2017-12-13 09:46:30 clouds 27o High | Kigali Rwanda

Dukurikire:
 
 

Uburasirazuba: Abajyanama b’uturere batewe impungenge n’ibikorwaremezo bitaramba

Yanditswe na IMVAHO NSHYA

Kuya 2017-11-14 09:06:09

 
Share on:
 
Yasuwe:140
 
Yavuzweho:200
 
10
 
10

Abajyanama b’uturere two mu ntara y’Uburasirazuba, basanga hakwiye kujyaho gahunda yo gukurikirana ibikorwaremezo bigakorwa n’abaturage, kuko ngo hari ibyo bahabwa bikangirika mu gihe gito cyane.

JPEG - 232.3 kb
Bamwe mu bajyanama b’uturere two mu ntara y’Uburasirazuba ( Hakizimana Y)

Ubwo haganirwaga ku mbanzirizamushinga y’ibitekerezo by’igenamigambi ry’umwaka wa 2018/2019 mu ntara y’Uburasirazuba, abajyanama b’uturere bagaragaje bimwe mu bibazo abaturage badahwema kubabwira iyo bahuye nabo, birimo n’ibikorwaremezo bitaramba.

Rucyahana Etienne, umujyanama mu karere ka Bugesera, yagize ati “Icyo nifuza kuvuga ni uko twarebera hamwe uburyo ibikorwa dukora byaramba, aha ndibanda cyane ku mihanda dukora dukoresheje abaturage bahembwa.

Iyi mihanda akenshi aho ishyirwa usanga ihita yangirika ako kanya, umuvu w’amazi urayitwara ugasanga n’imiferege yagenewe gutwara amazi nayo idatunganyije.Hari hakwiye kubaho ingamba zituma iriya mihanda iramba ikazagirira abaturage akamaro koko.”

Undi mujyanama wo mu karere ka Gatsibo witwa Yankurije, nawe yunzemo agira ati “Iki ni ikibazo gikunze kugaragara cyane, umuhanda urakorwa hashira umwaka cyangwa utaranagera ukabona mu ngengo y’imari y’akarere ngo harimo amafaranga yo gusana wa muhanda, abantu bagahora muri urwo!

Iki ni ikintu abantu bakwiye kwigana ubushishozi bakumva ko ibyo dukora tubikorera igihugu cyacu ejo tuzaraga abana bacu n’abuzukuru bacu.”

Umuyobozi w’Intara y’Uburasirazuba Mufulukye Fred, yasabye abashinzwe igenamigambi ndetse na nyobozi na njyanama z’uturere kwita cyane ku igenamigambi risubiza mu buryo burambye ibibazo by’abaturage.

Yakomeje agira ati “Tugiye kubinoza, ni umwanya wa buri karere kwibaza ku kintu kidasanzwe kandi kigiye guhindura imibereho y’umunyarwanda, ese ibyo tugiye gukora ni ibintu bizaramba cyangwa ni ibintu tuzakora umwaka umwe bikaba birasinziriye?

Buri gihe nidukora ikintu ntidutekereze icyo kigiye kumara tuzahora twizenguruka, usanga ibyo turimo ari ibintu bihoraho gusa kandi bitagize ikintu kinini bifasha, ibyo tubitekerezeho kandi biratureba twese haba abajyanama, za nyobozi n’abakozi basanzwe.”

Umuyobozi w’intara yasabye abayobozi kandi ko ibyo bakora byose bakwiye gushingira ku kerekezo igihugu kihaye ndetse na gahunda ya Guverinoma y’imyaka 7, ibi byose bikaba bigamije ko umunyarwanda yarushaho gutera imbere mu majyambere n’ubukungu.

HAKIZIMANA YUSSUF

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE