2017-12-13 06:59:31 clouds 27o High | Kigali Rwanda

Dukurikire:
 
 

Leta yijeje ubwishingizi mu bigo bimwe horoherezwa abafite ubumuga

Yanditswe na IMVAHO NSHYA

Kuya 2017-12-05 06:54:09

 
Share on:
 
Yasuwe:144
 
Yavuzweho:200
 
10
 
10

Nyuma y’uko Inama y’igihugu y’abafite ubumuga (NCDP) igaragaje ikibazo kibangamiye abafite ubumuga kijyanye no kuba batabasha kubona insimburangingo n’inyunganirangingo kubera ubushobozi buke kandi zikaba zihenze, Leta yabijeje ubwishingizi mu kwivuza mu bigo bitandukanye.

JPEG - 240.9 kb
Insimburangingo n’inyunganirangingo zitezweho kwiyongera ku isoko mu buryo buhendukiye abafite ubumuga kugira ngo zibunganire

Umunyamabanga wa Leta ushinzwe imibereho myiza y’abaturage muri Minisiteri y’Ubutegetsi bw’Igihugu Dr Mukabaramba Alivera, avuga ko abafite ubumuga bari mu bwishingizi butandukanye ikibazo gisigaye mu bwisungane mu kwivuza ku nsimburangingo n’inyunganirangingo.

Avuga ko ibyo byuma bihenda, agatangaza ko aho ikigo gikora inyunganirangingo n’insimburangingo cya Gahini kibarizwamo ibyo bikoresho gitangiriye bizatuma bijya ku isoko ari byinshi kandi bimeze neza, bihendutse kandi na mituweli ishobora kubyishyura, cyane ko ibiganiro byarangiye hagati y’icyo kigo na Minisiteri y’Ubuzima (MINISANTE).

Dr Mukabaramba atangaza ko atari ikigo cya Gahini gusa kizakorana na mituweli ku bijyanye no kwita ku bafite ubumuga gusa kuko hari n’ikigo cya HVP Gatagara n’ikindi cya Rilima gitanga serivisi zo kubaga kikanagorora ingingo.

Perezida w’Inama y’igihugu y’abafite ubumuga (NCPD) Niyomugabo Romalis, avuga ko ikizere gihari cy’uko abafite ubumuga bazashyira bakabona ibyangombwa byose bagenerwa n’amategeko kuko Leta igaragaza ubushake n’ubwitange mu gushyira imbere inyungu z’umuturage.

Avuga ko Leta yashoboye kubishyira mu Itegeko Nshinga ryayo mu ngingo ya 51 igaragaza ko mu bushobozi bwayo izunganira abantu bafite ubumuga bikaba bigaragaza ikizere, akavuga ko ikibazo abafite ubumuga babona ari ubushobozi bwa Leta butaragera ku 100% mu gukemura ibyo bibazo kandi ibyifuzo by’abafite ubumuga bigenda byaguka ukurikije uko iterambere rigenda riza. Ngo ikiza ni uko Leta ifite ubushake n’ubushobozi buzagenda bwiyongera bizagenda bikemuka.

Agira ati “Ikibazo kiremereye abafite ubumuga ni ukuba batabasha kwivuza, kubona insimburangingo n’inyunganirangingo hifashishijwe ubwisungane magirirane nka bumwe mu butunzwe n’umubare munini w’abanyamuryango ba NCDP tukaba twifuza ko RSSB yajya yorohereza ibitaro by’uturere kubona inyunganirangingo n’insimburangingo tukabihafatira nk’uko amategeko abiteganya”.

Niyomugabo atangaza ko insimburangingo n’inyunganirangingo kuko zikenerwa mu byiciro bitandukanye ibiciro biri hejuru y’ubushobozi ari na yo mpamvu basaba ibigo bishinzwe izo serivisi ko bikwiye kuba byinshi zikaboneka ku isoko ari nyinshi n’igiciro kikagabanuka.

Batete Denise, umunyamuryango w’ubumwe nyarwanda bw’abatabona (RUB), avuga ko yumva ubushobozi butaragera ku gipimo gikemura burundu ibibazo by’abafite ubumuga, ariko asaba ko ubufasha buboneka bwajya buhabwa abo bugenewe ntibuhere mu kabati. Yifuza ko nk’uko hari abasaba insimburangingo n’abatabona batekerezwaho ku nsimburangingo zabo nk’abatabona babonerwa inkoni zera bakanazibigisha.

Ibyo binashimangirwa na Mukeshimana JMV, umuyobozi w’ikigo gishinzwe guhugura abafite ubumuga bwo kutabona cya Masaka, uvuga ko insimburangingo cyangwa inyunganirangingo ku batabona ari inkoni zera zikaba zashyirwa mu bitangwa mu bwishingizi kuko zihenda cyane no mu Rwanda zikaba zitahaboneka ziva hanze.
Agira ati “Imwe na yo yo ku rwego rwo hasi igurwa amadolari y’Amerika 20, hakaba izigurwa amadolari 60 kuzamuka”.

Avuga ko hashingiwe ku bushobozi bwa Leta buhari, inyunganirangingo n’insimburangingo zigenda ziboneka nubwo atari ku kigero kifuzwa, akifuza ko mu mbaraga zashyizwe mu kwita ku bafite ubumuga mu myaka 23 ishize, muri gahunda y’iterambere rigamije impinduka bakwiye kwitabwaho cyane n’ibisigaye bikabasha kubona ibisubizo.

Umunsi mpuzamahanga wahariwe abafite ubumuga washyizweho n’Umuryango w’abibumbye mu 1992. Mu Rwanda uwo munsi ukaba wizihizwa ku nshuro ya 20 ndetse n’imyaka 10 rushyizeho itegeko rirengera abafite ubumuga. Kuri iyi nshuro uwo munsi ukaba wari ufite insanganyamatsiko igira iti: “Impinduka ziganisha ku iterambere rirambye kandi ridaheza”.

SEZIBERA ANSELME

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE