2017-12-11 14:03:29 clouds 27o High | Kigali Rwanda

Dukurikire:
 
 

RINIT: Icyumweru cyo kuzigama cyahinduye imyumvire ku bantu 100

Yanditswe na IMVAHO NSHYA

Kuya 2017-11-10 08:23:34

 
Share on:
 
Yasuwe:251
 
Yavuzweho:200
 
10
 
10

Umuyobozi Mukuru w’Ikigo gishinzwe ibigega by’umugabane ku ishoramari (RNIT), Gashugi André, yatangarije Imvaho Nshya ko abantu bagera ku 100 bizigamye mu kigega ‘RNIT Iterambere Fund’ mu cyumweru cy’ubukangurambaga cyahariwe ubukangurambaga bwo kuzigama cyatangiye tariki ya 23 kugeza tariki ya 28 Ukwakira 2017.

JPEG - 248.5 kb
Andre Gashugi, Umuyobozi mukuru w’Ikigo RNIT mu kiganiro n’umunyamakuru (Foto Gisubizo G.)

Gashugi yavuze ko mu cyumweru cyo kuzigama cyatangijwe na Minisiteri y’Imari n’Igenamigambi (MINECOFIN), byagaragaye ko uko abantu bagenda babyigishwa barushaho kubyumva kandi bafite ubushake bwo kuzigama, igisigaye kikaba ari ugutera intambwe yo kubishyira mu bikorwa.

Ati “Uko mbere byari bimeze n’ubu hari ikinyuranyo; ubona abantu batangiye kubyumva, ibisigaye ni uko babishyira mu bikorwa. Iyo uganira n’umuntu arakubwira ati ‘Uzi ko ntajya nzigama’, uzi ko ari ikibazo. Akabyumva ko yagombaga kubikora ariko intambwe yo kubikora nyirizina ni cyo gisigaye.”

Yakomeje avuga ko kuzigama bifasha cyane n’abafite akazi k’umushahara kuko bifasha uwazigamye kubaho no kwiteza imbere mu gihe akazi gahagaze bimutunguye.

ati “Icyo turimo kubwira abantu ni uko kuzigama atari ubukire, si iby’abakize, ni umuco, ni gahunda, ni intego, ni icyo ushaka kugeraho.”

Uyu muyobozi yasabye bamwe mu bantu bagifite imyumvire ishaje ahanini ibuza abantu gukuza umuco wo guteganyiriza ejo hazaza.

Ati “Kwizigama ni ukurwanya ya myuvire, ya migani ya kera yavugaga ngo ‘urukwavu rukuze rwonka abana’ ahubwo kuri ubu urukwavu rushaje ruritunga, rukanatunga n’abana barwo, runakabasigira umurage.”

Mu bateye intambwe yo kuzigama muri icyo cyumweru barimo abakora akazi ka DASSO, abanyeshuri bo mu mashuri yisumbuye, abarimu, abakozi ba Leta n’abandi bantu ku giti cyabo.

Bamwe mu baganiriye n’Imvaho Nshya mu cyumweru cyo kuzigama, biganjemo abakiri bato, bagaragaje ko amafaranga bazigamye mu gihe kiri imbere yazababera igishoro cyo kwihangira imirimo mu gihe batabonye akazi uko babyifuza.

Kuva tariki ya 7 Ukwakira 2016 kugeza tariki ya 6 Ukwakira 2017, imigabane y’abazigamye mu kigega ‘RNIT Iterambere Fund’ imaze kunguka ku nyungu ya 9.62% ari na ko umugabane uzamuka mu gaciro umunsi ku wundi.

MUTUNGIREHE SAMUEL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE