2017-11-17 14:59:33 clouds 27o High | Kigali Rwanda

Dukurikire:
 
 

Kirehe:Ubwitabire bwa mituweli ya 2017-2018 bugeze kuri 87%

Yanditswe na IMVAHO NSHYA

Kuya 2017-11-07 07:36:03

 
Share on:
 
Yasuwe:71
 
Yavuzweho:200
 
10
 
10

Abayobozi bo ku rwego rw’umudugudu, mu Karere ka Kirehe, bavuga ko bagiye gushyira imbaraga mu bukangurambaga mu ngo zitaratanga mituweli, kugira ngo uyu mwaka wa 2017 uzarangire abaturage bose baratanze imisanzu ya mituweli.

JPEG - 210.7 kb
Mu karere ka Kirehe ubwitabire mu gutanga mituweli muri uyu mwaka 2017-2018 bugeze kuri 87% (Foto Manishimwe N)

Abayobozi baganiriye n’Imvaho Nshya bagaragaza ko abaturage bamaze gusobanukirwa akamaro ka mituweli mu buzima bwabo, kuko uyifite akarwara, yihutira kugera kwa muganga akavurwa ku giciro gito cyane.

Icyakora n’ubwo umwaka ushize wa 2016-2018 warangiye Akarere ka Kirehe kari mu turere 4 twa mbere, dufite abaturage bitabiriye gutanga ubwisungane mu kwivuza, ku gipimo cya 98%, muri uyu mwaka ho ubwitabire buracyari hasi kuko abagera kuri 13% batari babutanga.

Mwongereza Félecien, uyobora umudugudu wa Kabusunzi, Akagari ka Ntaruka, aganira n’Imvaho Nshya yagize ati “Mu mudugudu wange twatanze mituweli, tugeze kuri 95 %, abandi na bo babuzeho Leta yarabishyuriye, ni ba bandi b’abakene bo mu kiciro cya mbere cy’ubudehe bishyuriwe na ‘Parterners in Health.”

Icyakora hari naho mu yindi midugudu ubwitabire butari bwagera ku 100%, nko mu mudugudu wa Gashasha, mu murenge wa Nasho nk’uko umuyobozi wawo yabisobanuye mu kiganiro n’Imvaho Nshya.Nyuma aragaragaza n’ingamba bafashe kugira ngo abataratanga mituweli bihutire kuyitanga.

Ati “Mu mudugudu wange hari ingo zirimo zigera kuri 20, mu ngo 135 mfite; abantu bataratanga mituweli. Usanga ari ba bantu bagenda biganyira, ni bo tugenda twigisha ko bakwiye gukurikira inzira nziza yo gutanga ubwisungane mu kwivuza.

Igikenewe tugiye gushyiramo imbaraga ni ubukangurambaga bugeze kuri buri rugo, ku buryo uyu mwaka (2017) urangira ari 100%”

Umuyobozi w’Akarere ka Kirehe Muzungu Gerard, avuga ko abaturage bose bakwiye kwitabira ubwisungane mu kwivuza 100%, kugira ngo babe bafite ikizere ko ubuzima bwabo buri mu bwishingizi, ku buryo n’iyo batungurwa n’uburwayi ntawagira imbogamizi zo kwivuza.

Asaba kandi abayobozi gushishikariza abaturage kwitabira gutanga mituweli, Kirehe ntizasubire inyuma mu kugira abaturage bitabira gutanga mituweli.

Ati “Ndagira ngo nsabe abayobozi, umwaka ushize (2016-2017) twasoje turi ku isonga kuri 98%, ariko ubu ndabona hari uturere turi kuducaho. Uyu munsi turi ku mwanya wa 6 ku bwitabire bwa 87%, turacyafite urugamba. Umuhigo dufite ni uko abaturage bacu bose bazitabira mituweli 100%, ni yo mpamvu tugomba gufata ingamba, nk’izo twari twafashe mu mwaka ushize, ntituzasubire inyuma.”

Akarere ka Kirehe gatuwe n’abaturage basaga ibihumbi 340, batuye mu mirenge 12, mu tugari 60 n’imidugudu 612.

MANISHIMWE NOËL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE