2017-11-17 14:59:33 clouds 27o High | Kigali Rwanda

Dukurikire:
 
 

Umunsi nyafurika w’Itangazamakuru, igihe kiza cy’ukuri

Yanditswe na IMVAHO NSHYA

Kuya 2017-11-07 07:11:31

 
Share on:
 
Yasuwe:150
 
Yavuzweho:200
 
10
 
10

Umuyobozi w’ishami ry’itangazamakuru mu kigo k’igihugu k’imiyoborere Mbanda Gerard, atangaza ko ku nshuro ya 2 u Rwanda rugiye kwizihiza umunsi nyafurika w’itangazamakuru ari ibihe byiza byo kunyomoza amakuru y’uko umugabane w’Afurika ari uw’ibibazo, ubukene, ruswa n’amacakubiri.

JPEG - 192.3 kb
Mbanda Gerard usaba itangazamakuru rya Afurika guhuza imbaraga mu kugaragaza Afurika nyayo itari iy’ibibazo

Uyu munsi nyafurika w’itangazamakuru urizihizwa uyu munsi, tariki ya 7 Ugushyingo 2017, aho mu Rwanda haba ibiganiro n’itangazamakuru, hakanabaho guhemba abanyamakuru bitwaye neza mu nkuru zinyuranye.

Mu kiganiro yagiranye n’Imvaho Nshya, Mbanda yagize gira ati “Uwo munsi ujyaho icyari kigamijwe ni uruhare rw’itangazamakuru mu kuvanaho imvugo zatangazwaga n’itangazamakuru ryo ku yindi migabane ryagaragazaga ko Afurika irangwa n’ubukene na ruswa n’ibindi, ahubwo tugaharanira kugaragaza n’ibyiza byawo n’isura nyayo bitavugwa mu kuwuteza imbere”.

Asaba ibitangazamakuru guhuza imbaraga bikanyomoza amakuru atari ay’ukuri kuri Afurika ndetse no guharanira kugira ibinyamakuru bikomeye zibasha guhangana n’inkuru zidafatika zivuga kuri Afurika.

Mbanda atangaza ko uwo munsi washyizweho n’icyahoze ari Umuryango w’ubumwe bw’Afurika (OUA) mu gihe ibihugu byo kuri uwo mugabane byaharaniraga ubwigenge ariko nyuma kuwizihiza bigenda bicika intege ahubwo hashyirwa imbaraga ku munsi mpuzamahanga w’ibwisanzure bw’itangazamakuru.

Akomeza avuga ko uwo munsi nyafurika w’itangazamakuru wagiye ugirana isano ya hafi n’ishyirwaho ry’Ibiro ntaramakuru by’Afurika “Panafrican News Agency” byashyizweho n’amasezerano y’Abaminisitiri b’Itangazamakuru yasinyiwe Addis Abeba muri Ethiopia mu 1979, aho byaje gutangira imirimo yabyo mu 1983 hafungurwa ikicaro cyabyo i Dakar muri Senegal.

Mbanda avuga ko insanganyamatsiko igenderwaho igira iti “Ni gute itangazamakuru ry’Afurika ryakwitwara muri iri koranabuhanga!”

Agaruka ku mbogamizi z’uburyo ikoranabuhanga ryabangamiye ibitangazamakuru bisohoka ku mpapuro kuko ryagabanyije umubare w’ababisoma ahubwo bakitabira ibikoresha imbuga za interineti kuko byorohera abasomyi. Gusa avuga ko iryo koranabuhanga rikwiye kubyazwa umusaruro rikabyazwa inyungu zitarimo ubushyamirane n’ibindi bibazo.

Avuga ko ibyo bitangazamakuru byo ku mpapuro bikwiye kureba ubundi buryo budasanzwe bikoramo ngo bidatakaza abakiliya babyo kuko nta we uhangana n’iterambere iyo ryaje.

Umunyamabanga Nshingwabikorwa w’Inama y’Igihugu y’Itangazamakuru, Mbungiramihigo Peacemaker, avuga ko umunsi nyafurika w’itangazamakuru ukwiye kongera guhabwa agaciro kuko icyo washyiriweho kigihari.

Atangaza ko uje nyuma y’ibitekerezo by’anyamakuru (Impamyabigwi) ubwo bitabiraga itorero ry’Igihugu i Nkumba ryabaye tariki ya 03-12 Ukuboza 2015 bagasanga bagomba kugaragaza uruhare rwabo mu kugaragaza Afurika nyayo.

Mbungiramihigo na we ashimangira ibyakomojweho na Mbanda agira ati “Ikibazo cyakunze kubaho na n’uyu munsi ni uko itangazamakuru mpuzamahanga mu bihugu byateye imbere ryahoraga rigaragaza ko Afurika ari umugabane w’ibibazo, w’ubukene, amacakubiri n’ibindi bitandukanye, ugasanga ibyiza Afurika igeraho bidatangazwa mu bitangazamakuru byo hanze y’uwo mugabane”.

Mbungiramihigo yananyomoje amakuru ya bamwe bavuga ko hari aho itangazamakuru harimo n’iry’u Rwanda rimwe na rimwe usanga ritinya gutangaza amakuru mu nzego z’ubuzima zinyuranye ahubwo rikibanda ku myidagaduro kubera gutinya kw’abanyamakuru, atangaza ko bitarimo ukuri kandi atemeranya na bo kuko inkuru zose mu Rwanda zitangazwa iyo zirimo ukuri n’ibimenyetso bifatika.

Agira ati “Inkuru mu nzego zose zinyuranye zirakorwa nta kibazo, Inama y’Igihugu y’Itangazamakuru yagiye ihugura abanyamakuru kenshi mu nzego zinyuranye ndetse bagatangaza amakuru ajyanye n’ibyo bagiye bahugurwamo, wenda igisigaye ni ugukora ubucukumbuzi buhagije mu nkuru zabo izaba zigaragaza ibibazo bigashakirwa ibisubizo.

Ikindi ni uko buri gihembwe Polisi y’igihugu igirana ibiganiro n’itangazamakuru kugira ngo imikoranire n’ubufatanye bikomeze kugenda neza. Si byiza kugendera ku byo amahanga agenda avuga ngo tubyubakireho, hakwiye kurebwa n’ubudasa bw’igihugu cyacu kuko umunyamakuru kimwe n’undi munyarwanda wese abasha gukora inshingano ze mu mutekano uhagije”.

Mu bitekerezo by’abanyamakuru banyuranye na bo bishimiye uyu munsi nyafurika w’itangazamakuru, bavuga ko ari igihe kiza cyo kugaragaza agaciro kabo mu ruhando mpuzamahanga mu kubaka Afurika.

Niyibikora Fidele, avuga ko kwizihiza uwo munsi ari igihe kiza cyo kwerekana aho itangazamakuru ryavuye, aho rigeze n’aho rigana kugira ngo ubukungu n’iterambere ry’Afurika rikomeze kwigaragaza, ibyo kandi bikagerwaho hakorwa ubusesenguzi n’ubucukumbuzi mu nkuru zikorwa.

Niyonzima Oswald wa Kigalitoday agira ati “Umunsi nyafurika w’itangazamakuru, ni igihe cyo kwikebuka tukareba intege nke itangazamakuru ryacu rifite, tukanarebera hamwe uko twakwishakamo ibisubizo haba ku munyamakuru ku giti ke, ku bitangazamakuru dukorera ndetse n’itangazamakuru muri rusange mu Rwanda.”

Cyubahiro Bonaventure agira ati “Nubwo itangazamakuru rikennye kandi ririmo ibibazo, nibura kwizihiza uwo munsi bigaragaza ko rihari kandi rikora, akaba ari n’umwanya mwiza wo kugaragaza ibibazo birimo n’uburyo byakemuka.

Ni ngombwa kuko dufata umwanya wo kwisuzuma no kureba uruhare rwacu mu kubaka Afurika n’ibihugu byacu ntitugumye gukora twigana itangazamakuru ry’abanyamahanga yateye imbere rihora ridupfobya”.

Umunsi nyafurika w’Itangazamakuru ugiye kuba ku nshuro yawo ya 5 urizihizwa none tariki ya 07 Ugushyingo 2017 hanatangwa ibihembo 40 ku banyamakuru n’ibitangazamakuru byitwaye mu buryo bw’umwuga.

SEZIBERA ANSELME

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE