2017-11-23 18:23:19 clouds 27o High | Kigali Rwanda

Dukurikire:
 
 

Ikipe y’u Rwanda ntiyabashije kubona itike ya ¼ muri “Afrobasket 2017”

Yanditswe na IMVAHO NSHYA

Kuya 2017-09-12 06:55:34

 
Share on:
 
Yasuwe:68
 
Yavuzweho:200
 
10
 
10

Ikipe y’u Rwanda nkuru y’abagabo mu mukino wa Basketball yasezerewe hakiri kare mu mikino y’amatsinda y’imikino y’Afurika “FIBA Afrobasket 2017” nyuma yo gutsindwa na Cameroun ku manota 81 kuri 77.

JPEG - 337.2 kb
Ikipe y’u Rwanda nta bwo yabashije kubona itike y’imikino ya Afrobasket 2017 nyuma yo gutsindwa na Cameroun

Mu mukino wa nyuma wo mu itsinda rya 3 wabaye ku cyumweru tariki 10 Nzeri 2017, iyi ikipe y’u Rwanda yari yatangiye neza ibasha kuyobora agace ka mbere itsinze Cameroun ku manota 22-18.

Mu gace ka kabiri, ikipe y’u Rwanda yaje kurushwa bikomeye na Cameroun mu gutsinda amanota atatu, maze igatakaza itsinzwe ku manota 41-36.

Uyu mukino warushijeho gukomera cyane mu gace ka gatatu ari na ko amakipe yombi arushaho guhangana gusa Cameroun yaje gukomeza kuyobora umukino ikegukana ku manota 57- 53.

Mu gace ka nyuma (4) amakipe yakomeje gucungana ari na ko agendana mu manota, ikipe y’u Rwanda iza kurusha Cameroun amanota 4. Gusa mu minota ya nyuma y’umukino, Cameroun yaje kongera kuyobora umukino urangira yegukanye intsinzi ku manota 81 kuri 77.

Nyuma yo gutakaza uyu mukino, ikipe y’u Rwanda yasabwaga gutsinda yaje guhita isezererwa itabashije kugera mu mikino ya ¼, ari na yo ntego bari bihaye ubwo bitabiraga iyi mikino ya “Afrobasket 2017”.

Ikipe y’u Rwanda yari mu itsinda rya 3 yabashije gutsinda umukino umwe itsindwa imikino ibiri. Yari yatangiye neza itsinda Guinea ku manota 75-55, yongera gutsindwa na Tunisia yari mu rugo mu mukino wa 2 ku manota 78-60.

U Rwanda rwari rwitabiriye imikino y’Afurika “FIBA Afrobasket” ku nshuro ya 5, umwanya mwiza rwegukanye ni uwa 9 akaba ari mu mikino yabereye muri Libye muri 2009. Aha rwatsinze imikino 5 rutsindwa imikino 3.

Nyuma yo gusezerwa biteganyijwe ko ikipe y’igihugu igaruka mu Rwanda uyu munsi tariki 12 Nzeri 2017.

Uko amakipe azahura mu mikino ya ¼
Nyuma y’uko amakipe 8 yamaze gukatisha itike y’imikino ya ¼, ku wa Kane tariki 14 Nzeri 2017 iyi mikino izakomeza aho Maroc izakina na Misiri, Nigeria ihure na Cameroun, Tunisia ikine na RDC naho Senegal izakine na Angola.
Iyi mikino y’Afrobasket 2017 yatangiriye mu matsinda ikinirwa mu bihugu bibiri ari byo Senegal na Tunisia. Biteganyijwe ko igiye gukomereza i Tunis muri Tunisia.

NKOMEJE GUILLAUME

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE