2017-11-24 09:36:46 clouds 27o High | Kigali Rwanda

Dukurikire:
 
 

Kamonyi: Abaturage barishimira amazi meza bagejejweho nyuma y’imyaka 47

Yanditswe na IMVAHO NSHYA

Kuya 2017-11-02 07:39:28

 
Share on:
 
Yasuwe:92
 
Yavuzweho:200
 
10
 
10

Abaturage bo mu mudugudu wa Ruramba mu murenge wa Rugalika mu karere ka Kamonyi barishimira amazi meza bagejejweho nyuma y’imyaka hafi 47 bavoma ibirohwa by’uruzi rwa Nyabarongo byajyaga bibagiraho ingaruka z’uburwayi.

JPEG - 101.7 kb
Ku ivomo usanga abaturage ari benshi bishimiye amazi bahawe

Bamwe mu baturage baganiriye n’Imvaho Nshya, bayitangarije ko bamaze imyaka hafi 47 bavoma amazi mabi bakuraga mu mugezi wa Nyabarongo kubera kubura uko bagira nyuma akabagiraho ingaruka z’uburwayi.

Rwabuhigi Ladislas w’imyaka 47 agira ati “Turashimira Leta y’ubumwe bw’Abanyarwanda ihora izirikana ibibazo by’abaturage ikaba iduhaye amazi meza. Kuva navuka nasanze ababyeyi banjye bavoma amazi ya Nyabarongo asa nabi kubera ibitaka. Nta kundi twari kugira, umuntu yapfaga kuyanywa rimwe na rimwe bikanadutera uburwayi bw’inzoka n’izindi ziterwa n’umwanda”.

Karekezi Pierre Claver avuga ko ikibazo cy’amazi mabi cyatumaga bahorana uburwayi budashira bagahora kwa muganga ndetse n’imibereho yabo ugasanga idahagaze neza.

Ikindi ni uko bahoranaga impungenge kuko kuvoma muri urwo ruzi byashoboraga kubaviramo gutwarwa n’amazi cyane cyane iyo boherezaga abana kuvoma.
Akomeza agira ati “Twahoranaga uburwayi budakira bw’inzoka kubera amazi mabi twanywaga bigatuma ubuzima bwacu bumera nabi tugahora kwa muganga, ibyo bikiyongeraho ko abana twoherezaga kuvoma twasigaranaga impungenge ko amazi yabatwara. Nta wabura gushimira Leta uburyo yatuzirikanye ikaba ituvanye muri ubwo buzima umuntu yavuga ko ari bubi”.

Nyuma yo guhabwa ayo mazi meza banatangaza ko hari icyo agiye guhindura mu buzima bwabo.

Mukankaka Blandine avuga ko ikibazo cy’isuku nke ku mubiri no ku myambaro kigiye gukemuka kuko bamesaga imyenda ntike ikanahindura amabara kubera amazi y’ibiziba ndetse n’uruhu rw’umubiri rukangirika ariko bitazasubira.

Ibi kandi binemezwa na Mukampabuka Clementine uvuga ko kuva aho amariba abiri bubakiwe mu mudugudu wa Ruramba muri Nzeri bakabona amazi boga bagacya, bakambara ibikeye kandi nta n’abantu usanga barwariye mu ngo kubera kunywa amazi mabi.

Nubwo aba baturage bo mu murenge wa Rugarika bishimira amazi meza bahawe bavuga ko hari bagenzi babo bagifite icyo kibazo cy’amazi meza kuko ayo bakorewe n’ubudehe imashini yayapompaga yapfuye.

Umunyamabanga Nshingwabikorwa w’Umurenge wa Rugarika Nsengiyumva Pierre Celestin, ashima Leta yatanze amazi ku baturage ba Ruramba, akanatangaza ko ikibazo cy’indi midugudu itayafite kubera imiyoboro y’amazi yangiritse bakizi.

Ati “Hari pompe zari zarapfuye zoherezaga amazi ava ku isoko ya Rwakayange. Twabimenyesheje akarere. Ariko noneho bakoze isuzuma ry’amatiyo mu cyumweru gishize bigaragara ko amwe yahise yangirika. Turashaka uburyo ayo matiyo azasimbuzwa na bo bakabona amazi”.

Avuga ko bishobora guca mu isoko ryo gushaka amatiyo bikaba byatinda ariko ko agize aho aboneka yari asanzwe ari mu karere byahita byihuta.

SEZIBERA ANSELME

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE