigikire Paul Kagame watumye byose bigerwaho mu cyerekezo yahaye buri wese no kuba akunda cyane Abanyarwanda.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE