2017-11-17 14:59:33 clouds 27o High | Kigali Rwanda

Dukurikire:
 
 

U Rwanda rwazamutseho imyanya 15 mu koroshya ishoramari

Yanditswe na IMVAHO NSHYA

Kuya 2017-11-02 07:33:43

 
Share on:
 
Yasuwe:63
 
Yavuzweho:200
 
10
 
10

Raporo ya Banki y’isi ku koroshya ishoramari n’ubucuruzi “Doing Business 2018” yashyizwe ahagaragara tariki ya 31 Ukwakira 2017, mu rwego rw’isi yashyize u Rwanda ku mwanya 41 n’amanota 73.4% ruvuye kuwa 56 mu bihugu 190, rukaba rukiri ku mwanya wa kabiri mu bihugu byo ku mugabane w’Afurika, nyuma y’Ibirwa bya Maurice biza no ku mwanya wa 25 ku isi n’amanota 77.54%.

JPEG - 205.6 kb
Clare Akamanzi, Umuyobozi mukuru w’ikigo cy’iterambere,RDB

Umuyobozi mukuru w’Ikigo cy’iterambere RDB, Clare Akamanzi yavuze ko kugera kuri uwo mwanya u Rwanda rubikesha amavugurura atanu yakozwe umwaka ushize, 2016/2017, cyane mu bijyanye n’igingo yo koroshya gutanga ibyangombwa by’ubwubatsi hitabwa ku buziranenge n’impanuka zakurikiraho.

Kuri iyi ngingo, u Rwanda rwaje ku mwanya wa kabiri ku isi ruvuye ku mwanya wa kane mu koroshya ibijyanye no kwandikisha umutungo w’umuntu cyangwa ikigo, ruza no ku mwanya wa 6 ku isi mu kwihutisha kubona inguzanyo mu by’ubwubatsi.

Kwandikisha no guhererekanya umutungo byagabanyije iminsi byafataga bigera ku minsi irindwi, igiciro cyabyo kigera kuri 0.1% by’agaciro k’umutungo uhererekanwa.

Umujyi wa Kigali ugaragaza ko gusaba ibyangombwa byo kubaka byorohejwe kuko bishobora gutangwa hakoreshejwe ikoranabuhanga aho umuntu ari hose, hifashishijwe uburyo bw’ikoramabuhanga bugezweho, BPMIS (Building Permitting Management Information System).

Minisitiri w’Ubucruzi n’Inganda, Munyeshyaka Vincent yavuze ko u Rwanda rushyize ingufu mu kuzamura ubukungu, anaboneraho umwanya wo gutumira abayobozi ba Banki y’isi kuganira ku mishinga iri imbere.

Raporo ya Banki y’isi ku nshuro ya 15 yagaragaje kandi ko u Rwanda rwakoze byinshi mu kuvugurura amabwiriza ajyanye no kurengera abashoramari boroheje (SMEs), cyane mu kurenganurwa mu bihe by’imanza z’ubucuruzi.

U Rwanda n’Ibirwa bya Maurice biza mu bihugu bibiri byo munsi y’Ubutayu bwa Sahara biza imbere ku isi no mu bihugu 50 mu korohereza abashoramari gutangiza no gukora ubucuruzi.

RDB igaragaza ko u Rwanda rumaze gukora amavugurura 52 mu myaka 10 ishize bikaba byaragize impinduka nziza mu ruhando mpuzamahanga mu koroshya ishoramari n’ubucuruzi.

Ibindi bihugu byaje imbere muri Afurika y’Uburasirazuba ni Kenya iri ku mwanya wa 80 ku isi, Uganda ku mwanya wa 122 na Tanzania iri ku mwanya wa 137.

MUTUNGIREHE SAMUEL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE