2017-12-11 14:03:29 clouds 27o High | Kigali Rwanda

Dukurikire:
 
 

U Rwanda rwahawe miliyari 104 yo kongera amashanyarazi

Yanditswe na IMVAHO NSHYA

Kuya 2017-12-05 06:39:59

 
Share on:
 
Yasuwe:86
 
Yavuzweho:200
 
10
 
10

Banki y’Isi yahaye u Rwanda inguzanyo y’amadolari y’Amerika miliyoni 125, ni ukuvuga agera kuri miliyari 104 z’amafaranga y’u Rwanda, yo guteza imbere ibikorwa na serivisi byo kugeza amashanyarazi ku baturage mu mwaka w’ingengo y’imari 2017/2018.

JPEG - 118.6 kb
Minisitiri w’Imari n’Igenamigambi Amb. Claver Gatete (Iburyo) naYasser El-Gammal uhagarariye Banki y’Isi mu Rwanda bashyira umukono ku masezerano y’inguzanyo (Foto James R.)

Ni ikiciro cya mbere k’inguzanyo yose Banki y’Isi yemereye u Rwanda mu myaka itatu iri imbere ingana na milyoni 325 z’amadolari ya Amerika, agera kuri miliyari 271 z’amafaranga y’u Rwanda yo guteza imbere urwego rw’ingufu mu Rwanda.

Minisitiri w’Imari n’Igenamigambi, Amb. Claver Gatete washyize umukono ku masezerano hagati ya Guverinoma y’u Rwanda na Banki y’Isi, ejo hashize tariki ya 4 Ukuboza 2017, yavuze ko ayo mafaranga agiye gutuma gahunda ya Leta yo kugeza amashanyarazi ku baturage igerwaho mu myaka irimdwi iri imbere.

JPEG - 120.9 kb
Iburyo ni umunyamabanga wa Leta muri MININFRA Eng. Kamayirese Germaine, na Eng. Maj. Kalisa Jean Claude uyobora EUCL (Foto James R.)

Ati “Aradufasha kugira ngo tubone amashyanyarazi, ubu amaze kurenga ku kigero cya 40%, ariko na none n’amashuri, amavuriro; birafasha inganda zacu, cyane cyane ku zikora ibikorerwa mu Rwanda nk’iziri mu byanya by’inganda zikeneye amashyanyarazi arenzeho.”

Yasobanuye ko ayo mafaranga ari ku nyungu ya 0.75% kandi azishyurwa mu myaka 38 hariho igihe kitishyurwa k’imyaka itandatu uhereye igihe asinyiwe.

Umuyobozi mukuru w’ishami ritunganya rikanatanga amashanyarazi (EUCL) mu kigo k’Igihugu k’Ingufu (REG), Eng. Maj. Kalisa Jean Claude, yavuze ko iyo nguzanyo yo mu myaka itatu izatuma u Rwanda ruva ku gipimo kirenga 40% ruriho rukarenza 70% muri iyo myaka itatu.

Ati “Dufite gahunda aho Abanyarwanda bose bazaba babonye amashyanyarazi yaba ayo ku ngomero cyangwa akomoka ku mirasire y’izuba, ariko muri iyo myaka itatu tuzaba twararenze ku gipimo cya 70%.”

Umunyamabanga wa Leta ushinzwe amazi n’ingufu muri Minisiteri y’Ibikorwa remezo, Eng. Kamayiresi Germaine, yasobanuye ko gahunda irambuye ya Guverinoma ari uko mu myaka irindwi Abanyarwanda bose bazaba bagerwaho n’amashyanyarazi ahoraho.

Ati “Ubu dusigaranye 60% yo kugeraho, ni ibintu dushaka kugeraho dukoresheje uburyo dusanzwe dukoresha ku mirongo migari ndetse n’uburyo bw’imirasire y’izuba.
Tukaba twifuza ko nubundi ayo mashyanyarazi dukwirakwiza aboneka mu buryo burambye, adacikagurika, afite ingufu zihagije, ndetse ari ku giciri umunyarwanda wese yabasha kwishyura ndetse n’inganda zabasha kwishyura.”

Uhagarariye Banki y’Isi mu Rwanda, Yasser El-Gammal, yavuze ko ari ugufasha gahunda ya Guverinoma yo kongera abagerwaho n’amashanyarazi mu buryo buboroheye kandi buhoraho. Yashimye ko ingufu z’umuriro mu Rwanda zavuye kuri megawati 76 mu 2010 zigera kuri 213 muri Kamena 2017 n’ibigo bya Leta bitandukanye bibona amashanyarazi.

MUTUNGIREHE SAMUEL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE