2017-11-18 15:01:27 clouds 27o High | Kigali Rwanda

Dukurikire:
 
 

Itangazamakuru turebe umusanzu twaha Afurika-Mushikiwabo

Yanditswe na IMVAHO NSHYA

Kuya 2017-11-08 06:54:14

 
Share on:
 
Yasuwe:94
 
Yavuzweho:200
 
10
 
10

Minisitiri w’Ububanyi n’Amahanga, Ubutwererane n’Umuryango w’ibihugu by’Afurika y’Iburasirazuba, Louise Mushikiwabo, avuga ko kwizihiza umunsi nyafurika w’Itangazamakuru ari igihe kiza kirangwamo n’ibiganiro bigamije kureba inkunga itangazamakuru ryaha uwo mugabane mu kugaragaza ibyo ugenda ugeraho hifashishijwe ikoranabuhanga.

JPEG - 296 kb
Uwa kabiri uvuye ibumoso ni Minisitiri Louise Mushikiwabo, abanjirijwe na Prof. Shyaka Anastase, akurikiwe na Fode Ndiaye wa One UN Rwanda na Havugimana Aldo uhagarariye ARJ (Foto James R.)

Yabivuze ejo hashize ku itariki ya 7 Ugushyingo 2017 ubwo hizihizwaga umunsi nyafurika w’itangazamakuru. Mushikiwabo agira ati “Kwizihiza umunsi nyafurika w’itangazamakuru ni iby’ingirakamaro kuko ari igihe kiza cyo kureba umusanzu itangazamakuru ryatera uwo mugabane, ukaba umwanya wo kureba inkunga Afurika yaterwa n’abayituye bashyize hamwe, kureba ibibazo itangazamakuru rigihura na byo ndetse n’uburyo ryakwifashisha ikoranabuhanga rigenda riza mu kubigaragaza”.

JPEG - 289.1 kb
Mu biganiro byafunguraga umunsi nyafurika w’Itangazamakuru abitabiriye baboneyeho no gufata ifoto y’urwibutso (Foto James R.)

Avuga ko uyu munsi ari uw’ingirakamaro ku Rwanda, ku itangazamakuru, kubera ibiganiro biganirwamo ndetse no ku itangazamakuru mu ikoranabuhanga rigenda riganwamo.

Agaruka ku mavu n’amavuko y’uyu munsi, Minisitiri Mushikiwabo atangaza ko washyizweho n’icyahoze ari Umuryango w’ubumwe bwa Afurika (OUA), yerekana ko ugirana isano n’ishyirwaho ry’Ibiro ntaramakuru by’Afurika “Panafrican News Agency” byashyizweho n’amasezerano y’Abaminisitiri b’Itangazamakuru yasinyiwe Addis Ababa muri Ethiopia mu 1979, rigatangira imirimo mu 1983.

Avuga ko icyari kigamijwe byari ukugira ngo habeho gukorera hamwe nk’abanyafurika mu gukora no gutangaza inkuru zigaragaza Afurika nyayo mu iterambere. Asaba ko itangazamakuru kugaragaza ibigerwaho mu bihugu haba mu mibereho myiza y’abaturage, ubukungu buhari, uburinganire ku batuye Afurika.

Mushikiwabo agaruka ku itangazamakuru mu Rwanda muri iki gihe, avuga ko ryagutse rikaba ritanga umusaruro ugaragara haba mu bwinshi no mu bwiza.

Yashimye Itorero ry’abanyamakuru (Impamyabigwi) ryagize uruhare mu gutekereza ko uwo munsi wazongera ukizihizwa mu Rwanda ubwo barimo batorezwa i Nkumba muri 2015.

Mushikiwabo avuga ko itangazamakuru rigomba no kwifashisha ikoranabuhanga ririho (digital system) mu bushobozi bwose bushoboka mu guhanga ibishya mu ngeri zinyuranye ritangaza amakuru.

Yishimiye ko yigeze kuba Minisitiri w’Itangazamakuru kandi azakomeza kuba hamwe na ryo, aryizeza inkunga ya Guverinoma mu iterambere ryaryo kugira ngo intego zigende zigerwaho, abifuriza gukora kinyamwuga.

Umuyobozi mukuru w’Urwego rw’Igihugu rw’Imiyoborere, RGB, Prof. Shyaka Anastase, avuga ko u Rwanda rwizihiza uwo munsi nyafurika w’Itangazamakuru kuko ruri muri Afurika nka Guverinoma ndetse n’itangazamakuru ryaho.

Avuga ko u Rwanda ruwizihiza kubera ko itangazamakuru ryaho ryagaragaje insinzi mu mikorere myiza kandi rifite umusaruro mwiza ritanga mu bwiza no mu bwinshi haba ku gihugu no kuri Afurika.

Agaruka ku ikoranabuhanga rya digitali u Rwanda rwahisemo gukoresha, avuga ko itangazamakuru ritasigaye mu kurikoresha ndetse rituma Afurika igaragaza ibyiza igeraho nubwo hari aho ryabangamiye itangazamakuru ryandika.

Agira ati “Ku isi ikoranabuhanga ryateye imbere, itangazamakuru rigomba kureba aho rikwiye kwerekeza muri iyo si nshya, rishobora gukora ibitangazamakuru bike ariko bihuje imbaraga rikabyaza umusaruro iryo koranabuhanga kandi abaturage bagaragaza ko baryishimiye”.

Prof. Shyaka avuga ko mbere ya 1995 mu Rwanda habarizwaga televiziyo 1 gusa ubu hakaba hari 15, muri uwo mwaka kandi hari radiyo imwe ariko ubu zigera kuri 35 hakaba n’ibinyamakuru byandika bisaga 100.

Havugimana Aldo uyobora ishyirahamwe ry’abanyamakuru (ARJ) mu ijambo rye na we yishimiye uburyo ikoranabuhanga ryahinduye imikorere y’ibitangazamakuru nubwo hari ibyo ryabangamiye ariko hakwiye gushakirwa hamwe uburyo bushya bwo kugendana na ryo mu mikorere.

SEZIBERA ANSELME

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE