2017-12-13 09:46:30 clouds 27o High | Kigali Rwanda

Dukurikire:
 
 

Abamamyi baravugwaho kubangamira amakusanyirizo y’amata

Yanditswe na IMVAHO NSHYA

Kuya 2017-10-25 07:20:37

 
Share on:
 
Yasuwe:161
 
Yavuzweho:200
 
10
 
10

Bamwe mu bakuriye amakusanyirizo y’amata baratunga agatoki abazwi nk’abamamyi basanga aborozi mu ngo bakabarangurira amata bitwaje kubongerera amafaranga bigatuma amakusanyirizo abura ayo ageza ku nganda ziyatunganya.

JPEG - 186.9 kb
Amata ajyanwa ku makusanyirizo aratunganywa akanyobwa yujuje ubuziranenge

Twime Datien ukuriye koperative y’aborozi IAKIB iherereye mu karere ka Gicumbi, yatangarije Imvaho Nshya ko abamamyi bakomeje kubangamira amakusanyirizo kuko basanga aborozi mu ngo bakabongereraho igiceri cy’amafaranga y’u Rwanda 100 ku giciro cyari gisanzweho hanyuma aborozi bagahitamo kubaha amata amakusanyirizo akayabura.

Agira ati “Nka koperative dutanga umukamo w’amata ku makusanyirizo kandi ku giciro gisanzweho nta kongera andi mafaranga. Ndanyomoza amakuru y’uko amata yaba yarabuze kuko mu gihe k’imvura ubwatsi buboneka bityo n’amata akaboneka nubwo akenshi aba atari meza kubera ko aborozi bongeramo amazi kugira ngo bayatubure mu gihe abamamyi baje kuyafata babone inyungu nyinshi, bikaba intandaro z’uko amakusanyirizo n’inganda biyabura ngo atunganywe”.

Uwineza Laurence, umworozi mu murenge wa Shyogwe mu karere ka Muhanga, avuga ko nk’aborozi bahitamo guha umukamo w’amata abamamyi kuko bongeraho igiceri ku mafaranga amakusanyirizo abaheraho.

Agira ati “Iyo abamamyi baje gushaka amata mu rugo baduhera ku mafaranga 250 litiro imwe mu gihe abo ku makusanyirizo baduhera ku mafaranga 180 bakabya akaba 200, icyo gihe duhitamo kuba ari bo tuyaha kuko na twe ni zo nyungu zacu”.
Mu gushaka kumenya niba amata yaba yarabuze koko bikaba impamvu y’uko ahenda, Imvaho Nshya yaganiriye n’umwe mu bacuruzi bayo barangura n’aborozi Ndereyimana André, asobanura ko barangura kuri 250 litiro imwe uje kuyigura ayishaka bakayimuhera amafaranga 400 kuri litiro.

Ku ruhande rwa Minisiteri y’Ubuhinzi n’Ubworozi, Uwumukiza Beatrice ushinzwe ubugenzuzi bw’ubuziranenge mu bijyanye n’ubuhinzi n’ubworozi, avuga ko amakuru ajyanye n’imikorere ku bitwa abamamyi yizeraga ko yarangiye kuko itegeko rigena ko amata yose avuye ku mworozi agomba guca mu ikusanyirizo agapimwa ubuziranenge akabona gucuruzwa.

Uwumukiza atangaza ko nta duka na rimwe cyangwa Alimantation icuruza amata atanyujijwe mu ikusanyirizo, kuko buri yose igomba kuba yujuje ibyemezo bigaragaza ikusanyirizo amata yaturutsemo, ibipimo yahagurukanye n’ibindi bigendanye no gucuruza amata kugira ngo Abanyarwanda bakomeze kunywa amata meza yujuje ubuziranenge.

Akomeza avuga ko ubifatiwemo atujuje ibisabwa ngo umuntu yemererwe gucuruza amata byavuzwe hejuru, uwo mucuruzi ashobora gufungirwa iduka cyangwa agafatirwa amata yaguze ku buryo butemewe bwagenwe.

Nta giciro gihamye cy’amata uyu muyobozi atangaza kuko abacuruza biterwa n’uburyo bashoyemo n’icyo byabasabye bakabona gushyiraho igiciro hagati y’ugura n’ugurisha.

SEZIBERA ANSELME

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE