2017-11-17 14:59:33 clouds 27o High | Kigali Rwanda

Dukurikire:
 
 

Akamaro n’inshingano by’inama y’umuryango

Yanditswe na IMVAHO NSHYA

Kuya 2017-11-13 07:03:48

 
Share on:
 
Yasuwe:86
 
Yavuzweho:200
 
10
 
10
JPEG - 20.2 kb
HABIMANA AUGUSTIN

Uko ibihe bigenda bisimburana usanga hari ibikorwa n’imigenzereze byagiye bigira ingaruka ku muco gakondo n’imibanire y’abagize umuryango nyarwanda, aho usanga bamwe mu bana na bamwe mu babyeyi baragiye bateshuka ku nshingano zabo mu muryango barimo.

Mu rwego rwo kurengera inyungu z’abagize umuryango no gukemura ibibazo bishobora kuwuvukamo amategeko y’u Rwanda yateganyije ko hajya hitabazwa Inama y’Umuryango.

Umugabo n’umugore n’abana babakomokaho ni ryo shingiro ry’umuryango uwo ari wo wose. Muri abo bagize ishingiro ry’umuryango, buri wese afite inshingano agomba kubahiriza muri uwo muryango.

Muri iki gihe, usanga bamwe mu babyeyi, ku babafite, abana ndetse n’abandi ba hafi mu bagize umuryango nyarwanda barabaye ba nyamwigendaho, umuco wo kwita ku bana ndetse no ku babyeyi ugenda ucika buhoro buhoro, kuko bamwe usanga baharanira imibereho n’iterambere ryabo batitaye ku babyeyi cyangwa ku bana babo n’izindi nyungu z’umuryango muri rusange. Iyo habaye ibitumvikanyweho cyangwa akarengane mu muryango, ni ho hitabazwa inama y’umuryango.

Itegeko Nº 32/2016 ryo ku wa 28/08/2016 rigenga abantu n’umuryango nk’uko ryasohotse mu igazeti ya Leta ya Repubulika y’u Rwanda n°37 yo kuwa 12/09/2016, ryateganyije inshingano z’ababyeyi n’inshingano z’abana.

Inshingano z’ababyeyi n’iz’abana

Muri iryo tegeko rigenga abantu n’umuryango, ingingo ya 203 iteganya ko iyo abantu bashyingiranywe baba biyemeje inshingano yo kwita ku bana bazabyara, kubaha ibibatunga no kubarera bishingiye ku ndangagaciro z’umuco nyarwanda.

Iyo umwe mu bashyingiranywe ateshutse kuri iyo nshingano, uwo bashyingiranywe cyangwa undi muntu ubifitemo inyungu ashobora kubimurega.

Naho ingingo ya 255 y’iryo tegeko rigenga abantu n’umuryango iha abana inshingano zo guha agaciro ababyeyi babo, kububaha no kubaha ibibatunga igihe babikeneye.

Inshingano z’inama y’umuryango

Nk’uko itegeko rigenga abantu n’umuryango mu ngingo ya 162 ribisobanura, inama y’Umuryango ni urwego rwo mu muryango rushinzwe cyane cyane kurengera inyungu z’abagize uwo muryango no gukemura ibibazo biwuvutsemo. Inama y’umuryango ifite inshingano zikurikira:

1° kurengera inyungu z’umuryango;
2° kumva no gukemura ibibazo byerekeranye n’izungura n’ibindi byose bivutse mu muryango;
3° gutoranya abagize Inama y’ubwishingire;
4° gutanga inama mu gihe cyo kugena umwishingizi w’umuntu mukuru;
5° kugena ushinzwe gucunga umutungo w’uwazimiye cyangwa wabuze igihe nyir’ubwite cyangwa urukiko batamugennye;
6° kwemera ko umwana ashakirwa umubyeyi utaramubyaye iyo adafite ababyeyi cyangwa ababyeyi badashobora kugaragaza icyo batekereza;
7° kunga ababyeyi b’umwana igihe bananiwe kumvikana ku ikoreshwa ry’ububasha bwa kibyeyi;
8° gusuzuma ibibazo byerekeranye n’ibitunga umuntu;
9° gukora indi nshingano yagenerwa n’andi mategeko cyangwa umuryango.

Izi nshingano ahanini zibanda mu gukemura ikibazo cyangwa amakimbirane yavutse mu muryango.
Abagize Inama y’umuryango

Inama y’umuryango igizwe n’aba bakurikira:

1° se na nyina b’uwo bireba;

2° basaza na bashiki be bafite imyaka y’ubukure;

3° nibura babiri (2) mu bo bafitanye isano b’uwo bireba baturutse ku ruhande rwa se cyangwa nyina hakurikijwe abo bafitanye isano ya bugufi;

4° abantu babiri (2) bazwiho ubushishozi batoranywa n’uwo bireba.

Mu gihe abantu bavugwa mu gace ka 1°, aka 2° n’aka 3° badashobora kuboneka, hatoranywa abantu babiri (2) mu nshuti z’umuryango bazwiho kuvugisha ukuri, kugira ngo bafashe gukemura ikibazo cyavutse mu muryango.

Ese inama y’Umuryango iterana ryari?

Ingingo ya 165 y’itegeko rigenga abantu n’umuryango, iteganya ko inama y’umuryango iterana igihe cyose bibaye ngombwa kandi ibyemezo byayo bifatwa ku bwumvikane bigakorerwa inyandikomvugo igasinywa n’abahari mu bagize inama y’umuryango. Iyo ubwumvikane budashobotse, ibyemezo bifatwa ku bwiganze bw’abitabiriye inama.

Umuntu wese utanyuzwe n’ibyemezo by’inama y’umuryango atanga ikirego mu rwego rubifitiye ububasha.

Biragaragara ko inama y’umuryango iramutse ikoreshejwe neza hari byinshi mu bibazo biri mu muryango nyarwanda, cyane cyane ibijyanye n’amakimbirane ashingiye ku mitungo ndetse no kutita ku nshingano z’urugo bishobora kujya birangizwa vuba kandi neza bidateye amakimbirane n’inzangano mu muryango cyangwa ngo abantu bajye mu nkiko.

Ese aho iwanyu, mu miryango yanyu, inama z’umuryango zirahari? hari icyo zibafasha ?

Ibitekerezo bikubiye muri iyi nyandiko byanditse n’umukozi mu Nteko Ishinga Amategeko/Umutwe w’Abadepite

HABIMANA AUGUSTIN

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE