2017-12-13 06:59:31 clouds 27o High | Kigali Rwanda

Dukurikire:
 
 

Abantu 500 basuzumwe indwara zidakira bahabwa inama

Yanditswe na IMVAHO NSHYA

Kuya 2017-11-20 06:04:46

 
Share on:
 
Yasuwe:93
 
Yavuzweho:200
 
10
 
10

Abantu bagera kuri 500 bakuze n’urubyiruko bo mu Mujyi wa Kigali bitabiriye ibikorwa by’ubukangurambaga bwo kwisuzumisha indwara zidakira zirimo umuvuduko w’amaraso, diyabete, agakoko gatera Sida, kugira inama urubyiruko ububi bw’ibiyobyabwenge no gutanga amaraso ku bushake.

JPEG - 138.1 kb
Kwisuzumisha indwara zidakira bituma umuntu amenya uko azirinda (foto Samuel M)

Ni ibikorwa bikomatanyije by’ubukangurambaga ku buzima byabereye i Nyamirambo, tariki ya 18 Ugushyingo 2017, biteguwe na Minisiteri y’Ubuzima mu kigo cy’ubuzima (RBC), Minisiteri y’Umuco na Siporo n’Ikigo mpuzamahanga cy’abanyamerika “global Livingston Institute” mu rwego rwo kwishimira amarushanwa y’amagare, ibikorwa by’ubuzima no gusangizanya ibigize imico itandukanye ku isi.

Ku ruhande rwa RBC, abasuzumye abaturage indwara zidakira bagaragaje ko mu bafatwa n’izo ndwara muri bo 2/3 biba byatewe no kunywa itabi, inzoga nyinshi n’indyo itaboneye.

Basobanuriye abipimishije izo ndwara ko zikunze kwibasira abantu bakuze kuva ku myaka 35 kuzamura, bityo bagomba kumenya uko bahagaze no mu gihe batarageza kuri icyo kigero.

Ndacyayisenga Dynamo, umwe mu bakozi b’ishami ry’ubuzima bwo mu mutwe, yavuze ko abantu bakwiye kumenya ko ibiyobyabwenge ari byica ubuzima ariko n’uwabinyoye bikamugiraho ingaruka hari uburyo bwo kumuvura agakira.

Ati “Tubwira abantu ko nubwo haba hari abanyoye ibiyobyabwenge bakaba imbata zabyo nyuma bakarwara indwara zo mu mutwe, turabigisha ko hari ubuvuzi butangirwa mu mavuriro yo ku rwego rw’igihugu, kuva ku kigo nderabuzima kugera ku bitaro bikuru.”

Yakomeje avuga ko nk’urubyiruko barusobanurira ko hari uburyo bwo kubaho, bakagira ubuzima bwiza ariko batishoye mu ngeso mbi nk’ibiyobyabwenge n’ubusinzi.

Ati “Turababwira ngo uburyo bwo kubyirinda umusore mwiza ntarangwa no gukoresha ibiyobyabwenge, tukabigisha uburyo bashobora kubaho, kubaho mu buryo bwiza ukagira ubuzima bwiza biciye mu buryo buboneye (Positive lifestyle).”

Ku rubyiruko rwo rwagaragaje ko iyo umuntu amenye uko ahagaze ku ndwara zidakira bituma amenya uko agomba kwitwara no guhindura imikorere yaba imuganisha ahabi.

Mu bindi bikorwa abaturage bitabiriye birimo gutanga amaraso, kwipimisha ku bushake agakoko gatera Sida, gusobanurirwa uburyo butandukanye bwo kwirinda ako gakoko no guhabwa ibikoresho by’ubwirinzi bw’ako gakoko ku babikeneye.

MUTUNGIREHE SAMUEL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE