2017-11-17 14:59:33 clouds 27o High | Kigali Rwanda

Dukurikire:
 
 

RALGA yasabye Inzego z’ibanze kurushaho kunoza imikoranire

Yanditswe na IMVAHO NSHYA

Kuya 2017-11-10 08:10:20

 
Share on:
 
Yasuwe:129
 
Yavuzweho:200
 
10
 
10

Ishyirahamwe ry’Uturere n’Umujyi wa Kigali (RALGA) ryeretse abagize Inzego z’ibanze ibyavuye mu bugenzuzi bwakorewe mu baturage hagamijwe kureba uko imikorere n’imikoranire hagati y’izo nzego ubwazo ihagaze ndetse no kureba uko ubuyobozi bwegera abaturage bubagaragariza ibibakorerwa.

JPEG - 282.5 kb
Abayobozi b’Inzego z’ibanze mu Mujyi wa Kigali basabwe kugira imikorere n’ imikoranire inoze (Foto Niyonsenga S.)

Nyuma yo kubereka ibyavuye muri ubwo bushakashatsi, RALGA yasabye inzego z’ibanze kunoza imikorere zigakorera mu mucyo ndetse zikereka abaturage ibyo zibakorera kugira ngo babitangeho ibitekerezo.

Umukozi wa RALGA ushinzwe imiyoborere myiza, Nyiransabimana Venantie yagize ati “Byakozwe kugira ngo turebe niba inzego z’ibanze zikora neza ibyo zishinzwe, tukanareba imbogamizi bahura na zo hanyuma tukanahana ibitekerezo n’inama kugira ngo izo mbogamizi zikosorwe bityo abaturage babashe kwishimira ubuyobozi bitoreye.”

Umunyamabanga mukuru wa RALGA, Rugamba Egide, yavuze ko byagaragaye ko hari inzego nyinshi abaturage baheruka batora ntibamenye aho zarengeye, ibintu ngo byiganje cyane mu midugudu.

Rugamba yagize ati “Ubu bushakashatsi icya mbere bureba ni uruhare rw’abaturage mu bibakorerwa, tukanareba ngo abatowe bakorana bate n’abo bahagarariye kuko si byiza ko umuturage aheruka agutora, niba waratowe uri umujyanama uhagarariye ikiciro runaka uba ugomba kugira igihe ukongera ugahura n’abagutoye bakaguha ibitekerezo ubajyanira ku buyobozi ariko ukazongera kugaruka ukababwira uko ibyo bitekerezo byakiriwe aho wabijyanye.

Nko mu midugudu usanga abaturage bazi abayobozi babiri gusa, usanga bazi umuyobozi n’umuntu ushinzwe umutekano gusa, abandi batowe ntibaboneka.”
Bamwe mu bayobozi b’Inzego z’ibanze beretswe ubu bushakashatsi bemeza ko imikoranire hagati y’inzego z’ibanze ikeneye imbaraga.

Bigirimana Joel (Umukuru w’umudugudu) yagize ati “Twifuza ko hazashyirwaho uburyo bwo gusobanurira abantu inshingano zabo kuko nko mu midugudu usanga abatorwa akenshi baba batazi icyo batorewe, ibyo bituma habaho kugongana mu nshingano cyangwa se gutererana inshingano, bituma usanga byose bikurikiranwa n’umuyobozi w’umudugudu.

Hari ariko n’abayobozi b’imidugudu bamwe banga gufatanya n’abandi baba baratowe bitewe n’uko hari ubwo baba bafitemo inyungu bagashaka kwikubira.”

RALGA kandi yanagaragaje ko kuba mu mwaka wa 2012 abaturage baragiraga uruhare mu gufata ibyemezo mu nzego z’ibanze ku kigero cya 69.9% hanyuma mu mwaka wa 2014 icyo kigero kikamanuka kikagera kuri 50% bigaragaza ko habayeho gusubira inyuma, iyo akaba ari imwe mu mpamvu zatumye iri huriro ry’Uturere n’Umujyi wa Kigali rifatanya n’Umuryango w’Ubumwe bw’u Burayi bagatangiza umushinga wa DALGOR, ugamije kongerera ubushobozi Inzego z’ibanze kugira ngo zibashe gukora neza ibyo zisabwa n’inzego zo hejuru, kuzifasha guhura no guhuza gahunda hagati yazo ndetse no kuzifasha kugaragariza abaturage ibyo zibakorera.

Umushinga wa DALGOR uterwa inkunga ya 90% n’Umuryango w’Ubumwe bw’u Burayi, watangijwe muri Mutarama 2016 ukazamara imyaka itatu aho byitezwe ko uzafasha Inzego z’ibanze kurushaho gukemura ibibazo by’Abanyarwanda.

NIYONSENGA SCHADRACK

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE