2017-11-23 07:40:03 clouds 27o High | Kigali Rwanda

Dukurikire:
 
 

Si byiza kujya kwisuzumisha amaso ari uko yagize ikibazo

Yanditswe na IMVAHO NSHYA

Kuya 2017-11-15 07:23:45

 
Share on:
 
Yasuwe:90
 
Yavuzweho:200
 
10
 
10

Amaso ni urugingo rufasha kureba, ariko kandi rworoha ku buryo bisaba ko rurindwa kugira ngo rutangirika. Abahanga mu kuvura amaso bavuga ko atari byiza kujya kwisuzumisha amaso ari uko yagize ikibazo gusa, ahubwo kuyisuzumisha mbere hagamijwe gukumira uburwayi bwayo ni byo baha agaciro.

JPEG - 295.1 kb
Abantu bagirwa inama yo kwisuzumisha amaso mbere y’uko agira ibibazo

Imvaho Nshya yaganiriye n’abantu batandukanye harimo n’abaganga b’amaso, ngo igeze ku basomyi bayo ibyo bakora n’ibyo bakwirinda ngo amaso ntiyangirike.
Nyirahabiyambere yabwiye Imvaho Nshya ko abantu bashobora kuba baterwa amaso no kureba cyane mu bintu biba birimo urumuri rwinshi nka za mudasobwa, televiziyo n’ibindi.

Nsanzamahoro we avuga ko abantu baterwa amaso n’imyotsi, abandi bakaba bayiterwa n’imikungugu itumukiramo. Naho ku bana bakiri bato bagaragarwaho n’indwara y’amaso, avuga ko bashobora kuba babiterwa n’uko ababyeyi babo bayarwaye, cyangwa bayananiza.

Nyiramana wo muri Kicukiro wigeze kurwara amaso yo gutukura n’abana be bane, yabwiye Imvaho Nshya ko abaganga bamubwiye ko bafite ibintu bimwe na bimwe bagiraho aleriji, kandi gushyiramo imiti y’amaso myinshi atari byiza kuko byayatera ibindi bibazo. Yagize ati “Abaganga batandukanye twivujeho, batubwiye ko dufite aleriji y’ibintu batamenya ibyo ari byo, kandi ko gushyiramo imiti kenshi atari byiza. Bambwiraga ko abana bashobora kugenda bakira uko bakura. Kandi koko uko bagiye bakura amaso yabo yagiye aba meza, atabarya.”

Hari abarwara amaso atari ukubera aleriji, ahubwo bitewe no kuyafata nabi
Mu kiganiro n’Imvaho Nshya, Dr. Nkurikiye John, inzobere mu kuvura amaso, asanga hari bamwe mu bantu bajya kwisuzumisha amaso kubera ko bagize ikibazo, ibintu yita bibi cyane kuko uwo muntu aba yamaze gutakaza nka 90% yagombaga kuba yararamiye hakiri kare ndetse rimwe na rimwe bikaba intandaro y’ubuhumyi bwa hato.

Akomeza avuga ko ari byiza kwirinda ibyakwangiza amaso. Yagize ati “ Amaso afasha kubona, akageza amashusho y’ibintu abonye ku bwonko, bukabimenya, bigatuma umuntu amenya ikimuri imbere icyo ari cyo bityo, agafasha umuntu gukora ibintu bitandukanye kuko abireba akabimenya.”

Yakomeje avuga ko amaso afite ibice bitandukanye, harimo n’ibice bishinzwe kuyarinda, nk’ibitsike bibuza ibyuya gutembera mu maso, bikanavuburira mu maso amazi yo kuribobeza ngo rikomeze rigire ubushobozi bwo kubona. Hari kandi ingohe zibuza ibintu kumanukira mu maso.

Gufata neza amaso, ni ukurinda izo ngingo zishinzwe gutuma amaso atagira ibibazo, no kurinda ibice byose bigize amaso cyane cyane agahu bita retine ari na ko gashamikiyeho umutsi wumva, ukanagera mu bwonko. Ni muri uwo mutsi ibyo ijisho ribonye binyura bikagera ku bwonko vuba cyane. Kubera ko ako gahu kangizwa n’urumuri rwinshi, ni ngombwa ko umuntu yirinda kureba mu rumuri rwinshi cyane cyane mu zuba, atambaye indorerwamo z’umukara.

Igihe ijisho ritokowe, si byiza kuribyiringiramo, ahubwo ushaka ugutokora cyangwa ugahumiriza noneho igitokorwa kigasohokana n’amarira. Iyo ukubyemo ushobora kwangiza retine cyangwa ijisho ryose muri rusange. Kugira ngo umuntu agire amaso mazima, akwiye kurya indyo yuzuye irimo Vitamini A na B2. Vitamini A iboneka cyane cyane mu mboga nk’isombe, karoti, epinari, n’ibindi. Vitamini B2 yo iboneka mu muceri. Iyo umuntu atariye ibiribwa bifite izo vitamini, ashobora kugira amaso atukura, akarangwa no kutabona neza cyangwa ingohe zikaba zapfuka.

Abantu bakuze bagira intenge nke z’umubiri muri rusange, kandi n’amaso na yo agira intege nke. Baba bakwiye kugana abaganga kugira ngo babagire inama, ndetse nibiba ngombwa bambare indorerwamo batarayananiza cyane.

Ku nama zirebana n’imirire Dr Nkurikiye avuga ko hari ibibazo byo kubura vitamini A kandi ari yo ituma umuntu abona neza. Yagize ati “Ubusanzwe hari imyunyungugu umuntu aba akeneye na vitamini kugira ngo ijisho rye ridasaza. Ibyo na byo birafasha”.

Inama iruta izindi Dr Nkurikiye agira abantu ni ukwirinda gukoresha imiti ya gakondo mu maso kuko ngo iza ku isonga mu bintu bituma abantu bahuma muri iki gihugu.Yagize ati “Kubera ko umuntu agira akabazo mu maso bakakita amazina bashatse kuko baba batumva neza imiterere y’ijisho noneho ugasanga batugezeho nta cyo tukiramiye byararengeranye, byararenze kuba byavurwa kuko baba baramaze igihe bashyiramo imiti na yo ubwayo yangiza ijisho”.

MUKAGAHIZI ROSE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE