2017-12-11 14:03:29 clouds 27o High | Kigali Rwanda

Dukurikire:
 
 

RDRC yasabye KVCS gusobanurira Abanyarwanda uburyo bushya bwo kwishyuza parikingi

Yanditswe na IMVAHO NSHYA

Kuya 2017-11-07 07:23:26

 
Share on:
 
Yasuwe:238
 
Yavuzweho:200
 
10
 
10

Komisiyo y’igihugu ishinzwe gusubiza mu buzima busanzwe abahoze ku rugerero (RDRC) yatumije ubuyobozi bwa koperative ya KVCS isanzwe izwi mu bikorwa byo kwishyuza za parikingi mu Rwanda kugira ngo isobanurire Abanyarwanda imikorere yayo cyane cyane uburyo bushya bw’ikoranabuhanga mu kwishyuza parikingi (E parking and Payment). Ibi RDRC ibikoze mu gihe hirya no hino muri iyi minsi hakomeje kumvikana abatwara imodoka bivovotera ubu buryo bw’ikoranabuhanga.

JPEG - 217.1 kb
Mukantabana Seraphine uyobora RDRC ari kumwe na Lt Co (Rtd) Mushabe David mu kiganiro n’abanyamakuru (Foto_ Niyonsenga S)

Bamwe mu bashoferi bafite imodoka zishyuzwa amafaranga ya parikingi mu Mujyi wa Kigali baganiriye n’Imvaho Nshya bavuga ko ubu buryo bwa KVCS mu kubishyuza burimo ibibazo byinshi ndetse bamwe banemeza ko hari abakozi b’iyi koperative badasobanukiwe neza ubu buryo.

Umushoferi witwa Nyandwi Augustin yagize ati “Njye hari ubwo mba nibereye mu rugo nkabona ubutumwa bugufi ngo uparitse ahantu aha n’aha kandi imodoka yanjye iri aho mu rugo, ubwo icyo bakora batangira kumbaraho ideni kandi ndengana, noneho nyuma y’iminsi ingahe bagatangira kumbwira ko nintishyura iryo deni nzacibwa amande.”

Naho Ndahimana Norbert we ati “Ikoranabuhanga ni ryiza ariko ibintu bya KVCS birimo amananiza menshi, ntiwahora ujya kwerekana ko bakurenganyije ngo uzabivemo, aba bakozi ba KVCS bigaragara ko harimo abatabyumva, maze iminsi numva bagenzi banjye bavuga ko KVCS ikomeza kubabaraho amadeni batemera.”

Kimwe n’abandi bashoferi batandukanye baganiriye n’iki kinyamakuru kuri iyi ngingo bemeza ko iri koranabuhanga ririmo ibibazo byinshi bishingiye ku kwishyuzwa amafaranga batigeze baparika aho ideni rivugwa, gucibwa amande batemera, kubura abakozi ba KVCS hafi ngo babakure mu bishyuzwa, bamwe mu bakozi batazi neza uko gahunda ikora, kudasobanurirwa ibyo baba basabwa bakisanga baciwe amande batari bazi mu gihe baparitse nyamara ntibishyuzwe.

Mu kiganiro cyatumiwemo abanyamakuru ku itariki ya 03 Ugushyingo 2017, ubuyobozi bwa KVCS bwasobanuye neza imvano y’uko kwivovota kw’abashoferi bunaboneraho gushimangira ko ‘e-parking and payment’ atari ikibazo ko ahubwo ari igisubizo ku bafite imodoka mu Rwanda.

Lt Col (Rtd) Mushabe David uyobora KVCS, yagize ati “Umushoferi ashobora kurengana bitewe no kutabimenya, ni na cyo turwana na cyo kugira ngo abantu babimenye, tubasaba kwiyandikisha. Iyo amenye ko yarenganyijwe ahamagara nimero y’umukozi wamwanditseho ideni cyangwa akaza ku biro byacu kuko ibikorwa byose bitugeraho noneho bakabasha kumukosorera ikibazo yaba yagize.”

Gahunda ya ‘E-parking and payment’ ikorwa n’umukozi wa KVCS, yifashisha telefone ye akandika imodoka yinjiye muri parikingi hanyuma akaza kongera kuyikura muri parikingi n’ubundi yifashishije iyo telefone, imodoka yose iparitse ahantu yishyuzwa amafaranga ajyanye n’ingano yayo bikamara amasaha atanu gusa, bigahagarara, nta modoka yishyuzwa parikingi ebyiri mu isaha imwe, nyiri imodoka yishyura akoresheje uburyo bwa mobile money mu gihe kitarenze iminsi 7 nk’uko byasobanuwe na Jean Bosco Rwagatare, umukozi ushinzwe ikoranabuhanga muri KVCS.

Lt Col (Rtd) Mushabe ati “Hari itegeko rishyiraho uku kwishyuza amahoro ya za parikingi hakabaho n’amabwiriza ya njyanama y’Umujyi wa Kigali kuko dukorera Uturere n’Umujyi, Itegeko rishyiraho KVCS risobanura ko ubundi amande ari amafaranga ibihumbi 10 ku modoka imaze amasaha 24 itishyuye parikingi gusa twe twashyizeho iminsi 7 mu korohereza abantu, umuntu rero ashobora kutishyura 100 akazisanga bamusaba 10100.”

Umuyobozi mukuru wa RDRC Mukantabana Seraphine yasabye KVCS kumenyekanisha ibikorwa byayo mu gihe cya vuba, ati “Ibintu musobanura ni ingirakamaro, hazarebwe uburyo hategurwa ubundi buryo bwo gusobanurira Abanyarwanda ibi bintu kugira ngo bikure urujijo kuri koperative yanyu kuko mu by’ukuri ibibavugwaho hanze nta bwo ari byiza. Mubitegure, mutegure ibisobanuro byimbitse muhereye ku byo mutubwiye hanyuma n’abaturage batumirwe kugira ngo mubasobanurire imikorere ya E parking and payment.

Ubu buryo bwa E parking and payment bwashyizweho mu rwego rwo kunoza serivise zihabwa abafite ibinyabiziga bisoreshwa ndetse no gushyira mu bikorwa gahunda ya Leta yo kugabanya amafaranga mu ntoki z’ abantu.

NIYONSENGA SCHADRACK

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE