2017-12-13 09:46:30 clouds 27o High | Kigali Rwanda

Dukurikire:
 
 

4G imaze gukwirakwizwa ku gipimo cya 70%-Nsengimana

Yanditswe na IMVAHO NSHYA

Kuya 2017-11-17 07:28:08

 
Share on:
 
Yasuwe:112
 
Yavuzweho:200
 
10
 
10

Minisitiri w’Ikoranabuhanga Jean Philbert Nsengimana avuga ko umuyoboro wa murandasi wa 4G watangiye gukoreshwa mu Rwanda, ukaba uzwiho kunyaruka, kugeza ubu umaze gukwirakwizwa hirya no hino mu gihugu ku kigero cya 70%, mu gihe intego ari ukugera kuri 95%.

JPEG - 259.8 kb
Minisitiri w’Ikoranabuhanga Jean Philbert Nsengimana avuga ko 4G igeze kuri 70% ikwirakwizwa mu gihugu (Foto Mutungirehe S.)

Ibyo Minisitiri w’Ikoranabuhanga yabivugiye i Kigali ejo hashize ku wa Kane, mu nama y’umunsi umwe yahuje ihuriro ry’abafatanyabikorwa mu nzego zishinzwe gukwirakwiza serivise z’itumanaho n’ikoranabuhanga (Rwanda internet Governance forum), binyuze mu muyoboro mugari Broadband.

Iyi nama yarimo inzego nk’Ikigo k’igihugu Ngenzuramikorere k’imirimo ifitiye Igihugu Akamaro (RURA), baganiriye kuri gahunda zitandukanye zigamije gushyiraho no gushyigikira ibikorwa remezo bishingiye ku muyoboro mugari wa Broadband, n’uburyo uwo murongo mugari wakoreshwa cyane ukaba ikibanze nkenerwa mu buzima bwa buri munsi nk’uko abantu bakoresha amazi n’umuriro.

Nsengimana yagaragaje ikizere ko intego u Rwanda rwiyemeje yo kugera ku gipimo cya 95% mu gukwirakwiza 4G iri hafi kugerwaho kuko ubu hagezwe kuri 70%, hakaba hagamijwe ko ikoranabuhanga rizagira uruhare mu guhindura ubuzima bw’abaturage ndetse n’ubukungu bw’igihugu.

Minisitiri Nsengimana yasabye abatanga serivise za murandasi ishingiye ku murongo mugari gutanga serivise nziza, uhereye kuri servise za Leta, ku buryo iri koranabuhanga rya 4G ryakoreshwa bihagije kuko rimaze kugera henshi mu gihugu.
Yakomeje atangaza ko asanga hakirimo bimwe mu bibazo by’aho iryo koranabuhaga ryamaze kugera ariko abaturage batabizi kandi bakabaye baribyaza umusaruro.
Ati “Erega, ni ikibazo k’imyumvire gusa ku ikoreshwa ry’ikoranabuhanga ikwiye guhinduka ku bantu bakarikoresha, icyo bakeneye gusa ni ibikoresho nk’imashini zikorana na ryo.

Nk’ubu mperutse kujya mu karere kamwe ko mu burengerazuba, abaturage na bamwe mu bayobozi bashinzwe gutanga servise mu mahoteli, amashuri, ibiro bya Leta, na zimwe mu nganda nini bambwira ko ngo nta murandasi yihuta bafite kandi mu by’ukuri ihari.

Icyo basabwa ni ibikoresho bijyana nayo, naho ubundi ikibazo cya murandasi kiragenda gikemuka. Urugero nabaha vuba aha tugiye gutangiza umuyoboro umwe serivise za Leta zihuriraho (One Government Network), aho murandasi ya 4G izaba igera no ku rwego rw’Akagari, igafasha abaturage mu buzima bwa buri munsi”.

Naho umuyobozi ushinzwe servise zo guhanga udushya n’umutekano w’ikoranabuhanga mu kigo cya RURA Samapondo Charles, yavuze kuri bimwe mu byo Leta yakoze, na za politiki bigamije korohereza abatumiza ibikoresho by’ikoranabuhanga nko gusonerwa imisoro kuri bimwe mu bikoresho bitumizwa hanze, yibutsa ko mbere y’ikoranabuhanga rya 4G abakoreshaga ikoranabuhanga rya 3G babarirwaga kuri 93.11%.

TWAGIRA WILSON

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE