2017-12-11 14:03:29 clouds 27o High | Kigali Rwanda

Dukurikire:
 
 

Mu minsi 16 yo kurwanya ihohoterwa hazaburanishwa imanza z’ihohoterwa

Yanditswe na IMVAHO NSHYA

Kuya 2017-11-27 05:58:00

 
Share on:
 
Yasuwe:20
 
Yavuzweho:200
 
10
 
10

Mu minsi 16 yo kurwanya ihohoterwa rikorerwa abana n’abagore, hateganyijwe ibikorwa binyuranye birimo no kuburanisha imanza z’abakekwaho icyo cyaha no gutanga ubwunganizi mu mategeko ku barikorewe.

JPEG - 223.5 kb
Nyirasafari Esperance, Minisitiri w’uburinganire n’iterambere ry’umuryango

Ibi ni ibitangazwa na Nyirasafari Esperance, Minisitiri w’uburinganire n’iterambere ry’umuryango ubwo yasobanuraga bimwe mu bikorwa biteganyijwe muri iyi minsi 16 yo kurwanya ihohoterwa.

Yagize ati “ Muri iyi minsi 16 iri mbere abakekwaho icyaha cyo guhohotera abandi bazacirwa imanza, ndetse n’abahohotewe bazahabwa ubufasha mu by’amategeko hirya no hino mu turere.”

Ibindi bikorwa Minisitiri yagarutseho ni ubutumwa mu biganiro bugamije kurwanya ihohoterwa rishingiye ku gitsina, gusobanurira abaturage amategeko ahana ihohoterwa.

Yagize ati “Gushyira imbaraga mu bukangurambaga bw’iminsi 16 ni uko ihohoterwa rishingiye ku gitsina ari ikibazo kibangamiye umutekano mu miryango, kikaba gishobora kugeza ku rupfu bamwe mu barikorerwa mu gihe kitarandurwa ngo gicike.”

Yagarutse ku byakozwe na Leta y’u Rwanda mu rwego rwo gukumira no kurwanya ihohoterwa rishingiye ku gitsina.

Yavuze ko hashyizweho Isange one stop Centre mu gihugu, zikaba zigeze kuri 44 mu turere tw’igihugu kandi zigatanga serivisi ku buntu.

Yakomeje atangaza ko harimo kubakwa laboratwari izafasha kubona ibimenyetso byizewe ku wahohotewe, bityo abanyabyaha bakagaragara kuko izatangira mu gihe kitarambiranye.

Makuza Bernard, Perezida wa Sena yagarutse ku bantu bahohotera abagore n’abana, aho yibajije ibibazo binyuranye yavuze ko bigomba gushakirwa ibisubizo na sosiyete y’Abanyarwanda.

Yagize ati “Ese aho abahohotera abagore n’abana, ubwo ntibaba baramaze kubambura uburenganzira bwabo bwo kubaho kandi neza? Ese ubwo baba bacyibuka ko uburenganzira bafite bungana n’ubwabo?”

Perezida wa Sena yaboneyeho umwanya wo gusaba Abanyarwanda, abagabo n’abagore, abakobwa n’abahungu guhagurukira rimwe bakarwanya ihohoterwa rishingiye ku gitsina, ahanini rikorerwa abakobwa n’abagore.

Ati “Iyo Abanyarwanda duhagurukiye ikintu nta kidusubiza inyuma, iyo duhagurukanye imbaraga zo kurwanya imico mibi, nta kabuza tubigeraho, ni mu cyo rero duhuze imbaraga mu kurwanya ihohoterwa rikorerwa abakobwa n’abagore ndetse n’abana.”
Umuyobozi w’Umujyi wa Kigali ari nawe wakiriye abashyitsi bari bitabiriye iki gikorwa, Nyamulinda Pascal yagarutse ku ngamba zafashwe n’Umujyi wa Kigali mu kurwanya ihohoterwa rishingiye ku gitsina.

Yagize ati “ Umujyi wa Kigali washyizeho gahunda zo kurwanya ihohoterwa rishingiye ku gitsina twifashishije umugoroba w’ababyeyi, gahunda y’inshuti z’umuryango ndetse twanashyize urumuri ahantu hanyura abantu benshi mu rwego rwo gukumira ihohoterwa iryo ari ryo ryose.”

Inzego zose ziyemeje gushyira hamwe mu kurwanya iki cyaha harimo ubutabera, ubugenzacyaha n’inzego z’ubuyobozi bwite bwa Leta ku bufatanye n’abaturage.

MUGISHA BENIGNE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE