2017-11-23 07:40:03 clouds 27o High | Kigali Rwanda

Dukurikire:
 
 

Rusizi: Ibiza byangije amazu y’agaciro ka miliyoni 500

Yanditswe na IMVAHO NSHYA

Kuya 2017-11-01 07:43:16

 
Share on:
 
Yasuwe:225
 
Yavuzweho:200
 
10
 
10

Umuyobozi w’Akarere ka Rusizi wungirije ushinzwe ubukungu n’iterambere, Kankindi Leoncie, atangaza ko mu mezi atatu ashize y’umwaka wa 2017 ibiza byangije amazu afite agaciro k’amafaranga y’u Rwanda 500 000 000 hatabariwemo ibindi byangiritse.

JPEG - 248 kb
Amazu yangijwe n’ibiza ari mu bifite agaciro kenshi mu karere ka Rusizi

Kankindi yagaragarije Imvaho Nshya ko kuva mu kwezi kwa Kanama, Nzeri n’Ukwakira, imvura yaguye muri ako karere idasanzwe yangije ibikorwa bitandukanye by’abaturage birimo amazu agera kuri 700 ku buryo agereranyije agaciro k’ibyayangiritseho bigera ku mafaranga 500 000 000.

Akomeza avuga ko ibyo biza by’imvura bitangije amazu gusa muri ako karere kuko byatwaye n’ubuzima bw’abantu, ibikoresho binyuranye byari muri ayo mazu kandi bifite agaciro, bitwara imirima yari imaze guterwamo imbuto n’ifumbire cyane cyane ihinzemo imiceri ku buryo byabaye inzitizi ku ngengo y’imari yari yarashyizwemo kugira ngo igere ku ntego zayo.

Abajijwe uruhare rw’akarere mu gutabara abahuye n’ibyo biza, Kankindi atangaza ko hakozwe ubuvugizi kuri Minisiteri ishinzwe imicungire y’Ibiza n’Impunzi (MIDIMAR) nubwo nta gaciro kagenwe k’ibyo bakeneye guterwamo inkunga.

Avuga ko akarere kahaye bamwe mu bagezweho n’ibiza amahema yo kwikingamo mu gihe bagitegereje ubufasha bufatika, abandi bahabwa amacumbi, abandi batagezweho n’ibyo biza bagenda bashishikarizwa gucumbikira bagenzi babo.

Zimwe mu ngamba zikomeje kandi zirimo kwitabaza imiryango nterankunga nk’utabara imbabare, abafatanyabikorwa b’akarere n’abandi baturage kugira ngo bagaragaze uruhare rwabo mu kwita ku bagezweho n’ibiza.

Kankindi avuga ko mu kurushaho kurengera ko n’ibindi byagerwaho n’ibiza akarere gakomeje gusaba abaturage kuzirika ibisenge by’amazu no kubaka mu buryo burambye kuko inzu nyinshi zangiritse ari uko zitari zikomeye.

SEZIBERA ANSELME

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE