2017-11-18 15:01:27 clouds 27o High | Kigali Rwanda

Dukurikire:
 
 

Karongi:Barahamya ko gahunda ya Girinka yabakuye mu bukene

Yanditswe na IMVAHO NSHYA

Kuya 2017-11-02 07:53:55

 
Share on:
 
Yasuwe:68
 
Yavuzweho:200
 
10
 
10

Bamwe mu baturage bo mu karere ka Karongi, bahawe inka muri gahunda ya Girinka, barahamya ko inka bagabiwe zatumye babasha kwikura mu bukene, ubu bakaba barahinduye ibyiciro by’ubudehe babarizwagamo mbere.

JPEG - 338.3 kb
Inka za Girinka zahinduye imibereho y’abaturage muri Karongi (Foto Vestine D)

Aba baturage bavuga ko inka bahawe zabahaye umusaruro w’amata bakabasha kurinda imirire mibi imiryango yabo, ndetse bakanagurisha bakabona amafaranga abafasha kwihutisha iterambere.

Uretse n’amata, abaganiriye n’Imvaho Nshya bagaragaje ko n’ifumbire izi nka zitanga yabafashije kubona ifumbire bashyira mu mirima yabo, umusaruro w’ubuhinzi uriyongera ku buryo bugaragara.

Habiyakare Simon, umwe mu baturage bahawe inka ya Girinka mu mwaka wa 2006, avuga ko yatumye ava mu kiciro cya mbere cy’ubudehe akajya mu cya gatatu, ubu akaba asigaye yikemurira ibibazo atashoboraga gukemura.

Yagize ati “Mbere yo kugabirwa nari mbayeho nabi cyane ku buryo narwaraga nkabura nuko nivuza kubera kubura amikoro, tugahinga ntitweze kubera ko twahinze tudafumbiye, maze kugabirwa iyi nka narayoroye irabyara nditura, mbona amata, ndahinga nkeza neza.

Kubera kugurisha icyo ibyaye, naguzemo isambu nyiteramo ibiti by’ikawa 600, ubu sinatinya kwaka banki inguzanyo ya miliyoni eshatu, mfite insina za kijyambere nkazifumbiza ifumbire y’inka, nayihawe ndi mu kiciro cya mbere, ubu ndi mu cya gatatu”.

Umuyobozi w’Akarere ka Karongi Ndayisaba Francois, avuga ko gahunda ya Girinka yahinduye byinshi, aho ngo inka umuturage yafashe neza imuha amata akagurisha, akabona ifumbire imyaka ikera, umwana wari kurwara bwaki ntiyongere kuyirwara, ikibazo k’imirire kikava mu rugo uwo mwanya.

Yagize ati “Kuva Girinka yatangira tumaze gutanga inka zisaga 6300, ikigaragara ni uko abo zagezeho zibagirira akamaro, dufatanyije n’abafatanyabikorwa batandukanye gahunda ya Girinka turayikomeje ku buryo wa muturage w’umunyarwanda utishoboye ahabwa inka ndetse turateganya ko buri munyarwanda uzaba adafite inka, azayihabwa”.

Akarere ka Karongi kamaze gutanga inka zisaga 6300, intego ikaba ari ugutanga inka 8573, Izi nka zimaze gutangwa kandi zagize uruhare mu gukura abaturage mu bukene bukabije, dore ko imibare igaragaza ko kavuye kuri 38,9%, kakagera kuri 21,3%, nk’uko byagaragajwe n’ubushakashatsi bwakozwe mu mwaka wa 2014-2015.

DUSINGIZUMUREMYI VESTINE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE