2017-11-24 09:36:46 clouds 27o High | Kigali Rwanda

Dukurikire:
 
 

MINICOM isanga ibigo biciriritse byaba igisubizo ku bushomeri

Yanditswe na IMVAHO NSHYA

Kuya 2017-11-15 07:29:21

 
Share on:
 
Yasuwe:157
 
Yavuzweho:200
 
10
 
10

Minisitiri w’Ubucuruzi n’Inganda (MINICOM), Munyeshyaka Vincent, avuga ko mu rwego rwo gukomeza gushakisha igisubizo kirambye k’ikibazo cy’ubushomeri hakwifashishwa ibigo by’imari iciriritse kuko biramutse bibaye byinshi byatanga akazi kenshi.

JPEG - 186.7 kb
Minisitiri wa MINICOM, Munyeshyaka Vincent asanga ibigo biciriritse byaba igisubizo ku bushomeri (Foto Niyonsenga S.)

Ibyo minisitiri Munyeshyaka yabigarutseho ubwo yatangizaga inama y’iminsi itatu ihuza ibigo by’imari biciriritse n’amabanki muri Afurika ikaba yari ihuje ba rwiyemezamirimo bato, ibigo by’imari n’amabanki.

Yagize ati “Iyo ugiye kureba imirimo itangwa mu rwego rw’abikorera, 41% yose ikomoka muri ibi bigo biciriritse kuko usanga wenda bidakenera abakozi benshi cyane ariko usanga ari byinshi ku buryo iyo ugiye kureba usanga ari byo bitanga akazi kurusha ibigo binini.”

Minisitiri Munyeshyaka kandi avuga ko yizeye ko abafite ibigo biciriritse bitabiriye iyi nama mpuzamahanga n’ibigo by’imari bazashobora kubonana n’amabanki bakaba batangira gukorana bityo bagakomeza gufasha mu gutanga akazi mu rwego rwo gukomeza guhangana n’ubushomeri.

Ati “Amabanki ari buhure n’abantu bafite ibitekerezo bitandukanye by’imishinga kugira ngo barebe niba hari agashya bafite kugira ngo babe babaha amafaranga, turizera rero y’uko rwose Abanyarwanda cyangwa n’ibigo biri mu Rwanda bamwe bashobora kuza kugira icyo bumvikanaho n’abatanga amafaranga kuko na byo byadufasha gukomeza guhangana n’ubushomeri.”

Bamwe mu rubyiruko rudafite akazi baganiriye n’Imvaho Nshya na bo bemeza ko ibigo biciriritse bishobora gutanga akazi gaciriritse.

Rutayisire Emmanuel yagize ati “Akazi n’iyo kaba gahemba make kaba ari ingenzi kuko ibintu byose biza buhoro buhoro. Hari nk’abana twiganaga bakirangiza babanza gukora muri bene ibyo bigo ariko ubu bafite akazi keza, iyo ukora ahantu nk’aho uba urimo kwiyungura ubumenyi ku buryo babona igitekerezo cyo kwishingira umushinga, uba uri kumenyana n’abantu benshi, ikindi kandi uba uri no kuhakura amafaranga akubeshaho utagiye kwiyandarika.”

Nk’uko byagaragajwe muri iyo nama, ibigo biciriritse byihariye hejuru ya 90 % by’urwego rw’abikorera mu Rwanda naho mu kazi kangana na 94 % n’urwo rwego, ibigo biciriritse byihariye 41 %.

NIYONSENGA SCHADRACK

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE