2017-12-11 14:03:29 clouds 27o High | Kigali Rwanda

Dukurikire:
 
 

Basketball: Ikipe ya IPRC-South BBC irerekeza muri Uganda

Yanditswe na IMVAHO NSHYA

Kuya 2017-09-29 07:38:04

 
Share on:
 
Yasuwe:162
 
Yavuzweho:200
 
10
 
10


Uyu munsi ku wa Gatanu tariki 29 Nzeri 2017, ikipe ya IPRC-South BBC y’abagabo ni bwo yerekeza i Kampala muri Uganda aho igiye kwitabira imikino y’akarere ka 5 ihuza amakipe yabaye aya mbere iwayo “Zone V Club Championship 2017” izaba kuva tariki 1-7 Ukwakira 2017.

JPEG - 384.4 kb
Ubwo ikipe ya IPRC-South BBC yabonaga itike yo gusohokera igihugu nyuma yo kwegukana igikombe cya Playoffs 2016

Muri iyi mikino y’akarere ka 5, u Rwanda ruzahagararirwa n’amakipe 3 ariyo IPRC-South BBC na Patriots BBC mu bagabo na APR BBC mu bagore.

Umunyamabanga mukuru w’ishyirahamwe ry’umukino wa Basketball mu Rwanda “FERWABA”, Mutabazi Richard yatangarije Imvaho Nshya ko iyi kipe ya IPRC-South BBC yerekeza muri Uganda kuri uyu wa Gatanu.

Avuga ko iyi kipe iza gukora urugendo n’imodoka naho izindi kipe, APR BBC na Patriots zikagenda n’indege ku wa Gatandatu tariki 30 Nzeri 2017. Yavuze ko kuba aya makipe yaregukanye shampiyona yategewe indege na Minisiteri y’Umuco na Siporo naho IPRC South ikaba yarahawe inkunga na FERWABA.

Umutoza wa IPRC-South BBC, Mushumba Charles yemeza ko imyiteguro y’iyi mikino y’Akarere ka 5 yagenze neza kandi n’abakinnyi bameze neza nta bibazo by’imvune bafite. Yagize ati “Imyiteguro y’iyi mikino yabaye myiza, iyo ukoresheje imyitozo ikarangira nta mvune zibayemo, iyo myitozo iba yaragenze neza”.

Mushumba avuga ko ku nshuro ya mbere bagiye kwitabira iyi mikino bafite intego yo kwitwara neza bishoboka ndetse uko bazarushaho kugenda bakina ni byo bishobora kubaha n’icyizere cy’uko n’igikombe bagitwara.

Abakinnyi b’iyi kipe ya IPRC-South BBC bari kumwe n’umutoza Mushumba Charles, wungirijwe na Shema J. Fiston bari batangiye iyi myiteguro y’imikino y’Afurika tariki 4 Nzeri 2017 gakorera imyitozo ku kibuga cyabo giherereye muri IPRC y’Amajyepfo i Huye.

IPRC-South BBC yabonye iyi tike yo guhagararira igihugu muri iyi mikino y’akarere ka 5 nyuma y’uko yegukanye igikombe cya “Playoffs 2016” gihuza amakipe ane ya mbere muri shampiyona y’umwaka ushize wa 2016 itsinze Patriots ku mikino 3-1.
Mu mikino y’Akarere ka 5 iheruka kubera i Dar es Salaam muri Tanzania mu 2016, ikipe ya City Oilers yo muri Uganda mu bagabo izakira iyi mikino ni yo yegukanye igikombe itsinze ku mukino wa nyuma Ulinzi yo muri Kenya amanota 72 kuri 49 naho mu bagore KPA yo muri Kenya igitwara itsinze UCU yo muri Uganda amanota 57 kuri 53.

NKOMEJE GUILLAUME

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE