2017-08-19 07:41:08 clouds 27o High | Kigali Rwanda

Dukurikire:
 
 

2010-2017: Abacuruzi barishimira aho Kagame abagejeje

Yanditswe na IMVAHO NSHYA

Kuya 2017-05-10 15:40:04

 
Share on:
 
Yasuwe:288
 
Yavuzweho:200
 
10
 
10

Bamwe mu bacuruzi bo mu Mujyi wa Kigali, bavuga ko hari iterambere bamaze kwigezaho muri manda ya 2 ya Perezida Paul Kagame iri hafi gusozwa, babikesha inama ze.

Urugaga nyarwanda rw’Abikorera, PSF, rwo rutangaza ko ishingiro ry’iterambere ry’abacuruzi rituruka ku kuba u Rwanda rufite Perezida wumva ubucuruzi.

Uwiragiye Myriam akorera ubucuruzi mu isoko rya Nyarugenge mu Mujyi wa Kigali, avuga ko yatangiye ubucuruzi bw’imitako n’ibindi byose bijyana no kwambika abageni akiri muri Kaminuza mu mwaka wa gatatu kubera impanuro n’inama yajyaga yumva mu mvugo zitandukanye za Perezida Kagame.

Ati “Kuri Jye, Perezida Kagame ni ejo heza hanjye, ni umutekano wanjye, mbaho nta bwoba, sinibaza ngo ejo ndabyuka nsange ibintu byazambye nta ho gusohokera, kuba ndi hano nkora ubu bucuruzi ndabimukesha kuko kenshi yakanguriye urubyiruko kwihangira imirimo, ibi nabigendeyeho ntangira ubucuruzi nkiri mu wa 3 wa Kaminuza ubu narangije umwaka wa 4 mu icungamari kandi niyumvamo gukomeza kuba rwiyemezamirimo wiyemeje guharanira iterambere.”

JPEG - 120.2 kb
Benjamin Gasamagera, Umuyobozi mukuru w’urugaga rw’abikorera mu Rwanda (Foto Kayitare J. P)

Uyu mukobwa w’imyaka 25 akomeza ahanura bagenzi be bashobora kuba bararangije amashuri.

Ati ”Hari abakobwa nkanjye bumva ko bahitamo kwikorera kuruta gutekereza akazi ko mu biro, abo ndabasaba rwose gutinyuka bakumva ko akazi atari uko wicaye muri biro, nanjye naratangiye kandi ndi ahashimishije.”

Aboneraho kubwira urubyiruko muri rusange ko amahirwe ahari bagomba kuyabyaza umusaruro, ati ”Leta yashyizeho ikigega BDF kugira ngo urubyiruko rufite ikibazo cy’ingwate rubashe kugera ku nguzanyo byoroshye aho basabwa gusa 25% by’ingwate asigaye 75% Leta ikabishingira.”

Undi mucuruzi ukorera muri Mateus we atangaza ko icyo yishimira muri iyi manda ya 2 Perezida Kagame ari hafi gusoza ari iyoroherezwa mu kwishyura imisoro hakurwaho inzitizi zabatwaraga igihe.

Ati “Nishimira kandi mushimira ko imiyoborere myiza ye yatumye nk’abacuruzi ubu hifashishijwe ikoranabuhanga twishyura imisoro umuntu bitamusabye guhaguruka aho ari, nkoresha telefoni yanjye byose bigatungana bitewe na E-banking amafaranga nkayohereza kuri konti y’Ikigo cy’imisoro n’amahoro mu gihe mbere byadusabaga kujya gutonda ku kigo cy’imisoro n’amahoro bikadutwara umwanya munini.”

Uyu mucuruzi kandi avuga ko muri rusange inzitinzi ku bucuruzi zakuweho. Ati “Mbere wajyaga kuzana umuzigo uvuye hanze ukagenda kuri Magerwa igihe cy’ibyumweru bibiri ariko ubu umunsi umwe, ibiri ntirenga utawuvanyeyo. Ibi mu bucuruzi bivuze inyungu kuko biduha umwanya wo gucuruza ku gihe bikanaba imvano y’inyungu tubona.”

Umuyobozi Mukuru (Chairman) w’urugaga nyarwanda rw’Abikorera, PSF, Gasamagera Benjamin, avuga ko ishingiro ry’iterambere ry’abacuruzi rituruka ku kuba u Rwanda rufite Perezida wumva ubucuruzi.

Yagize ati ”Ni amahirwe kuba u Rwanda ruyobowe na Perezida Kagame, yumva ubucuruzi. Ibi ni na byo shingiro ry’iterambere ry’urugaga rw’abikorera n’abikorera.”

Avuga ko u Rwanda ruri mu cyerekezo cyiza cy’aho ubukungu buyobowe n’abikorera , bikaba “bivuze iterambere ry’ubukungu rishingiye ku bikorera, bishingiye kandi ku mahirwe ahari yorohereza ishoramari bitera abikorera gukomeza gukorera mu bukungu busangiwe, ni ukuvuga abakire mu bakire.”

Uyu muyobozi kandi anavuga ko nta ko bisa kuba muri ubwo bukungu, ati ”Birumvikana iyo uteye imbere mu bandi nabo bateye imbere biba byiza cyane. Ibi biruta kuba umukire mu bakene ari na yo mpamvu nk’urugaga dukomeje gukangurira abikorera kuzamukira hamwe biteza imbere.”

Asoza asaba abikorera kurushaho guharanira ko ingano y’ibyoherezwa ku masoko yo hanze yiyongera. Ati ”Birumvikana iyo ibyoherezwa hanze byiyongereye kuruta ibihatumizwa, aba ari iterambere. Amafaranga asohoka ku bicuruzwa aba make ugereranyije n’ayinjira imbere mu gihugu.”

Gasamagera yizeza abikorera ko urugaga nyarwanda rw’Abikorera ruzakomeza kurushaho kubashyigikira harebwa icyatuma bakomeza gutera imbere.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE