2017-12-13 09:46:30 clouds 27o High | Kigali Rwanda

Dukurikire:
 
 

Zimbabwe: Mugabe yageze aho ava ku izima

Yanditswe na IMVAHO NSHYA

Kuya 2017-11-22 09:53:11

 
Share on:
 
Yasuwe:302
 
Yavuzweho:200
 
10
 
10

Ejo hashize uwari Perezida wa Zimbabwe, Robert Mugabe yageze aho ava ku izima yegura ku butegetsi nk’uko byatangajwe na perezida w’Inteko ishinga amategeko ya Zimbabwe, Jacob Mudenda wavuze ko Robert Mugabe yohereje ibaruwa ihamya ko yeguye.

JPEG - 232.1 kb
Mugabe Robert wari wasabwe n’abasirikare kuva ku butegetsi akanga yageze aho ava ku izima aregura ejo hashize ku ya 21 Ugushyingo 2017

Byabaye mu gihe Inteko ishinga amategeko yari iteranye yiga ku buryo yamweguza kuko yari amaze kubisabwa n’inzego nyinshi ariko akajya akomeza kubyanga.

Perezida Robert Mugabe yeguye nyuma y’uko muri Zimbabwe, ejo hashize ku wa Kabiri 21 Ugushyingo 2017 abahoze mu gisirikare bari mu kiruhuko k’izabukuru bahamagariye abenegihugu bose kwigaragambya mu rwego rwo kumusaba kwegura ku butegetsi.

Iyo myigaragambyo y’abarambiwe ubutegetsi bw’uyu mukambwe w’imyaka 93 y’amavuko ije yunganira ibyo yasabwe ku neza n’abayobozi bakuru b’ingabo za Zimbabwe ndetse n’abayobozi b’ishyaka rye Zanu-PF, ariko Mugabe akabangira.

Iyo myigaragambyo yari irangajwe imbere na Chris Mutsvangwa umwe mu bahoze mu gisirikare cya Zimbabwe bari mu kiruhuko k’izabukuru, yaje umunsi mbere y’uko byari biteganyijwe muri gahunda, dore ko kuri uyu wa Gatatu 22 ari wo munsi imyigaragambyo yari kubaho, nkuko bitangazwa n’Ikinyamakuru Jeune Afrique (J.A).

Mu gitondo cya kare Chris yagize ati «Imyigaragambyo igomba gutangira nonaha. Abaturage twese duhagarike ibyo twarimo gukora duhurire kuri Toit Bleu. Mugabe agombe arekure ubutegetsi nonaha ». Aha hitwa « Toit Bleu » ngo ni ku nyubako yihariye ya Perezida Robert Mugabe.

Ibiro ntaramakuru by’Abafaransa AFP (Agence France Presse), bamenyesheje ko abahoze mu gisirikare cya Zimbabwe bari mu kiruhuko k’izabukuru bahamagaje imyigaragambyo nyuma yo kumva itangazo rya Emmerson Mnangagwa yatanze ari mu buhungiro risaba Perezida Mugabe kwegura ku butegetsi.

AFP iti «Mu itangazo uyu wahoze ari Visi Perezida wirukanywe kuri uwo mwanya tariki 06 Ugushyingo, yagiriye Mugabe inama yo gutanga ubutegetsi ku neza kugira ngo igihugu kibone uburyo gitera indi ntambwe». Yongeyeho ko ngo adashobora kugaruka mu gihugu ke kubera impungenge z’umutekano we.

Imvururu zivugwa muri iki gihugu zakajije umurego cyane cyane guhera ubwo Mugabe yirukanye Mnangagwa ku mwanya wa Visi Perezida wa Zimbabwe, ngo bisabwe na Grace Mugabe umugore we.

Mu rukerera rw’ejo hashize ku wa Kabiri, Gen Constantino Chiwenga yatangaje ko ngo hari intambwe nziza imaze guterwa kuko Robert Mugabe na Emmerson Mnangagwa baganiriye bihagije kuri telefone. Chiwenga ati «Ni muri urwo rwego twe, ingabo z’igihugu cya Zimbabwe dusabye Abanyazimbabwe bose gutuza, kwihangana no kubahiriza ibyo amategeko abasaba».

Icyo yabasabaga gutegereza ni icyari kuva mu biganiro Mugabe na Mnangagwa bagiranye. Jeune Afrique ariko itangaza ko muri icyo gitondo ari bwo Visi Perezida yoherereje abanyamakuru itangazo ryasabaga umuyobozi we Mugabe kwegura.

Bigaragara ko ibiganiro abo banyapolitiki bagiranye nta kiza cyavuyemo. J.A yagize iti «Mwibuke ko ibihumbi by’Abanyazimbabwe byigaragambije kandi ku wa Gatandatu w’icyumweru gishize i Harare no mu mujyi wa Bulawayo basabaga ko Mugabe ava ku butegetsi».

KAYIRA ETIENNE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE