2017-11-24 09:36:46 clouds 27o High | Kigali Rwanda

Dukurikire:
 
 

Urwego rw’ubutabera rurishimira ibyagezweho mu myaka 6 ishize

Yanditswe na IMVAHO NSHYA

Kuya 2017-11-15 07:32:28

 
Share on:
 
Yasuwe:49
 
Yavuzweho:200
 
10
 
10

Minisiteri y’Ubutabera n’ibigo biyishamikiyeho bishimiye ibyagezweho mu rwego rw’ubutabera, banemeza n’ibiteganywa gukorwa muri gahunda y’imyaka 6.
Ibi byagaragajwe mu nama yahuje izo nzego, ejo hashize tariki 14 Ugushyingo 2017.

JPEG - 338 kb
Umunyamabanga uhoraho muri Minisiteri y’ Ubutabera, Kalihangabo Isabelle ubanza iburyo mu nama havuzwe ku byagezweho mu rwego rw’ubutabera n’ibiteganywa muri gahunda y’imyaka 6

Umunyamabanga uhoraho muri Minisiteri y’ubutabera, MINIJUST Kalihangabo Isabella, avuga ko urwego ry’ubutabera rwageze kuri byinshi bitandukanye.

Mu byagezweho harimo nko kubona imyanya myiza ku rwego mpuzamahanga, abaturage bagaragaje ikizere bafitiye serivisi z’ubutabera, hashyizweho uburyo umuturage afashwa kubona serivise z’ubutabera za MAJ, kubaka amagereza no gusana asanzwe no kuba ikoranabuhanga na ryo risigaye rikoreshwa muri uru rwego.

Mu myanya myiza urwego rw’ubutabera rwishimira harimo nko kuba u Rwanda rwarabaye urwa mbere muri Afurika, rukaba urwa 23 ku isi mu bihugu bifite urwego rw’ubutabera bwigenga.

U Rwanda ruza ku mwanya wa kabiri muri Afurika n’uwa 11 ku isi mu kugira abaturage bafite umutekano kandi bafitiye ikizere inzego z’umutekano.

Mu kurwanya icyaha cya ruswa, u Rwanda rwaje ku mwanya wa mbere mu karere, naho muri Afurika ruba urwa kane, ku isi ruza ku mwanya wa 50. U Rwanda kandi rwabonye igikombe mu guhanga udushya ku kuzamura ubwiza bwa serivise zijyanye n’ubutabera.

Kalihangabo yavuze ko kugeza ubu uburyo bwo guhana uwakoze icyaha bitakiri ukumufunga gusa ahubwo hashyizweho n’ubundi buryo ahanwa. Aho usanga uwahamwe n’icyaha yakora igihano nsimburagifungo, kumugerageza bareba imyitwarire ye hakaba hateganywa kumwambika akantu ku kaboko kamugaragaza.

Yasobanuye impamvu umubare w’abakora ibyaha wiyongereye ko icya mbere kibitera ari uko urwego rwa Polisi rutagikorera mu karere ahubwo rwajyanwe ku murenge bityo ukoze icyaha wese amenyekana.

Ikindi kandi ni uko hashyizweho urwego rwa Community Policing
rufasha kumenyekanisha buri cyaha cyose kibaye. Icya gatatu ni uko ibyaha bitoya byavuye mu maboko y’abunzi bijyanwa muri Polisi.

Urwego rw’ubutabera rwiyemeje kugera ku ntego zikurikira mu myaka itandatu (6) iri imbere birimo kunoza neza imitangire ya serivise mu rwego rw’ubutabera, kuzamura umudendezo n’umutekano ku banyarwanda n’abaturarwanda, kugorora kuruta gufunga ukoze icyaha bwa mbere, ntahanwe nk’uwakoze icyo cyaha kenshi, imfungwa n’abagororwa bakigishwa imyuga kandi bagahabwa impamyabushobozi z’imyuga bize ku buryo bazisabisha imirimo mu gihe bageze hanze.

Amafaranga asabwa kugira ngo hashyirwe mu bikorwa ibiteganywa kugerwaho muri iyi myaka itandatu (6) agera kuri miliyari 244.1.

TWAGIRAMUNGU JEAN BAPTISTE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE