2017-10-16 07:05:01 clouds 27o High | Kigali Rwanda

Dukurikire:
 
 

Afrobasket 2017: Nigeria yegukanye igikombe cy’Afurika

Yanditswe na IMVAHO NSHYA

Kuya 2017-08-29 06:46:31

 
Share on:
 
Yasuwe:57
 
Yavuzweho:200
 
10
 
10

Kuva tariki 18 kugeza 27 Kanama 2017 mu mujyi wa Bamako muri Mali habereye imikino y’Afurika muri Basketball mu cyiciro cy’abagore “FIBA Women’s AfroBasket 2017”, ikipe ya Nigeria ni yo yegukanye igikombe itsinze Senegal ku mukino wa nyuma.

JPEG - 320.6 kb
Abakinnyi ba Nigeria ubwo bashyikirizwaga igikombe baherukaga muri 2005

Ubwo iyi mikino yasozwaga tariki 27 Kanama 2017, Nigeria yatsinze Senegal amanota 65 kuri 48. Nigeria ikaba yahise yegukana igikombe cyabaye icya 3 nyuma yo kwegukana iki gikombe muri 2003 na 2005. Gusa mu 1997 na 2015 yegukanye umwanya wa 3. Nigeria yageze ku mukino wa nyuma isezereye Mali naho Senegal isezerera Mozambique.

Ikipe ya Nigeria yegukanye igikombe ndetse na Senegal zikaba zarabonye itike yo kuzahagararira Afurika mu mikino y’igikombe cy’isi izabera muri Espagne umwaka utaha wa 2018 “FIBA Women’s Basketball World Cup 2018”.

Hahembwe abitwaye neza
Muri iri rushanwa hatowe abakinnyi 5 bitwaye neza ari bo Naignouma Coulibaly (Mali), Leia Dongue (Mozambique), Astou Traoré (Sénégal), Osaretin Evelyn Akhator (Nigéria) na Italee Lucas (Angola) naho umukinnyi witwaye neza aba Astou Traoré wo muri Senegal. Astou Traoré ni na we wahawe igihembo nk’uwatsinze amanota menshi naho Naignouma Coulibaly ahembwa nk’uwagaruye imipira kurusha abandi. Anabela Cossa wo muri Mozambique yahembwe nk’uwarushije abandi gutanga imipira yabyaye amanota.

Uko amakipe yakurikiranye
Iyi mikino y’Afurika yari yitabiriwe n’amakipe 12, Nigeria ni yo yabaye iya mbere ikurikirwa na Sénégal, Mali (3), Mozambique (4), Côte d’Ivoire (5), Angola (6), Misiri (7), Cameroun (8), RDC (9), Guinée (10),Tunizia (11) na République Centrafricaine (12). Ikipe y’u Rwanda iheruka kwitabira iyi mikino muri 2011 aho yegukanye umwanya wa 9.

BUGINGO FIDELE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE