2017-12-13 09:46:30 clouds 27o High | Kigali Rwanda

Dukurikire:
 
 

Kwishyura hakoreshejwe ikoranabuhanga bizamura ubukungu-Rwangombwa

Yanditswe na IMVAHO NSHYA

Kuya 2017-11-17 07:24:21

 
Share on:
 
Yasuwe:104
 
Yavuzweho:200
 
10
 
10

Guverineri wa Banki Nkuru y’u Rwanda John Rwangombwa yatangaje ko abantu nibaramuka bashyize imbere umuco wo guhererekanya amafaranga hakoreshejwe ikoranabuhanga bizazamura urwego rw’imari n’ubukungu kugeza no ku bantu ubwabo.

JPEG - 205.9 kb
John Rwangombwa, Guverineri wa Banki Nkuru y’u Rwanda, avuga ku kamaro ko kwishyura hakoreshejwe ikoranabuhanga (Foto Samuel M)

Yabitangaje ejo hashize ubwo Banki Nkuru y’u Rwanda (BNR) n’Urugaga rw’Abikorera (PSF) batangizaga icyumweru cy’ubukangurambaga bwo gukoresha ikoranabuhanga mu kwishyura no guhererekanya amafaranga, “Cashless payment”.

Yagize ati “Kujya mu buryo bwo kwishyurana amafaranga atanyuze mu ntoki ‘cashless payment’, byatuma hari byinshi tubyungukiramo ku bantu bagura, abakora ubucuruzi, Leta no ku baturage benshi.

Inyungu nini ku kwishyurana amafaranga mu ikoranabuhanga, ni uko bizana amafaranga menshi mu bukungu, bikanongera amafaranga menshi mu ishoramari, byongera gutanga akazi kenshi bikanazamura imisoro ku gihugu ari nako urwego rw’ubukungu ruzamuka.”

Guverineri Rwangombwa yagaragaje ko kwishyura hakoreshejwe guhererekanya amafaranga mu ntoki bitwara amafaranga menshi Leta n’abikorera mu buryo buziguye no mu buryo butaziguye.

Ati “Nka Banki Nkuru y’u Rwanda, dutanga amafaranga agera kuri miliyari ebyiri buri mwaka kugira ngo hakorwe inoti n’ibiceri bikoreshwa mu bantu, mu gihugu.”

Kuri banki zigira uruhare runini mu guhererekanya amafaranga cyane, byagaragajwe ko zitakaza agera kuri miliyari 15 mu kubaka uburyo bubafasha gukora akazi kazo karimo kugura ibikoresho no guhemba abakozi babikoresha.

Ku bacuruzi na bo bahomba agera kuri 6% buri munsi by’amafaranga bacuruza biturutse ku bujura, ibibazo bitandukanye birimo kwibeshya ku mibare, kwibwa amafaranga, guhangikwa inoti zitemewe n’ibindi bashobora guhura nabyo mu kwishyura hakoreshejwe guhererekanya amafaranga mu ntoki.

Ikindi kibazo gikomeye gikunze guterwa no guhererekanya amafaranga mu ntoki ni ubujura bwaba ku mabanki, mu nzu, mu kazi no ku bantu bayagendana bikorohereza ubujura.

Umuyobozi w’Urugaga rw’Abikorera, Gasamagera Benjamin, yavuze ko abacuruzi by’umwihariko bakwiye gutekereza uko bakuraho igihombo bahora bagira cya 2% giturutse mu kugura ibikoresho bibafasha mu kazi kabo na 6% bahomba mu guhererekanya amafaranga mu ntoki bityo abakiliya bakiyongera inyungu na yo ikiyongera n’igihugu kikunguka.

Kugeza ubu abantu miliyoni 8 babarurwa ko biyandikishije mu buryo bwo guhererekanya amafaranga hakoreshejwe telefone ngendanwa, mu gihugu hose hari ibyuma bifasha abantu guhererekanya amafaranga adaciye mu ntoki POS 2 031 na ATM 405, amakarita ya banki 872 476.

Intego ya Guverinoma ni uko muri 2024 amafaranga abantu bazaba bishyurana hakoreshejwe ikoranabuhanga azaba abarirwa kuri 80% by’umusaruro mbumbe w’igihugu (GDP), kwishyurana kuzaba gukora 100% mu ikoranabuhanga ava mu nzego za Leta, naho kwishyura amafaranga ajya mu nzego za Leta bizaba bigeze kuri 70%.

MUTUNGIREHE SAMUEL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE