2017-11-23 07:40:03 clouds 27o High | Kigali Rwanda

Dukurikire:
 
 

Gahunda yo kugaburira abana ku mashuri yongereye busabane mu banyeshuri

Yanditswe na IMVAHO NSHYA

Kuya 2017-10-31 07:07:57

 
Share on:
 
Yasuwe:137
 
Yavuzweho:200
 
10
 
10

Gahunda ya Leta yo kugaburira abana mu mashuri yongereye urukundo n’ubusabane mu banyeshuri, inagabanya ibishuko abana b’abakobwa bahuraga na byo mu nzira bagiye gushaka icyo bafungura.

JPEG - 198.7 kb
Amwe mu mafunguro abanyeshuri bahabwa muri gahunda yo kubagaburira ku mashuri

Ibi ni ibitangazwa n’Uwimbabazi Sylvie, umukozi wa Minisiteri y’Uburezi, ushinzwe gahunda zihuriweho mu burezi mu kiganiro kigufi yagiranye n’Imvaho Nshya.

Yagize ati “Gahunda yo kugaburira abana mu mashuri yongereye ubusabane n’urukundo hagati y’abanyeshuri ubwabo kandi yafashije mu kugabanya ibishuko abana b’abakobwa bahuraga na byo iyo babaga bagiye gushaka icyo barya hanze y’ishuri.”

Yavuze ko iyo abana b’abakobwa bajyaga gushaka uko bigenza mu gihe cya saa sita, ngo ni bwo bahuraga n’abagabo cyangwa abasore babashukisha amandazi n’utundi tuntu turyohera abana, bityo bikazabaviramo ihohoterwa.

Uwimbabazi kandi yavuze ko iyi yagunda yagabanyije umubare w’abana bataga ishuri bitewe n’ubukene bwo kutabona icyo barya mu miryango yabo, bagahitamo kureka ishuri bakajya gukorera amafaranga.

Uyu muyobozi kandi avuga ko iyi gahunda yafashije mu mitsindire y’abanyeshuri, kuko batakiga basinzirizwa n’inzara nk’uko byari bimeze mbere, bityo ngo ikigero cy’imitsindire yabo cyarazamutse.

Ibyo Uwimbabazi avuga bishimangirwa na Ntakirutima André, umuyobozi w’Urwunge rw’amashuri rwa Nyarubaka ruherereye mu Karere ka Kamonyi, wemeza ko gahunda yo kugaburira abana ku mashuri yagize umumaro munini, haba ku ruhande rw’abanyeshuri no ku ruhande rw’abarezi.

Yagize ati “Iyo umwarimu yinjiraga kwigisha agasanga abana benshi batamukurikira ku mpamvu z’inzara yabaga ibasinziriza na we ntiyishimaga, yabonaga ko isomo rye ritagenze neza kuko yashoboraga gusanga mu bana 45 bari imbere ye abamukurikiye batarenze nka 15, kandi buriya umurezi ashimishwa no kubona isomo atanze ryumviswe n’abanyeshuri bose.”

Yavuze ko ibibazo byo gukurikira amasomo inyuma ya saa sita byatumaga abarezi bacika intege yo kwigisha abana bashonje, akenshi bagahindura gahunda bitewe n’imimererwe y’abanyeshuri.

Mukanyandwi Fausta, ni umuyobozi w’Urwunge rw’amashuri rwa Gitarama, ku bijyanye n’umumaro gahunda yo kugaburira abana ku mashuri yazanye, na we yashimangiye ibyo Uwimbabazi yagaragaje, birimo urukundo n’ubusabane hagati y’abanyeshuri, kongera imitsindire y’abanyeshuri no kugabanya umubare w’abata ishuri.

Abayobozi bavuga ko abana bagaburirwa ibiryo binyuranye birimo akawunga, umuceri, rimwe na rimwe ibijumba cyangwa ibirayi bitewe n’ahantu ndetse n’impungure.

Iyi gahunda ariko ikeneye gukomeza gutezwa imbere nk’uko abayobozi b’amashuri babigarukaho kenshi, kugira ngo irusheho gutanga umusaruro urenze uwo itanga ubu.

MUGISHA BENIGNE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE