2017-12-13 09:46:30 clouds 27o High | Kigali Rwanda

Dukurikire:
 
 

Kagame yahaye “igihango” abakoreye u Rwanda iby’ikirenga

Yanditswe na IMVAHO NSHYA

Kuya 2017-11-20 05:35:20

 
Share on:
 
Yasuwe:41
 
Yavuzweho:200
 
10
 
10

Ku nshuro ya mbere, Perezida Paul Kagame yahaye impeta “Igihango” y’ishimwe, y’ubucuti, abantu 9 bagaragaje ibikorwa by’ikirenga ku ruhare rwabo mu gufatanya n’igihugu mu iterambere, by’umwihariko nyuma ya Jenoside yakorewe Abatutsi mu 1994.

JPEG - 311.3 kb
Perezida Paul Kagame, uwa 4 uvuye ibumoso, abanjirijwe na Madamu Jeannette Kagame, bari kumwe na bamwe mu bari bamaze guhabwa impeta ’Igihango’

Uyu muhango wo guha impeta “Igihango” abo bantu bakoreye igihugu ibikorwa by’ikirenga, wabaye ejo hashize tariki 18 Ugushyingo 2017. Impeta “Igihango” ni Impeta y’Ishimwe y’Ubucuti, ihabwa abantu kubera ibikorwa by’ikirenga bakoreye igihu.

Mu butumwa bwe, Perezida Kagame yavuze ko u Rwanda rwakomeje kubana no kugira inshuti zitandukanye no mu bihe bikomeye, ku buryo u Rwanda ruzakomeza gushimira abantu bagize uruhare mu gufatanya na rwo.

Perezida Kagame yagize ati “Intego y’izi mpeta ni uguha agaciro umusanzu w’intagereranywa ku buzima bw’igihugu, igikorwa nk’iki giha urubyiruko imbaraga n’umurava mu guha ubuzima bwabo ikerekezo kiza kiganisha ku cyo bifuza ku babo.

Mu bihe bikomeye, igihe twasabwaga kwigira ubwacu tukishakamo ibisubizo, u Rwanda ntirwigeze ruba rwonyine, mu by’ukuri twagize inshuti ziteguye kudufasha. Natwe twiteguye kubaba hafi igihe cyose muzadukenera.”

Ku birebana n’uruhare rw’abahawe Impeta “Igihango” Umukuru w’Igihugu yibukije ko bishingiye ku musanzu n’ubwitange bagize.

Ati “Twashoboye gukora byinshi byagaragaraga nk’ibidashoboka, ariko nagira ngo mbabwire ko akenshi, ibyo bakoze birenze kure ibyo mwumvise.

Mu muco nyarwanda igihango cyabaga hagati y’abantu babiri cyangwa se imiryango ibiri, kikabahuza. Igihango ni isezerano rikorwa ku bushake, rishingiye ku kuri n’ubwitange, ridasaza kandi ridakuka, rero bizakomeza.”

Umwe mu bahawe impeta “Igihango”, Howard Buffett, Umunyamerika, akaba ari umucuruzi, yigeze no kuba umunyapolitiki, ubu ni n’umuhinzi, akaba umuhungu wa Warren Buffett, yagaragaje ko yagize uruhare mu guhindura ubuzima bw’abatuye icyaro binyuze mu guteza imbere ishoramari ry’ubuhinzi mu cyaro.

Naho umuryango wa Alain Gauthier na wo wahawe iyi mpeta, uvuga ko utazahwema gukora ubuvugizi bugamije guharanira ubutabera ku bakekwaho uruhare muri Jenoside yakorewe Abatutsi baba mu mahanga.

Hezi Bezalel , Umuyislaheri ariko wavukiye Basra muri Iraq, na we wahawe “Igihango”, yashimye Perezida Paul Kagame kubera uruhare yagize mu guharanira guhuza Abanyarwanda, gahunda y’ubumwe n’ubwigenge bufasha komora ibikomere byo mu bihe byashize nyuma ya Jenoside yakorewe Abatutsi, ubu igihugu kikaba gitekanye bigafasha no kugera ku iterambere rirambye.

Abahawe Impeta “Igihango” ni ikenda, Hezi Bezalel, Howard Buffett, Gilbert Chagoury, John Dick, Paul Farmer, Alain na Dafroza Gauthier, Linda Melvern na Joseph Ritchie.

Umuhango wo gutanga iyi mpeta ugengwa n’ Iteka rya Perezida wa Repubulika rigena imiterere, imitangire n’imenyekanisha ry’Impeta z’Ishimwe. Uretse “Igihango”, izindi mpeta z’ishimwe ni iy’icyubahiro yitwa “Agaciro”, iy’umurimo yitwa “Indashyikirwa”; iy’umuco yitwa “Indangamirwa” hamwe n’iy’ubwitange yitwa "Indengabaganizi".

TWAGIRA WILSON

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE