2017-11-23 07:40:03 clouds 27o High | Kigali Rwanda

Dukurikire:
 
 

Umujyi wa Kigali ushishikajwe n’imishinga 3 y’ikorwa ry’imihanda

Yanditswe na IMVAHO NSHYA

Kuya 2017-11-10 08:17:20

 
Share on:
 
Yasuwe:749
 
Yavuzweho:200
 
10
 
10

Umujyi wa Kigali wagaragaje imishinga 3 y’ikorwa ry’imihanda hagamijwe kuyagura, indi igashyirwamo kaburimbo ndetse n’ikorwa ry’ibiraro mu rwego rwo gufasha abayigendamo koroherwa n’ingendo no gukemura ikibazo k’imodoka zigenda ziyongera muri Kigali mbere ya 2019.

JPEG - 363.8 kb
Uyu ni umwe mu mihanda irimo gukorwa mu Mujyi wa Kigali mu rwego rwo koroshya ingendo

Umuyobozi w’ishami ry’ibikorwarezo mu Mujyi wa Kigali Eng. Rwunguko J. d’Amour, mu kiganiro kihariye yagiranye n’Imvaho Nshya avuga ko bafite gahunda yo guteza imbere umugi mu byerekeranye n’imihanda ikabasha gukorwa neza kandi ikabasha kwakira umubare mwinshi w’imodoka zigenda ziyongera.

Eng. Rwunguko avuga ko mbere yo gufata icyo kemezo ari uko byagaragaraga ko imihanda yari mito ugereranyije n’uko imodoka zigenda ziyongera kuva aho u Rwanda rumaze kwinjirira mu muryango w’bihugu bigize Afurika y’iburasirazuba biba ngombwa ko hatekerezwa kongera ingano y’imihanda kugira ngo abantu bashobore kujya muri gahunda zabo badakererewe.

Eng. Rwunguko agira ati “Imishinga dufite yo gukora imihanda ni myinshi yaba ari iyatangiye ubu ndetse n’indi yo mu gihe kirambye tugendeye ku gishushanyombonera cy’Umujyi wa Kigali”.

Muri iyo minshinga itandukanye atangaza harimo uwitwa “Kongera uburebure bw’imihanda isanzwe mu mugi ku bilometero 54”, imwe yagenderwagamo ikerekezo kimwe mu byerekezo 2 ariko ari igisate kimwe ikaba ibisate 2 bigenderwamo ikerekezo kimwe.

Abisobanura muri aya magambo “Hari imihanda isanzwe yagenderwagamo mu kerekezo kimwe mu byerekezo 2, igisate kimwe kimwe, ikaba izongerwa ku buryo ikerekezo kimwe cyajya kigira ibisate 2 by’umuhanda”.

Eng. Rwunguko akomeza avuga ko muri uwo mushinga w’ibilometero 54 harimo umuhanda uva mu masangano y’imihanda yo mu mugi (Rond Point)-Gatsata ku magaraje. Hazaba harimo kandi umuhanda uva mu masangano ya Kanogo-Rwandex- Sonatubes- Prince House.

Muri ibyo bilometero hazanakorwamo agahanda gatoya gaturuka ‘Down Town’ ugera Yamaha, ndetse hakabonekamo uva Nyabugogo- Gitikinyoni.

Akomeza atangariza Imvaho Nshya ko indi mihanda iri muri ibyo bilometero 54 mu Mujyi wa Kigali, avuga ko imwe n’imwe yari iy’ibitaka wasangaga itanakoreshwa neza izagirwa kaburimbo ariko ikaguma igenderwamo ibyerekezo byombi kandi ari ibisate bibiri.

Muri iyi mihanda agaragazamo umuhanda wa Nyanza Kicukiro-Rebero-Kimisange-Nyamirambo, hakaba uturuka Rwandex-Kimihurura-Kigali Convention Center n’umuhanda Nyacyonga-Batsinda-Kagugu n’indi itandukanye.

Nk’uko abitangaza muri uwo mushinga wa kilometero 54 watangijwe mu 2017, ibimaze gukorwa bigera ku gipimo cya 25% mu gihe umushinga uteganywa kuzarangira muri 2019, aha kandi hakazakorwamo n’ikiraro kinini cya Nyabugogo ahitwa kwa Mirimo kerekeza Gatsata.

Eng. Rwunguko atangaza ko umushinga wa kabiri urebana n’imihanda inyura mu makaritsiye y’umugi ingana n’ibilometero 105, iyo ikazorohereza abahatuye gutaha ahantu hasukuye kandi uwo mushinga ukaba umaze kugera ku ntera ishimishije.
Agira ati “Uwo mushinga watangiye muri 2014, muri kilometero 105 ziteganyijwe uyu mwaka wa 2017 uzarangira hakozwe ibilometero 64 ibisigaye bikazakorwa nyuma”.

Umushinga wa 3 ni uwo kwagura umuhanda werekeza ku kibuga mpuzamahanga k’indege cya Bugesera, avuga ko uzaturuka Sonatubes, Gahanga ukagera ku Kagera ahitwa mu Karumuna aho Umujyi wa Kigali ugarukira, hanyuma igice gisigaye kizakorwe n’abubaka ikibuga k’indege. Gusa avuga ko inyigo yawo ikirimo gukorwa ngo harebwe uburyo ikerekezo cyawo kimwe cyagira ibisate 2. Uwo mushinga ugamije kongerera ubushobozi umuhanda uhasanzwe kugira ngo worohereze abantu bagana icyo kibuga.

Uyu muyobozi kandi ananyomoza amakuru y’uko haba hari umuhanda umwe wakozwe nabi mu Mujyi wa Kigali ukaba wasubirwamo, avuga ko nta makosa yabayemo kuko wakozwe uko wari uteganyijwe. Abishingira ko buri muhanda wose ukorwa ugira umumwenjenyeri wabyize unabihugukiwe uba ugomba kuwukurikirana.

Ubuyobozi bw’Umujyi wa Kigali bukaba busaba buri wese ukoresha imihanda kurangwa n’isuku ntibayanduze bajugunya imyanda aho babonye kuko hari aho yagenewe kujugunywa. Ikindi ni uko Umujyi wa Kigali urimo kureba uburyo imodoka nini zitwara abantu rusange zazajya ziharirwa igisate kimwe cy’umuhanda mu gihe ufite ibisate bibiri ku kerekezo kimwe bigakorwa mu masaha abagenzi ari benshi.

SEZIBERA ANSELME

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE