2017-12-11 14:03:29 clouds 27o High | Kigali Rwanda

Dukurikire:
 
 

2017/2018: 76.1% ni bo bamaze kwishyura mituweli

Yanditswe na IMVAHO NSHYA

Kuya 2017-11-13 06:42:00

 
Share on:
 
Yasuwe:95
 
Yavuzweho:200
 
10
 
10

Umuyobozi mu Kigo k’Igihugu cy’Ubwiteganyirize, RSSB, ushinzwe ubukangurambaga no kwandika abanyamuryango ba mituweli, Ntigurirwa Deogratias aratangaza ko abamaze kwishyura ubwisungane mu kwivuza mu gihugu cyose bari kuri 76%.

JPEG - 325.2 kb
Abaturage bakangurirwa kwitabira kwishyura mituweli

Uyu muyobozi asobanura ko hari uturere duhagaze neza mu kwishyura imisanzu y’ubwisungane mu kwivuza, hakaba n’utukiri inyuma, gusa ngo hakaba hari ingamba zo gukomeza gukora ubukangurambaga ku bufatanye bwa RSSB n’ubuyobozi bw’inzego z’ibanze.

Yagize ati “Nubwo mubona ijanisha ry’abamaze kwishyura ubwisungane mu gihugu hose ridashimishije, ariko hari uturere twakoze iyo bwabaga dushishikariza abaturage kwishyura mituweli, hari n’utwashyizemo imbaraga nke.”

Yatanze urugero rw’uturere 5 twa mbere mu kwishyura mituweli, tugaragara muri raporo yatanzwe ku ya 29 Ukwakira 2017, turimo Akarere ka Gakenke kari kuri 89.6%, aka Nyamasheke kari kuri 87.2%, Burera iri kuri 83.1%, Gisagara 81.1% naho Gicumbi iri kuri 80.9%.

Iyi raporo kandi igaragaza uturere 5 twa nyuma mu kwishyura mituweli, turimo Akarere ka Nyarugenge kari kuri 67.7%, Akarere ka Huye kari kuri 67.6%, Nyamagabe na Rutsiro 66.4% naho Nyaruguru iri kuri 65.2%.

Ku bijyanye n’iyi mibare igaragazwa na raporo ku bwitabire mu kwishyura ubwisungane mu kwivuza, Ntigurirwa avuga ko bitangaje kubona Akarere ka Nyamasheke kaza ku mwanya wa kabiri mu gutanga imisanzu y’ubwisungane mu kwivuza nk’akarere ka kabiri gakennye kurusha utundi mu gihugu mu gihe aka Nyarugenge na Huye tuzwi nk’uturere dufite amikoro tukaba dukurikirana ku myanya ya 26 na 27.

Ati “Ibi bigaragaza ko hari uturere dukora ubukangurambaga ku kigero cyo hejuru kurusha utundi.”

Kuri utu turere tukigaragara ku ijanisha ryo hasi mu kwishyura mituweli, Ntigurirwa avuga ko ku bufatanye n’inzego z’ibanze hagiye gukorwa ubukangurambaga bwisumbuyeho kugira ngo na two tubashe kuzamuka mu bwitabire.

Ati “Nubwo ubukangurambaga bwa mituweli bushinzwe cyane cyane ubuyobozi bw’inzego z’ibanze, na twe nk’abashinzwe ubukangurambaga bw’abanyamuryango ba mituweli ku rwego rwa RSSB, tuzamanuka dufatanye kugira ngo tuzamure iyo mibare y’abaturage bagomba kwishyura ubwisungane mu kwivuza.”

Ntigurirwa avuga ko ubufatanye n’inzego z’ibanze mu bukangurambaga bwa mituweli, aho atanga urugero rw’uburyo barimo gukorana n’ubuyobozi bw’Intara y’Amajyepfo mu bukangurambaga bwa mituweli kuko byamaze kugaragara ko uturere tw’iyi ntara tuza mu myanya ya nyuma.

MUGISHA BENIGNE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE