2017-08-22 09:34:31 clouds 27o High | Kigali Rwanda

Dukurikire:
 
 

Hoteli yitegeye imisozi, ibiyaga n’ibirunga by’u Rwanda yahogoje ba mukerarugendo

Yanditswe na IMVAHO NSHYA

Kuya 2017-05-30 06:52:26

 
Share on:
 
Yasuwe:165
 
Yavuzweho:200
 
10
 
10

Lake Ruhondo Lodge and Tented Camp ni hoteli iherereye mu murenge wa Gashaki mu karere ka Musanze, mu birometero 20 uvuye mu mujyi wa Musanze kugera ku Rugomero rwa Ntaruka hafi n’Ikigo cya Nkumba.

Iyo ugeze ku rugomero rwa Ntaruka uhamagara kuri hoteli ukohererezwa ubwato bwambuka amazi mu gihe kiri hagati y’iminota 10 na 15 wumva akayaga, amafu, amahumbezi atuma ugerayo wiyumva neza usize amavunane ku nkombe.

Kugenda mu bwato ni serivisi yihariye kuko iyo uri mu kiyaga cya Ruhondo werekeza kuri hoteli ubona ikirere giteye amabengeza bitewe n’uko uba witegeye imisozi, n’ibirunga bigaragaza ibicucu byabyo mu mazi y’ikiyaga cya Ruhondo n’icya Burera kikiri hejuru; bimwe mu birunga bikunda kugira urubura hejuru yabyo ku buryo binezeza ababireba.

JPEG - 98 kb
Kuri Hoteli usasanga amafunguro anyuranye arimo n’ifi yarobwe mu kiyaga cya Ruhondo

Zimwe mu zindi serivisi zihatangirwa harimo izisanzwe zitangirwa mu mahoteli, gukodesha ibyumba byo kuraramo, kugaburira abakiriyano kubaha umwihariko wo kuruhukira mu mwuka karemano.

Hari amacumbi y’ ibyumba 12 byakira umukiriya wese aho yaba avuye hose, n’amahema 10 abambye ku nkengero z’Ikiyaga cya Ruhondo. Aya mahema akundwa cyane na ba mukerarugendo n’abari mu kwezi kwa buki kuko yitegeye ikiyaga aho bashobora kumva ubuhehere bw’ijoro n’amajwi y’urusobe rw’ibinyabuzima biba mu busitani no mu mazi.

Seth Tumusiime Umuyobozi wa Lake Ruhondo Lodge and Tented Camp yagize ati “Amahema ashinze neza, afite umutekano n’isuku kandi nta bikururanda byagusangamo. Hoteli yacu ntabwo ari nini ariko ikora neza kuko ifite umwihariko w’abayigana barimo ba mukerarugendo, abavuye mu bukwe bagiye mu kwezi kwa buki, inama z’umwiherero zifasha abantu kureba imikorere y’ibigo byabo nta kibavunda.”

JPEG - 493.3 kb
Uraye muri aya mahema yegereye ku mazi ahakura ubunararibonye budasanzwe bw’ibyiza bitatse u Rwanda

Icyumba cy’inama cyakira abantu 200 bicaye neza, aho abakigana baba bahumeka umwuka karemano. Hari umwihariko w’ibyo kurya birimo ifi iryoshye yarobwe mu kiyaga cya Ruhondo ikurura abakiriya n’abayiriyeho bose bagahora bagaruka.

Lake Ruhondo Lodge and Tented Camp ni hoteli imaze imyaka itanu ariko abayigannye bose bataha bayirahira kuko bahakura ubunararibonye n’amateka menshi y’ibyiza bitatse u Rwanda ku giciro kinogeye buri wese.

JPEG - 656.6 kb
Seth Tumusiime Umuyobozi wa Hoteli Lake Ruhondo Lodge & Tented Camp

LAKE RUHONDO LODGE AND TENTED CAMP IYOBOWE N’INZOBERE

Seth Tumusiime, ni Umunyarwanda wishimira cyane amahirwe ya buruse yahawe na Leta y’u Rwanda ikanamufasha kuminuza mu bijyanye n’amahoteli n’ubukerarugendo.

Tumusiime afite icyiciro cya gatatu cya kaminuza mu by’amahoteli n’ubukerarugendo (MBA) yakuye muri kaminuza ya Les Roches International School of Hotel Management yo Busuwisi, nyuma yo kwiga icyiciro cya kabiri muri kaminuza yitwa Kenya Utalii College mu mujyi wa Nairobi muri Kenya na none mu bijyanye n’amahoteli n’ubukerarugendo.

JPEG - 700.6 kb
Hoteli ifite amacumbi y’akataraboneka kandi ari ahantu hatuje hegereye amazi

Afite ubunararibonye buhambaye muri uyu mwuga kuko yakoze mu mahoteli atandukanye yo mu Rwanda, mu bihugu yizemo ndetse no muri Afurika y’Epfo .

Yagize ati “Ni amahirwe nkesha imiyoborere myiza y’igihugu cyacu. Iyo mbyibutse bintera imbaraga zo gukorera, gukunda u Rwanda no kurugirira ishyaka cyane kuko nize mu ishuri ryiza kandi mpabwa ubumenyi bw’ikirenga.”

Ubu bumenyi bwatumye azahura imitangire ya serivisi ya zimwe muri hoteli yakoreye mu Rwanda, akaba yaratanze ubumenyi mu mahoteri yose mu gihugu mu gihe yamaze akora mu Kigo cy’igihugu gishinzwe imyuga n’ubumenyingiro (WDA) aho we n’abo bakoranaga bahuguye abakozi b’amahoteli yo mu gihugu hose.

Ahamya ko Lake Ruhondo Lodge and Tented Camp iri mu nzira zo ku menyekana mu ruhando mpuzamahanga kubera umwihariko wayo n’udushya twa serivisi ziharangwa zahogoje abayigana biganjemo abanyamahanga.

JPEG - 6.7 Mb
Mbere yo kugera kuri Hoteli ufata urugendo rw’iminota igera kuri 15 mu mazi

Ati “Uko Lake Ruhondo and Tented Camp imeze, abakiriya benshi tubona ni abanyamahanga, abazungu bari mu bushakashatsi, abaje mu gusura ingagi n’abari mu mirimo itandukanye irimo no kwiga byimbitse imiterere n’iterambere by’u Rwanda.”

Yakomeje asaba Abanyarwanda gukunda ibyiza by’u Rwanda kurusha guharara gutembera amahanga kuko uyasigira ubukungu bwakabaye bugufasha gusobanukirwa n’igihugu cyakubyaye, amateka n’umurage wacyo.

Yagize ati “Ujya gutera uburiza arabwibanza, kandi burya baravuga ngo uwambaye ikirezi ntamenya ko cyera. Aho kugira ngo ujye gutanga akayabo i Dubai n’ahandi, byaruta ko wamarayo igihe runaka ikindi ukakimara mu Rwanda.”

Yakomeje ashimangira ko utinyutse gutembera u Rwanda abona ibyiza byinshi birenze agaciro k’ibyo atakazaho amafaranga y’umurengera, kandi yakirwa na hoteli z’akataraboneka nka Lake Ruhondo Lodge and Tented Camp n’izindi.

JPEG - 77.2 kb
Uhasanga n’ibinyobwa bitandukanye

Lake Ruhondo Lodge and Tented Camp irateganya kwagura ibikorwa, kwimenyekanisha mu karere no ku isi hose, abayituriye ikarushaho kubagirira akamaro babona amasoko y’ibihingwa byabo, akazi, kwishyurira abatishoboye mituweli, minelivari ku bana babo n’ibindi.

Tumusiime arashimira ubuyobozi bw’u Rwanda burangajwe imbere na Nyakubahwa Perezida Paul Kagame budahwema guteza abana b’u Rwanda imbere, amajyambere akaba agaragarira buri wese mu mijyi no mu byaro ku buryo n’abanyamahanga barusha benshi kuyasonanurira abatayazi.

JPEG - 57.8 kb
Uri kuri Hoteli aba yitegeye ibiyaga by’impanga n’ibirunga
atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE