2017-11-17 14:59:33 clouds 27o High | Kigali Rwanda

Dukurikire:
 
 

RDB yatanze inyenyeri ku mahoteli, ibasaba abakora mu bukerarugendo kunoza serivise

Yanditswe na IMVAHO NSHYA

Kuya 2017-10-27 07:55:02

 
Share on:
 
Yasuwe:157
 
Yavuzweho:200
 
10
 
10

Ikigo k’igihugu k’iterambere (RDB) cyatangiye kujya gitanga inyenyeri ku mahoteli yo mu Rwanda mu rwego rwo kugaragaza uko zikurikirana mu bwiza, kinaboneraho gusaba abakora mu bukerarugendo bose kurushaho kunoza ibyo bakora banatanga serivise nziza kugira ngo ababagana barusheho kwishimira ubukerarugendo mu Rwanda.

JPEG - 300.8 kb
Minisitiri w’urubyiruko, Rose Mary Mbabazi ashyikiriza Umuyobozi wa Ladson Blue icyemezo kigaragaza inyenyeri eshanu iyo hoteli ifite

Igikorwa cyo gutanga inyenyeri ku mahoteli yo mu Rwanda cyakozwe bwa mbere ku wa 25 Ukwakira 2017 ahatanzwe inyenyeri ku mahoteli ndetse hakanatangwa ibyangombwa byemerera abakora mu bukerarugendo.

Mu Rwanda hose ubu hoteli eshatu gusa Serena hotel, Marriot hotel na Ladison Blue ni zo zahawe inyenyeri eshanu, izi akaba ari zo nyenyeri zigaragaza hoteli iba iri ku rwego rwa mbere mu bwiza ku isi, naho hoteli 7 ni zo zihawe inyenyeri enye.

Umuyobozi mukuru wa RDB, Clare Akamanzi yavuze ko hakomeje gukorwa ibishoboka byose ngo hoteli nyinshi zishoboka zibashe kugera ku nyenyeri zo hejuru, ati “Hari abandi bakomeje kubaka twizera ko inyenyeri eshanu zizaba nyinshi kandi nka RDB icyo dukora ni ukubafasha aho bishoboka hose kugira ngo na bo babashe kugera kuri urwo rwego.”

Akomeza agira ati “Hari ibintu byinshi turebaho kugira ngo dutange inyenyeri nk’uko byose biteganywa n’itegeko, tureba inzu uko imeze, tukareba niba mufite ibyumba byo kuraramo bigezweho, niba mufite ibyo kurya kandi bihagije, niba mufite pisine, interineti, tukareba ubuhanga bw’abakozi bakorera iyo hoteli, isuku n’ibindi nk’ibyo byose tukareba urwego biriho. Ikindi dukorana n’abanyamahoteli amahugurwa ngo tubereke ibiba bikenewe kugira ngo bagere ku nyenyeri yo hejuru.”

Yibukije ko nyuma yo guhabwa inyenyeri buri hoteli isabwa gukora cyane kugira ngo izahabwe inyenyeri isumbyeho cyane ko ngo hari n’ubwo inyenyeri zishobora kugabanywa hoteli ikakwa zimwe mu nyenyeri zayo bitewe no gusubira inyuma.
Bamwe mu banyamahoteli bahawe inyenyeri bavuze ko ari igikorwa k’ingenzi bari bakeneye ndetse akaba ari n’umwanya mwiza babonye wo kurushaho guhangana n’andi mahoteli ku rwego mpuzamahanga.

Harerimana Jean Leonard yagize ati “Twishimiye kuba duhawe izi nyenyeri, ni ikintu cy’agaciro cyane, bigaragaza uko twagiye duhindura ibintu ku mikorere no ku nyubako ku buryo umukiliya ugeze iwacu yumva yisanzuye, serivise dutanga ni zo ziduhesha izi nyenyeri, turakora ibishoboka byose ku buryo umukerarugendo ugeze mu Rwanda azataha akatubera intumwa ku kurata ibyiza by’uburyo twamwakiriye no kuri serivise nziza dutanga.”

RDB yasobanuye ko mu bakora mu bukerarugendo 75 bari basabye ibyangombwa n’inyenyeri ku mahoteli, 67 ari bo basanze bujuje ibisabwa. Iki gikorwa kizajya kiba buri nyuma y’imyaka 2.

Itegeko rigenga itangwa ry’inyenyeri ku mahoteli n’ibindi byangombwa byemerera abakora ubukerarugendo mu Rwanda ryemejwe na Guverinoma risohoka mu igazeti ya Leta yo ku wa 03 Ukwakira 2016.

NIYONSENGA SCHADRACK

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE