2017-12-13 09:46:30 clouds 27o High | Kigali Rwanda

Dukurikire:
 
 

Kigali: Kagame yitabiriye siporo asaba ko igihe cyayo cyongerwa

Yanditswe na IMVAHO NSHYA

Kuya 2017-12-04 07:16:24

 
Share on:
 
Yasuwe:140
 
Yavuzweho:200
 
10
 
10

Perezida Paul Kagame na Madamu we Jeannette Kagame bitabiriye igikorwa cya siporo rusange ngaruka kwezi yabaye ejo hashize ku itariki ya 03 Ukuboza 2017, aho Perezida Kagame yasabye abategura iyi siporo kongera amasaha kugira ngo irusheho gutanga umusaruro ku banyarwanda.

JPEG - 405.6 kb
Perezida Paul Kagame (uwa 3 uturutse ibumoso), akurikiwe na Madamu Jeannette Kagame na Minisitiri w’Ubuzima Dr Diane Gashumba, naho uwa 2 uvuye ibumoso ni Minisitri w’Umuco na Siporo Uwacu Julienne bari muri siporo

Nk’uko byasobanuwe na Minisitiri w’Umuco na Siporo, Uwacu Julienne, yavuze ko Umukuru w’Igihugu yitabiriye siporo rusange ngaruka kwezi akaba ari na yo ya nyuma ibaye mu mwaka wa 2017 mu rwego rwo kugaragariza abantu bose ko n’ubwo akazi kaba ari kenshi bakwiye gushaka umwanya wa siporo. Perezida Kagame kandi yasabye ko amasaha ya siporo yakongerwa.

Minisitiri Uwacu akomeza agira ati “Perezida yashimye iki gikorwa cya siporo, ashimira ko abantu bakitabira, ashimira na kiriya gikorwa cyo gupima indwara abaje muri siporo kugira ngo bamenye uko ubuzima bwabo buhagaze, hanyuma aranatubwira ngo amasaha yo kubikora tuyongere turusheho gutanga umwanya uhagije ku bantu bayitabira yaba hano i Kigali ndetse n’ahandi hose mu gihugu”
Uwacu kandi yakomeje agira ati “Ni ibintu twishimiye cyane uretse ko n’ubundi tubizi ko asanzwe akunda siporo, ariko ubu buba ari n’ubutumwa ahaye abataraza ngo bamenye ko bahombye, bakwiye gukora uko bashoboye mu mirimo myinshi bagira bakabona n’umwanya wo gukora siporo kuko ituma tugira ubuzima bwiza.

JPEG - 356.5 kb
Siporo rusange iba rimwe mu kwezi mu Mujyi wa Kigali, ikitabirwa n’abantu benshi baba baturutse mu bice byose by’umugi

Perezida Kagame na Madamu we basanzwe bifuza gukorana n’Abanyarwanda mu bikorwa bitandukanye, kuba baje rero gufatanya na bo muri siporo ni ukubabwira ngo mu nshingano nyinshi Umukuru w’Igihugu n’umuryango we bagira, ariko kuba babona umwanya bakifatanya n’abantu muri siporo, bivuze ko n’abandi bose bakwiye kubikora.”

Bamwe mu bitabiriye iyi siporo rusange batangarije itangazamakuru ko banejejwe cyane no kuba ari igikorwa kimaze gushinga umuzi kandi kikaba gitanga umusaruro ku buzima bwabo ndetse by’umwihariko banashima kuba Perezida wa Repubulika yaje kwifatanya na bo akanabasabira kongererwa igihe.

Murigande Fred (Uwitabiriye siporo) yagize ati “Twashimishijwe n’uko Umukuru w’Igihugu yifatanyije natwe muri siporo, twabonye ko iki gikorwa ari icy’agaciro kuko ubundi twabikoraga tubona ari ibisanzwe ariko ubu uyu munsi atugaragarije ko ari iby’agaciro.

Icyatunejeje na none ni uko yadusabiye ko bongera amasaha yo gukora siporo kuko siporo iradufasha cyane, nk’ubu imitsi yanjye yari yarahinamiranye cyane ariko ubu nshobora kugenda urugendo rurerure cyane, n’ahazamuka nshobora kuhagenda kandi ubundi nakoreshaga moto ngenda kuri moto ahantu hose.”

Iki gikorwa cya siporo rusange kinafatwa nk’umwanya wo guhura n’abantu batandukanye bagasabana, bakishima bakaruhukira hamwe nyuma y’uko baba bamaze iminsi mu mirimo itandukanye buri wese ahuze.

Siporo rusange imaze gushinga imizi mu banyarwanda by’umwihariko abanyakigali, iba buri ku cyumweru cya mbere cy’ukwezi, kuri uwo munsi kandi Abanyarwanda banafashwa gupimwa indwara zitandukanye zishobora gufata abantu binyuze mu kudakora siporo nka Diyabeti, umuvuduko w’amaraso, umutima n’izindi.

NIYONSENGA SCHADRACK

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE