2017-12-13 06:59:31 clouds 27o High | Kigali Rwanda

Dukurikire:
 
 

Abadepite basabye ubushishozi bwimbitse ku binyobwa byinjira mu Rwanda

Yanditswe na IMVAHO NSHYA

Kuya 2017-11-17 07:55:35

 
Share on:
 
Yasuwe:62
 
Yavuzweho:200
 
10
 
10

Abadepite bagize Komisiyo y’ububanyi n’amahanga, ubutwererane n’umutekano, basanga hakwiye gukorwa ubugenzuzi ku binyobwa bimwe na bimwe byemererwa kwinjira mu Rwanda kuko hari ibyagaragaye ko byakwangiza ubuzima bw’abantu ariko kuri ubu bikaba byemerewe kwinjira mu gihugu.

JPEG - 259.5 kb
Depite Mutimura Zenu uyobora Komisiyo y’ububanyi n’amahanga, ubutwererane n’umutekano

Ubwo bari mu kiganiro na minisiteri zirebwa n’ikumirwa ry’ibyaha byambukiranya imipaka, abadepite bagarutse ku cyaha k’iyinjizwa ry’ibinyobwa bimwe na bimwe mu Rwanda, bavuga ko hakwiye gukorwa ubushishozi ku nzoga nka Whisky n’izindi zituruka hanze y’u Rwanda zikarebwa niba zikwiye kunyobwa n’Abanyarwanda.

Abadepite bavuze ko kuba kuri ubu inzoga zitemewe kwinjizwa mu Rwanda ari kanyanga n’izindi zo mu mashashi, bikwiye kugenzurwa hakarebwa niba koko ari zo zonyine zangiza ubuzima bw’abantu.

Depite John Ruku-Rwabyoma yagize ati “Nk’ubu duhagarika kanyanga ariko Whisky ikinjira, wakwibaza niba alcohol zayo atari zo nyinshi cyangwa zikaba zingana n’iziri muri kanyanga. Niba tuvuga ngo kanyanga ni mbi kandi ifite alcohol ya 40% hanyuma tugacuruza Whisky na yo ari 40%, ibyo ni ukwinyuramo (Contradictory), twaba turimo kwica abaturage bacu. Twarangiza tugahangana gusa na za Muriture na Suruduwire kandi zo zitanafite alukolo nyinshi gutyo. Tubanze turebe amategeko yacu, turebe n’igituma abantu bakunda ibi biyobyabwenge.”

Depite Mutimura Zenu we ati “Ikibazo nk’icyo k’ibiyobyabwenge dukeneye kugira uko tugifata ku buryo bumwe, nidukoma urusyo dukome n’ingasire kuko abana bacu bari kwiroha cyane mu biyobyabwenge.”

Uretse ibinyobwa bisindisha bituruka hanze y’u Rwanda, abadepite banasabye ko hakomeza gufatirwa ingamba zimwe mu nganda zikora inzoga zikorera mu Rwanda.

Depite Mutimura ati “Ziriya nganda zikorera inzoga mu Rwanda na zo zikwiye gusuzumwa cyane kuko niba umuntu akora ibintu ababinyoye bikabica mu mutwe cyane haba hakenewe kurebwa ibyo aba yashyizemo. Dushima cyane ko ikigo k’igihugu cy’ubuzirangenge cyabishyizemo ingufu ndetse zimwe muri izo nganda zigafungwa ariko biradusaba no kumenya aho izo nganda ziri hose, hari n’ubwo usanga bene urwo ruganda ruri mu nzu y’umuntu ku buryo kuzamenya ibihakorerwa biba bitoroshye.”

Nk’uko byasobanuwe n’umushinjacyaha mukuru wa Repubulika, Jean Bosco Mutangana, yavuze ko ikoreshwa ry’ibisindisha ari ryo ritiza umurindi ibyaha birimo ubujura, guterana ibyuma, amakimbirane yo mu miryango, kwicana n’ibindi. Inzoga ya Whisky igira ubukana bwa alukolo bubarirwa hagati ya 40 na 70%.

NIYONSENGA SCHADRACK

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE