2017-11-23 07:40:03 clouds 27o High | Kigali Rwanda

Dukurikire:
 
 

Ngoma:Twite ku bana bacu, tubarinde imirire mibi kandi birashoboka- Harelimana

Yanditswe na IMVAHO NSHYA

Kuya 2017-10-27 07:19:09

 
Share on:
 
Yasuwe:119
 
Yavuzweho:200
 
10
 
10

Visi Perezida w’Inteko Ishinga Amategeko umutwe wa Sena, Harelimana Fatou, yasabye ababyeyi kujya bategurira abana babo amafunguro yujuje intungamubiri, mu rwego rwo kubarinda indwara zikomoka ku mirire mibi.

JPEG - 331.3 kb
Senateri Harelimana Fatou yasabye ababyeyi kwita ku mirire y’abana (Foto Manishimwe N)

Mu butumwa yatangiye mu murenge wa Sake, mu kagari ka Gafunzo ubwo yifatanyaga n’abaturage muri gahunda y’Umugoroba w’ababyeyi, tariki ya 25 Ukwakira 2017, uyu muyobozi yagarutse ku kibazo cy’imirire mibi itararanduka burundu.

Mukayiranga Gloriose, Umunyamabanga Nshingwabikorwa w’Umurenge wa Sake, yamugaragarije ko muri uyu murenge hamaze kubarurwa abana 2 bafite ikibazo cy’imirire mibi ikabije (bari mu ibara ry’umutuku), n’abana 44 bari munsi y’imyaka itanu bafite ikibazo cy’imirire mibi (bari mu ibara ry’umuhondo).

Gitifu Mukayiranga yavuze ko aho ubuyobozi bwiyemeje gushyira imbaraga nyinshi ari mu kwigisha abaturage guhindura imyumvire, kuko hari n’abatishoboye bahabwa amata ngo yunganire ibyo bafite mu kurwanya imirire mibi, bakarengaho bakayagurisha.

Ati “Turacyafite imbogamizi z’uko hari ababyeyi, ashobora kujya gufata amata, ariko yagera hano akayagurisha. Ibyo biratubabaza cyane, twagiye dufata n’ingamba, twabona abo babyeyi tukabaganiriza, yaba abagura ayo mata n’abayagurisha; tukabakebura.”

Bamwe mu baturanye n’imiryango ifite iki kibazo, bo bagaragaza ko ahanini biba bishingiye ku myumvire mike nk’uko bivugwa na Nshiyimihigo Girbert wo mu Kagari ka Rukoma.

Ati “Tubona ubuyobozi bwite bwa Leta buticaye, kwigisha ni uguhozaho, ariko twe tubona ikibazo gihari, kiri ku iterambere rishingiye mu bitekerezo, mu baturage, bakwiye gukomeza kwigishwa.”

Mu butumwa yagejeje ku bagabo, abagore n’urubyiruko bari bitabiriye uyu mugoroba w’ababyeyi, Harelimana Fatou, Visi Perezida w’inteko ishinga amategeko umutwe wa Sena, yasabye ababyeyi, inzego z’ubuzima n’ubuyobozi kwihutira kwita ku bana bari mu mirire mibi, bakayivamo.

Ati “Numvise ko mugifite abana 44 bari mu muhondo, na babiri bari mu mutuku.Ubwoba nagize ni uko niturangara gato na ba bandi 44 kubera ko amata bayaduha tukayagurisha , bose bazajya mu mutuku.

Abajyanama b’ubuzima, bakomeze kubigisha uko bategura indyo yuzuye.Ariko nimureke twite ku bana bacu, ikibazo cy’imirire mibi tugerageze tugice burundu; kandi birashoboka.”

Harelimana Fatou yasobanuriye abatuye Sake ko abahanga muri siyansi (Science), bemeza ko umwana wagize ikibazo cy’imirire mibi, adakura neza, n’ubwonko ntibukore neza.

Avuga ko imiryango igaragaramo imirire mibi, ahinini itabiterwa no kubura ibiryo, ahubwo biterwa nuko ababyeyi babura ubushake bwo kwita ku bana babo, ndetse no guteshuka ku nshingano nk’ababyeyi.

Aha ni ho yahereye asaba ababyeyi kongera gutekereza ku nshingano zabo z’urugo, kandi buri wese akumva ko hakenewe ubufatanye bw’abagize umuryango (umugabo n’umugore) mu kurwanya n’ikibazo cy’imirire mibi.

Ati “Niba umugore n’umugabo babyutse bagiye guhinga, mwese muragiye kuva mu gitondo, mugaruka nimugoroba, umwana nk’uyu muto, nibura ntunamusigire n’igikoma, ahubwo mumusigiye ikijumba cyangwa umwumbati, ikigori…Ese umwumbati wonyine ni indyo yuzuye?Nimureke duhinduke twumve ko abana ari inshingano zacu nk’ababyeyi.”

Muri uyu mugoroba w’ababyeyi kandi, ababyeyi bongeye kwibutswa, ibigize indyo yuzuye, uko itegurwa, ndetse banasobanurirwa ko indyo yuzuye idahenze, kuko bayitegura bakoresheje ibyo bafite iwabo, n’ibindi bidahenze nk’ibirayi, igitoki, ibishyimbo, indagara, karoti, imboga (dodo), imineke n’ibindi.

MANISHIMWE NOËL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE