2017-11-23 07:40:03 clouds 27o High | Kigali Rwanda

Dukurikire:
 
 

Indangamuntu izajya yifashishwa n’abakoresha mituweli mu kwivuza

Yanditswe na IMVAHO NSHYA

Kuya 2017-11-08 07:34:52

 
Share on:
 
Yasuwe:1451
 
Yavuzweho:200
 
10
 
10

Ubuyobozi bw’Ikigo cy’ubwiteganyirize bw’abakozi (RSSB) Ishami rya mituweli, buratangaza ko umwaka utaha wa mituweli hazatangira uburyo bw’ikoranabuhanga mu kwishyura imisanzu ku banyamuryango, bigahita bigaragara muri ‘system’, bityo uwishyuye akaba yakwitwaza indangamuntu mu kwivuza, bidakuyeho ko n’amakarita azakoreshwa kuri bamwe batarageza ku myaka yo kuzifata.

JPEG - 154.7 kb
Ikarita y’ubwisungane mu kwivuza izakoreshwa ariko n’indangamuntu na yo izakoreshwa n’abayifite

Nk’uko bisobanurwa na Ntigurirwa Deogaratias, Umuyobozi muri RSSB ushinzwe ubukangurambaga no kwandika abanyamuryango ba mituweli, ngo hafashwe ingamba zo kugabanyiriza imvune abakoresha mituweli hashyirwaho uburyo bw’ikoranabuhanga mu kwishyura, bityo bikazafasha abakoresha mituweli gukoresha indangamuntu zabo bitabaye ngombwa ko bajya gushaka amakarita, kuko amakuru yose y’imisanzu y’umuryango azaba ari mu mashini za RSSB.

Ati “Umwaka utaha tuzatangira gukoresha uburyo bw’ikoranabuhanga mu kwishyuza abanyamuryango, bityo umuryango wishyuye uzajya uhita ugaragara mu mashini zacu ndetse na we ahabwe amakuru kuri telefoni ye ko imisanzu ye yakiriwe.”

Avuga ko icyo gihe umuryango uzaba ubasha kujya kwivuza, bagashyiramo amazina y’umuyobozi wawo, bityo agahita agaragara mu mashini ko yishyuye, agahita avurwa hadategerejwe ko yerekana ikarita.

Ntigurirwa avuga ko kwivuza umuntu akoresheje indangamuntu bitazakuraho ko amakarita atangwa ku batarageza igihe cyo gufata indangamuntu kugira ngo bagaragaze ko ari bo koko.

Uyu muyobozi atangaza kandi ko imisanzu ya mituweli izajya itangwa hakoreshejwe uburyo bwo kohereza amafaranga hakoreshejwe imirongo y’itumanaho, ngo bitabujijwe ariko ko no kwishyurira ku mabanki no ku bigo by’imari bizakomeza ku babishaka.

Ati “Ubundi buryo twashyizeho ni ubwo kwishyura hakoreshejwe imirongo y’itumanaho, aho umuntu azajya yishyura muri ubwo buryo azajya ahita abona ubutumwa bumwemeza ko imisanzu ye yakiriwe na RSSB.”

Ngo ibyo byose bizajyana n’uko urutonde rw’abanyamuryango ruzaba rumaze gushyirwa mu buryo bw’ikoranabuhanga, abishyuye bagahita bagaragara mu mashini za RSSB.

Abaturage bategerezanyije amatsiko uburyo bushya bw’ikoranabuhanga, aho bamwe muri bo bavuga ko bwafasha cyane kandi bukabarinda gusiragira bashaka amakarita yo kwivurizaho na kashe ngo kuko biri mu bibafata umwanya munini, cyane cyane mu ntangiriro z’umwaka wa mituweli.

Karamaga François atuye mu Kagari ka Kabasengerezi, Umurenge wa Muhima, avuga ko ubu buryo asanga bwaratinze kuko bugiyeho bwazafasha cyane abanyamuryango ba mituweli kwivuza batabanje gusiragizwa mu gushaka amakarita.
Ati “Nakwishimira cyane icyagabanyiriza imvune abaturage bakoresha mituweli kuko basiragira cyane bashaka amakarita na kashe kugira ngo babashe kwivuza. Ubu buryo bwadufasha rwose, kuko umuntu yajya yishyurira umuryango we, agahita abona ubutumwa bubyemeza ahasigaye agafata indangamuntu ye akaba ari yo ajyana kwivuza ikagaragara ko ari we koko.”

Mutimucyeye Candide we ni uwo mu Murenge wa Rugenge, Akarere ka Nyarugenge, yemeza ko ubu buryo bubaye bushyizweho umwaka utaha bugatangira gukoreshwa bwakwihutisha serivisi abanyamuryango bakenera muri RSSB, kandi ngo byanagabanyiriza n’abakozi babo imirimo myinshi bakoraga.

Ati “Erega ubu buryo bw’ikoranabuhanga bwagirira akamaro impande zombi, abaturage bivuriza kuri mituweli ndetse n’abakozi ba RSSB kuko bwabagabanyiriza imirimo yo gutanga amakarita no kuyatera kashe.”

Ibi byose birakorwa na RSSB mu gushaka umuti w’ibibazo bikunze kugaragara mu ntangiriro z’umwaka wa mituweli, mu gihe cyo gutanga amakarita no guterera kashe abanyamuryango bishyuye, akaba ari mu rwego rwo gutanga serivisi nziza ku bakoresha ubwishingizi bwa mituweli.

MUGISHA BENIGNE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE