2017-09-21 09:07:12 clouds 27o High | Kigali Rwanda

Dukurikire:
 
 

Musanze:Abaturage batishoboye 1500 bishyuriwe Mituweli

Yanditswe na IMVAHO NSHYA

Kuya 2017-08-28 09:08:25

 
Share on:
 
Yasuwe:126
 
Yavuzweho:200
 
10
 
10

Ishuri rikuru ry’ubumenyingiro, INES Ruhengeri, ryahaye akarere ka Musanze amafaranga miliyoni enye n’ibihumbi magana atanu (4.500.000), azishyurira mituweli abaturage 1500 batishoboye bo mu murenge wa Musanze.

JPEG - 249.5 kb
Umuyobozi w’akarere ka Musanze (ibumoso) ashyikirizwa sheki (Foto Ngaboyabahizi P)

Umuyobozi wa INES Ruhengeri Padiri Dr Hagenimana Fabien, avuga kuri uyu musanzu batanze, yagize ati “ INES Ruhengeri yaje igamije kuzamura iterambere ry’umunyarwanda, rihereye ku bumenyi bwatuma yihangira umurimo, akiteza imbere, ariko n’igihugu cye muri rusange Nta bwo rero byaba byiza abayituriye bishwe n’indwara kubera kubura uburyo bivuza, iki gikorwa twasanze ari ingirakamaro ari na yo mpamvu tubisabwe n’akarere ndetse n’ubuyobozi bw’umurenge wa Musanze, nyuma y’aho butwerekeye ko bufite ikibazo cy’abaturage basaga 3500 batagira ubwisungane mu kwivuza, mu ngufu rero z’iri shuri twabashije kubona miliyoni enye n’igice, zizafasha abaturage 1500 mu kwivuza.

Ni igikorwa kizakomeza uko INES izagenda ishobozwa, ibi kandi biri no mu buryo bwo kwigira twebwe abanyarwanda tuzamurana nk’uko Umukuru w’igihugu Paul Kagame ahora abisaba abanyarwanda, nta munyarwanda twifuza ko asigara inyuma.”

Munyarugerero Emmanuel, umwe mu bahawe ubwisungane mu kwivuza, utuye mu kagari ka Rwambogo, umudugudu wa Gakoro, yagize ati “ Nta bwo nabona uko nshimira INES, ariko na none urugero rwiza irukomora kuri Paul Kagame, kuko nta munsi n’umwe nigeze mbona ikigo cy’amashuri gifasha abatishoboye, rwose nkubwize ukuri ndi mu cyiciro cya mbere, maze imyaka 2 nta bwisungane bw’abana banjye bose ngira.

Urumva umuryango wanjye ugizwe n’abantu 9, ariko natangaga ay’umugore n’ay’utwana dufite imyaka kuva kuri 2, none ibintu bigiye mu buryo ngiye kujya ngenda nemye kuko mfite ubwishingizi, gahunda Perezida yashyize mu bigo byigenga yo gusaranganya ubukire ndayishimiye”.

Umuyobozi w’akarere ka Musanze Habyarimana Jean Damascene, Yagize ati “Kugeza ubu akarere ka Musanze gatuwe n’abaturage basaga ibihumbi 386, ariko kugeza ubu abagera ku 28.846 bo mu cyiciro cya mbere n’icya kabiri ntibashora kubona ubwisungane mu kwivuza.

Nyuma rero y’uko akarere kaganiriye n’amashuri makuru agera kuri 7 muri Musanze, buri shuri ryiyemeje kuzana umusanzu waryo kugira ngo abaturage batishoboye bavuzwe, ni ibintu byo kwishimira kuko nta kigo koko gikwiye guturana n’indembe zasaritswe n’uburwayi”.

Kugeza ubu akarere ka Musanze kageze ku gipimo cya 52% mu kwitabirira ubwisungane mu kwivuza muri uyu mwaka wa 2017-2018.

NGABOYABAHIZI PROTAIS

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE