2017-12-13 09:46:30 clouds 27o High | Kigali Rwanda

Dukurikire:
 
 

Abatanga amashanyarazi batabishinzwe n’abayiba bagiye gukurikiranwa

Yanditswe na IMVAHO NSHYA

Kuya 2017-11-01 07:01:38

 
Share on:
 
Yasuwe:115
 
Yavuzweho:200
 
10
 
10

Ubuyobozi bukuru bw’Ikigo cy’ingufu z’amashanyarazi (REG) buratangaza ko abantu batatu bahitanywe n’umuriro w’amashanyarazi abandi babiri urabakomeretsa mu gihe cy’icyumweru kimwe gusa ku mpamvu z’abantu biyitirira kuba abakozi ba REG bakunze kwitwa “Abahigi”. Bityo, ngo amategeko akaba agiye kujya akurikizwa ku biba amashanyarazi no ku bayatanga batabishinjwe.

JPEG - 255.7 kb
Iburyo ni Umuyobozi Mukuru wa REG Ron Weiss ari kumwe na Maj. Kalisa Jean Claude bari mu kiganiro n’abanyamakuru (Foto James)

Nk’uko bitangazwa n’umuyobozi mukuru wa REG, Ron Weiss, ngo uburyo bwo gutanga umuriro w’amashanyarazi bunyuranyije n’amategeko bwakoreshejwe n’abo bantu bitwa abahigi ni bwo nyirabayazana w’izi mfu zitunguranye z’abantu batatu baguye mu turere tunyuranye tw’igihugu.

Yameza ko abantu babigizemo uruhare bazakurikiranwa mu mategeko, cyane ko itegeko ku bakoresha umuriro w’amashanyarazi n’abawiba ryasohotse, rikazashingirwaho mu gahana abantu nk’aba.

Ati “Abantu bose bagira uruhare mu kwiba umuriro w’amashanyarazi no kuwuha abaturage batabifitiye uburenganzira bagomba kuzajya bahanwa hakurikije itegeko ryasohotse.”

Ku bijyanye n’iki kibazo cy’abiyitirira kuba abakozi ba REG bakiyemeza guha umuriro abaturage, umuyobozi wa EUCL, Major Kalisa Jean Claude, we yasobanuye ko iki kibazo gihari, aho yasabye abaturage gushishoza ku bantu baza kubaha serivisi za REG atari abakozi bayo, ahubwo bakabateza impanuka.

Yagize ati “Abaturage bakeneye serivisi z’amashanyarazi bakwiye kunyura ku buyobozi bwa REG bagahabwa serivisi zinoze n’abakozi b’iyi sosiyete, aho kuyahabwa n’abatari bo, ahubwo bakabateza impanuka.”

Maj. Kalisa yatanze ingero zinyuranye z’imfu zatejwe n’abiyitirira kuba abakozi ba REG kandi atari bo bazwi ku izina ry’ “Abahigi.”

Urugero rumwe ni impanuka yahitanye abana babiri b’abakobwa, umwe w’imyaka 16 undi wa 17 yabereye mu karere ka Gasabo, Umurenge wa Rutunga, Akagari ka Ndatemwa, Umudugudu wa Karuranga, tariki ya 22 Ukwakira 2017, itewe n’umuturage warahuriraga umuturanyi we mu buryo butemewe n’amategeko (Illegal Connection) akoresheje insinga zitagenewe gutwara amashanyarazi ku bakiliya.

Urundi rugero ni urw’impanuka yahitanye umukobwa w’imyaka 15, ikomeretsa abandi babiri, yabaye tariki ya 25 Ukwakira 2017, ibera mu karere ka Rusizi, Umurenge wa Muganza, Akagari ka Gakoni, Umudugudu wa Kindobwe, yakomotse ku nsinga zimuwe mu buryo butanoze mu nzu y’umuturage bikozwe n’umuntu wiyitirira kuba umukozi wa EUCL.

Maj. Kalisa ati “Izo nsinga zaje kumanuka zifatwa mu mabati y’inzu nayo akora ku ruzitiro rw’urugo rugizwe na senyenge, byose bijyamo amashanyarazi. Umwana umwe akoze ku ruzitiro akina arafatwa, abandi na bo bashatse kumutabara barafatwa.”

Urugero rwa gatatu ni urw’impanuka ikomoka ku muriro w’amashanyarazi yabaye tariki ya 29 Ukwakira 2017 mu karere ka Musanze, Umurenge wa Muhoza, Akagari ka Mpenge, Umudugudu wa Mpenge, aho umusore w’imyaka 31 yarimo yahira ubwatsi akubaganya insinga z’amashanyarazi ziri muri cabine. Ati “Umuturage umuriro waramukubise uramushegesha, ubu arwariye mu bitaro bya Ruhengeri.”

Kuri uwo munsi, umwana w’umunyeshuri w’imyaka 10 yakubiswe n’amashanyarazi nyuma y’uko akandagiye urutsinga rushishutse rwakomerekejwe na Sosiyete isana imihanda na we ubu akaba ari mu bitaro.

Maj. Kalisa yaboneyeho umwanya wo gusaba ba rwiyemezamirimo bakora imihanda kwirinda gukomeretsa insinga z’amashanyarazi, byaba byabaye bakabimemenyesha ubuyobozi bwa REG bubegereye ndetse bakanashyiraho akamenyetso k’aho urutsinga rwangijwe.

Uyu muyobozi yasabye Abanyarwanda gutanga amakuru mu gihe babonye umuntu wuriye ipoto atari umukozi wa REG, EUCL cyangwa EDCL. Yongeraho ko umukozi wese wemewe aba afite ikarita imuranga yambaye n’imyambaro yabugenewe.

MUGISHA BENIGNE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE